ازيكم يا جماعة
قبل محكى على النهارده نرجع لورا شوية
من اول مدخلت القسم وتعودنا بين كل وقت والتانى
نروح منطقة الازهر والقاهرة الفاطمية
يعنى شارع المعز وبوابات القاهرة وما حولها
نرسم من هناك علطول أو نصور ونرسم فى الكلية
أو حتى نصور بس
وأحيانا ولا بنرسم ولا بنصور
لكن بنروح كمكان ملهم له روح خاصة به
انهارده كان يوم من أيام التصوير
بندرس مادة اسمها دراسات طرز زخرفية
فنزلنا لكن كان تركيزنا الاكبر على الجوامع
هتلاقوا معظم الصور من 3 اماكن
جامع الغورى
جامع الأشرف
جامع برقوق
الثلاثة مميزين ..فيه غيرهم طبعا
لكن انهارده كان مخصص ليهم هما
شوفوا الصور..على فكرة لسه بنتعلم تصوير كويس يعنى
لأ لسه حاجة قبل متشوفوها
هما حاجتين يعنى
أولا..حاولوا تلاحظوا فى الفن الاسلامى عموما وفيما بخص المرحلة دى بالذات
هتتلاقوا فعلا ان الاسلام كدين بيحتك بواقع الناس تماما وصالح لكل وقت ومكان
وصل صفته ديه للفن الخاص به
فهتلاقوا المعادلة اللى حرص دائما على تحقيقها
الغنى الفنى العالى جدااا مع البحث عن مناسبة الوظيفة
الثراء فى الشكل مع عدم الاسراف او البذخ الزائد فيما لا قيمة اساسية له
الدقة التامة مع المرونة
هوه الفن الاسلامى الكلام عليه مش فى جملتين
لكن دى بس ملاحظة
فى كلام تانى كتييير
بس مش انهارده
ثانيا..خاطرة دايما بتجيلنا واحنا هناك..لما بنقارن ما كان متاحا لهم وما هو متاح لنا الان بالذات فى أساليب التنفيذ وتطورها
ونقارن بين الانتاج الثقافى والفنى لهم ولنا الان
اية بتيجى علطول ادام عينينا
اتقوا الله ويعلمكم الله
فيه حاجات بشوفها هناك بحس ان اللى عملها مكنش انسان عادى..كان حاسس فعلا باللى بيعمله..كان يملك حب للاسلام وصلة بالله مختلفة عننا
انا مش بقول كده كياس من حالنا
لأ
انا بس بحط المعادلة ادام عينينا
مش فى فن وثقافة بس ..لكن عموما فى كل اتجاهات حياتنا
مش عاوزة يكون فى التدوينة دى اى حاجة تزعل
بس هقول مش بتفصيل
الاسلوب الفذ اللى بتتبعه وزارة الثقافة فى الترميم
ولا بلاش..خلوا دى لوقت تانى
صحيح بمناسبة اليأس بأه
اللى انا مسحته من دماغى خااالص الحمد لله
بدأت بداية جديدة مع نفسى امبارح السعة 7 الا ربع مساءا
بالظبط
على كافة المستويات يا جماعة
دعواتكم بأه
قلت أفرحكم يعنى زى مشتكيت قبل كده
واللى عاوز يبدأ
ميترددش
ياخد الخطوة علطول
واخيرا بأه..طلب
اللى يعرف موقع بيترفع عليه أناشيد بحيث يدينى كود احطها على المدونة
ويكون بينفع فيه أنها تتشغل أوتو بلاى من نفسها اول متتفتح المدونة
ي/تقول
وجزاكم الله خيرا أوى
تحديث
زودته على التدوينة الساعة 1 وربع صباحا
احنا الجرايد بتاعت بكره بنجيبها من بليل
فياريت تبصوا على المصرى اليوم
الخبر بتاع الصفحة الأولى
وكمالته الأعجب فى الصفحة الرابعة
عشان تقولوا
كلكم
بملئ فيكم
ربنا يشفى
الخيال الخصب كويس
بس مش فى الأخبار الصحفية
(كنت كاتبه بس مش فى الصحافة فنصحتنى احدى الخبيرات المستقبليات فى الصحافة بأن الخيال عند الصحفى عامة يعتبر قدرة وابااع فى حالات كتير لكن الاخبار لأ وقد اقتنعت بكلامها لذا وجب التعديل ووجب شكرها كمان)
أسيبكم مع شوية صور
yessssssssssssssss
ReplyDeleteاخيرا اول تعليق
استني احجز التعليق الاول وبعدها افكر في كلام اعلق بيه تعليق حقيقي عالبوست
وانا تانى تعليق
ReplyDelete:1:1
تعرفي يا اسماء
ReplyDeleteانا عاشقة للخط العربي
احد الاساتذة زمان اللي كانوا بيعلمونا خط كان بيركز اوي
علي نقطة انتي ذكرتيها في موضوعك
ازاي الفن الاسلامي عامة والخط العربي خاصة جمع بين قمة الدقة وتمام المرونة
ازاي جمع ما بين البساطة والثراء
يمكن اكون اللي استفدته من الخط كهواية يقابله الكثير مما استفدته كمعني وقيمة
اما بئا بالنسبة للصور
بجد تحفففففففة ما شاء الله
شكلي هاجي اخد دروس خصوصية عندك
وبلاها صيدلة
هههههههه
فرحت اوي بقرارك ترك اليأس
يارب يكون قرار بلا رجعة
وحلوة اوي الساعة 7 الا ربع دي
باحب انا الناس الدقيقة
ربنا ييسرلك امورك دايما يا اسماء ويباركلك
حاجة اخيرة بئا قبل ما امشي ياريت حد يرد علي طلب اسماء بتاع الموقع ضروري .... عشان انا كمان اخده عشان محتاجااااه
( وش عامل مش واخد باله )
ايه ده انتي لحقتي تيجي امتي
ReplyDeleteده انا يدوبك كتبت التعليق
هو انا قلت كل اللي عايزاه التعليق اللي فات بس ده تعليق كده فوق البيعة
انا قلت اخليني تالت ورابع تعليق غلاسة يعني
ههههههههههه
فنانه من يومك
ReplyDeleteبس طبعا انا بصور احسن منك
انا عجبتنى الصورة السادسه و الاخيره
وبخصوص الساعه 7الا ربع انا كمان خت الخطوه ديه
اما باه بالنسبه للمصرى اليوم فاربنا يشفى فعلا انا برده كنت ماشيه فاشفت الجرنان و شدينى الاسم و ربنا يشفى
حاسس انه نوعية دراستك جميلة جدا
ReplyDeleteهو الجامع اللي في البوست ده السلطان حسن؟
أصل المساجد التلاتة الغوري والأشرف وبرقوق دول مدخلتهومش من جوا، تقريبا فيه منهم لسه بيترمم
ما شاء الله
ReplyDeleteفن رائع يا أسماء وفعلا اتقوا الله ويعلمكم الله
ربنا يرزقنا التقوى والإخلاص ويعلمنا من فضله
تصويرك جميل يا أسماء
وربنا يعينك ويثبتك على الخطوة الجديدة
وأشوفك النهاردة ونكمل كلام
بالنسبة للمصرى اليوم
ReplyDeleteاحنا اللى أعطيناهم الفرصة بالنقد العلنى على المدونات
جميلة التدوينة
ReplyDeleteوصورك ما شاء الله جميلة
التصوير فن جميل جدا كان نفسي أتعلمه .. وهاتعلمه بإذن الله
ربنا يباركلك أخت أسماء
مرواية
ReplyDeleteاللى لسه متكلمة معاها اول مرة على الناسنجر من شوية
الاول اتبسطت انى كلمتك يا أستاذة
ثانيا..بشترك معاكى فى حب الخط العربى
وعلى فكرة فى حاجة بخصوص كده ممكن لما نتكلم أقولك عليها..يعنى تجربة ممكن نعملها سوا بخصوص موضوع الخط العربى ده
استفادتنا منها فعلا زى منتى قلتى بتكون أوسع من كونها مجرد هواية..
نرجع فى الاتفاق ايه يا بنت
عييييييييييب
ان شاء الله مش هرجع
ده انا لسه بادية
دعواتك
وشفتى ولا حد قال حاجة فى موضوع موقع رفع الصوت..
مبقاش لينا كلمة خلاص
:1
-------
ان الأوان
ربنا يكرمك يا بنتى والله مشجعة
:1
اما بالنسبة للخطوة فكويس انك خدتيها وشدى حيلك كده..انا كمان بحب السادسة والاخييرة جدا لانهم فيهم زوايا ضوئية بس بحب الباقيين بردو
:1
:1
Abdou Basha
ReplyDeleteهيه المادة دى فعلا جميلة بس عاوزة اهتمام عشان تخرجى منها بتراث كامل اكتر منه طرز فنية وبس
لا ده مش السلطان حسن
مش عارفة تقصد انهى صورة فيهم
بس هيه واحد من التلاتة(الغورى-الاشرف-برقوق)
اه فيهم ترميميات شغالة فعلا بس فى اجزاء منهم
----
سناء
ربنا يتقبل دعائك
كويس ان الصور عجبتك
اما عن الخطة الجديدة
فالبداية الى الان الحمد لله موفقة وتمام
:1
اما عن المصرى اليوم
فكلمة النقد اللى انتى بتقوليها دى معناها واسع
يعنى فيه اللى بينفع وفيه اللى فى رايى ملوش نفع
وحتى لو كان اصدك على اللى ملوش نفع
فده يخليهم صحيح احيانا يزودوها
بس مش لدرجة مكتب ارشاد مواز
مش عارفة حساها عيالى أوى
---------
أخ وضاح
جزاكم الله خيرا
حاول ان تتعلمه فعلا
بس الممارسة الكتير بتساعد جدا
انا هركز ان شاء الله
ReplyDeleteالساعة 7 الا ربع
وهحاول ابدأ أنا كمان
غالبا الساعة دي لها
بركات معينة
انا علي فكرة مش بتريق
بس فعلا قريت الكلام دا وحسيته جدا
فعلا لما الانسان بيبدأ بيفضل فاكر اللحظة والدقيقة والظروف المحيطة
ربنا يثبتك علي الحق ويفرج همك
أدعوك للمشاركة في الحملة ضد جريدة المصري اليوم
ReplyDeleteزوروا مدونة مظلومين للتعرف على الحملة وأسبابها وأهدافها
كن إيجابيًا وشارك وقل
لا للكذب والتلفيق
مالك مصطفى
سبعة الا ربع بتاعتي مش مطوعاني ياسمسمة ومش راضية تستهدى بالله وتيجي :)
ReplyDeleteالصور جمية جدا يااسماء
علميني فن التصوير وانا اعلمك السواقة ماشي؟:D
إحم إحم... العفو يا أسماء على إيه يعنى
ReplyDeleteلاشكر على واجب يا بنتى وبعدين دى رسالتى مع المبتدئين
بس هو أنا مقنعة أوى كده
د.مصطفى
ReplyDeleteطيب كويس ان حضرتك هتعمل بداية جديدة
هو الى الان الوضع كويس بس يارب يستمر
ان شاء الله هيستمر
وافضل فاكرة البداية دى علطول
-----------
سمسمية
يا سمسمة يا بنتى 7 الا ربع مبتجلناش لوحدها
اسالينى انا
فضلت مستنياها كتير
دى لازم احنا اللى نروح نجيبها
حيث كانت
ونفضل وراها لغاية ما تيجى
وده بيكون بفضل الله
عشان كده ادعى كتير
اما بالنسبة للسواقة والتصوير فموافقة جداا بس الوقت يتظبط واشوفك الاول وبعدين نتعلم يا ستى
:1
---------------
فزلوكة
لا يا بنتى
وجب الشكر على النصيحة بردو
الاخبار الصحفية والصحافةبينهم فرق
ميلقطوش غير المتخصصين زى حضرتك
:1
دى رسالتك مع المبتدئين
طب لما اشوفك يا متعمقة
:1
مجموعة صور رائعة الصور شدتني جدا
ReplyDeleteفكرتن بحي عندنا بروح اقعد فيه لا الواحد يحس الخنقة
تصدقي لما تقعدي فيه تشعرين بانك في زمن الحملة الفرنسية
الناس كما هي حتي اسلوبهم في اللبس والحديث وخلاقة
تقبلي التحية