يا أهلنا في غزة .. نحن معكم

Sunday, February 25, 2007

وكان يوماً لا ينسى


كان يوم ميتنسيش فعلا..
امبارح السبت 24/2
امبارح كان جلسة المحكمة الخاصة بموضوع التحفظ على أموال 29 من الاخوان المسلمين..

كان يوم مليئ بالأحداث والمشاعر والناس.. فى مدونة" انسى"www.ensaa.blogspot.com
ربنا يكرمهم تناولوا الموضوع وتابعوه بشكل مفصل ورائع جزاهم الله خيرا وكمان" سالى مشالى " و"روضة" وكل الفريق ربنا يباركلها ويعينها ..الأيامدى الضغط عليهم كبير بس هما ان شاء الله أدها وادود..

عشان كده مكنتش عاوزة اكرر الكلام لكن عاوزة اتناوله بصورة تانية فى شكل لمحات سريعة اثرت فيه جدا ومواقف حصلت وشخصيات عرفتها وحاجات تانية ..هنبدأ بالترتيب..

كاميرات..كاميرات..كاميرات
كانت اول احداث اليوم انه عند وصولنا للمنطقة بتاعت المحكمة فى التجمع الخامس وكان وصولنا مبكراً..وبدأ الناس تتوافد وتزيد ومن ضمنهم شباب كان معاهم لافتات كثيرة وبعض الاطفال يحملونها أيضاً..

أخذت أنا وأمى لافتات لنحملها وكانت أول مشكلة ان اللافتات عبارة عن رسائل منا لأبائنا مثل ابى أنت حر وراء السدود وما الى ذلك فلما خدنا بالنا وجدت ان والدتى تحمل لوحة: أبى..متى ستعود

وكان المنظر مضحك جدااااااا وفضلت فاكراه لغاية لما ركزنا فى اللوحات بعد كده..

اما لوحتى فكان ما فيها من اجمل الكلمات وبها مشاعر مستنى جدا وشعرت بها وكان مكتوب فيها:

ابى..ان كنت سجيناً فى اعينهم
فأنت الحر فى عينى

المهم مسكنا اللافتات من هنا..وبدأ القلق..كاميرات..كاميرات..كاميرات..هوه شعور مختلط ..تختلط فيه العزة لان الموقف مشرف لأى حد مع الاحراج من التصوير فى حد ذاته..وانك تتخيل انك ممكن تلاقى صورتك فى جريدة أو فى التليفزيون .. بس خير عدت الحمد لله...

بعتة كويسة

أثناء انتظارنا للسيارات التى تنقل ابى واخوانه من مزرعة طرة وإلى التجمع الخامس..قابلنا بعض الناس ومر الوقت حتى ظهر ذلك الكائن الازرق المسمى بعربة الترحيلات تأتى من بعيد..

جت من هنا.. ومتلاقيش حد جمبك ..الكل نفسه يلحقهم ويشوفهم اثناء نزولهم منها..كل الناس تسرع وتحاول تجد لنفسها مكان على السور حتى تراهم..وفى وسط كل ده وبعد متأهبنا لهذا الأكشن الحادث ظهر صوت من بعيد يعلن الخبر الهام:

ده الجاسوس يا جماعة

واحنا ولا هنا لغاية لما خدنا بالنا كلنا وعرفنا اننا اتبعتنا بعتة كويسة..

لا والاكثر بعد دخولنا قاعة المحاكمة ..فتح القفص من الداخل استعدادا لدخول الاخوة وفعلا بدا الاشخاص فى الدخول ولكنهم غير واضحين فى القفص بسبب شباكه السوداء الضيقة..وبدأ الاخوة فى الهتاف بكل ما أوتوا من قوة.. ووسط الهتاف لم نجد أى تجاوب مع من فى الداخل..لنعلم بعد التدقيق والتمحيص أنهم مجموعة من الجنائيين دخلوا قفص قاعة غلط وعلى أعينهم نظرة: "أنتم مين"..وتحسبنوا على مين..طب احنا فين..كانوا مخضوضين خالص..
من ساعتها وقلنا لازم نركز..مينفعش كده يا جماعة..بيتضحك علينا كل شوية..

نجوم تظهر

طبعاً اليوم كان له نجوم كبار جدااااا ظهروا ولمعوا ودخلوا القلوب..

نبدا بالمنشد الكبير جدا جدا جدا " معاز أحمد شوشة " الذى لم يترك أحدا منا دون أن يلمس قلبه وهو ينشد "ابى أنت حر وراء السدود "
أبى ستزول جراح السنين
بفجر سيشرق ولو بعد حين
مش بس صوته رائع لكن لانه صادق فالنشيد بصوته له اثر خاص..فجزاه الله خيراً ومستنيين شريط لازم..

والنجمة الثانية عائشة حسن مالك والقصيدة التى ألقتها..وحركت معها عقول الجميع وقلوبهم وطبعا دموعهم..احساسها عالى جداا ما شاء الله

اما النجم الثالث فهو " حسن خيرت الشاطر " وقد ألقى قصيدة " قال الكل كلمته "..كان يقولها بمشاعر صادقة أدامها الله له لذلك وصلت إلينا بنفس الصدق..

جزاهم الله جميعا خيرا ولا ننسى طبعا ( سارة وأنس وسلمان وحبيبة)أيمن عبد الغنى وجميع الاطفال اللى كانوا موجودين فردا فردا..والتيشيرتات المطبوع عليها الصور كانت جميلة..وخلونى أتخيل أيام الطفولة وان لو أبى اعتقل من كام سنة كان ممكن الواحد يعمل حاجات جامدة بردوJ

مصر يا أم

هزتنى هذه الجملة فى الهتاف

مصر يا أم
ولادك اهم
دول علشانك شالوا الهم

جددت بداخلى معانى كثيرة اهمها ان هذه بلادنا..حبيبتنا الغالية..أما كل من ظلم فهو الغريب عليها وعلى طبيعتها السمحة..
وأثر فى أيضا الشباب والفتيات وهم يهتفون بروح تنم عن حب عميق لها..يهتفون بصدق وليس هتافا ظاهريا ..


عمر الظلم ما قوم دولة
عندما بدأ المهندس "خيرت الشاطر" فى الحديث..كان حديثه من اكثر ما اثر فى نفسى وفينا جميعاً..

واخذ يهتف... قولوا يا ناس لرأس الدولة
عمر الظلم ما قوم دولة

قولوا يا ناس لرأس الدولة
عمر الظلم ما قوم دولة

واخذ يكررها ..كان يقولها بكل ما اوتى من عزم.. يشعر بها بكل حواسه ومشاعره..يرى امامه اياماً من الكفاح يريد الظالم أن يمحو أثرها ويضيعها..

الجميع لاحظ انفعاله وقلتها فى نفسى " هون عليك يا أبى "
اخذ يدعو ويدعو ويدعو ودعوة المظلوم ليس بينها وبين الله حجاب..
أرادهم أن يعرفوا ان الظلم لطالما كان وعظم شأنه ولطالما انتهى وفني اصحابه ولا يذكرهم الزمان الا بشر ما يذكر...



وجدتك أبى

طوال الجلسة وأثناء هتافنا أو سماعنا للمرافعة كنت أبحث بعينى فى القفص بحثاً عنه..قال لى انه غالبا مع الزحام يكون فى الخلف.. ولكنى قلت ربما أراه.. وأخذت اقلب بصرى حتى جاءت اللحظةالتىانتظرتها ..والتقت أعيننا
ياااااااااه كانت لحظة جميلة
وجدتك اخيرا يا أبى
أخذت احرك يدى ويلوح لى واشار لى أن أتى..وكان الوصول للقفص مسألة صعبة فى وسط الزحام حتى وصلت الحمد لله..وسلمنا وتكلمنا قليلا وأشرت له أن أمى هنا ولكن يحول بينها وبين القفص هذا الزحام الشديد..وسلمت على بعض الأخوة..وكان وقتاً رائعاً بفضل الله ورحمته

وجوه جديدة ولكنها قريبة

من اجمل ما فى الجلسة التعارف..فهناك الكثير تعرفه اسماً دون ان تراه قبل ذلك..وبمجرد أن تراه تشعر انه قريبا جدا جدا جدا من قلبك.. وبدام اتكلمنا عليهم يبقى استغل الفرصة عشان أقولهم جميعا بجد بجد يا جماعة (مش محظورة) بتبسط كل مبعرفكم اكتر
بداية من هاجر وهند شوشة ..واسراء وجهاد ضياء اللى حبتهم جدا وخديجة حسن مالك ربنا يكرمها فعالة ونشعر دائما بوجودها..ومريم خيرت وأمانى محمود المرسى ربنا يعينها على الثانوية العامة وبنات عمو عبدالرحمن سعودى ..وكل الناس اللى كتبتهم او لأ وعرفتهم أو لسه..كلهم من النعم الكبيرة التى انعم الله بها على..

**وبعتذر لكم عن القفزات اللغوية السريعة بين العامية والعربية..

** بقية الصور هتتحمل بس لاحقا ان شاء الله..ادعولى الكمبيوتر ربنا يشفيه ويعافيه اصله تعبان جدا

** الجلسة كانت مليئة بالمواقف والاحاسيس والناس ولكن حاولت ان أخبركم بالحاجات اللى أثرت فيه كثيرا وجوانب انسانية اكثر منها اى شيئ أخر و اكتب لكم عن لحظات اراها وقد حفرت بداخلى وتركت بصماتها التى لا تنسى....



23 comments:

AbdElRaHmaN Ayyash said...

يوما !!!
ليس يوما وانما ملحمة
قلت أن ذلك اليوم لن ينسى
ولكني اقول ان تلك الملحمة سيسطرها التاريخ في أنقى كتبه
كتاب الحرية .. والإسلام
الكلام رائع ومش هعرف اعلق عليه مفند
لكن واضح فعلا انه كان يوم أروع من الرائع
أحييكي فعلا باشمهندسة
وان شاء الله ربنا يفرج عن اخواننا وآباءنا كلهم
بس أكتر حاجه نفسي اشوفها متسجلة هي كلمة حسن ومعاذ وعائشة
يااااااااااه لو تعرفوا تجيبوها فيديو
عموما .. ألف تحيه لاخواننا المعتقلين
ولكم منا ولكل أهلنا سلام

سناالإسلام said...

(إن الله أشترى من المؤمنين أموالهم وأنفسهم بأن لهم الجنة)فهينأ لكم البيع وهينأ لكم الثمن ...بصدق هينأ لكم

محمود سعيد said...

والله انا شوفت الفيديوهات بتاعة المحكمة

إحنا بنعمل حاجات غربية فى أحلك الظروف

الإخوة بيحبوا الهيصة والناس عمالة تنشد وتلقى كلمات وأعلام ولافتات واناشيد و كاميرات وكل حاجة

انا حاسس ان الناس ديه مش رايحة محكمة
ديه رايحة فرح

فرح الحرية اللى جاية

لو شفت الصور بتاعة المعتقلين
كلهم مبسوطين بيضحكوا
حتى السجانة مبسوطين لهم

متعرفش ازاى انت بتبقى مبسوط فى حاجة زى ديه

الـفجـريـــة said...

سلام عليكم,,

صدقت أخى عبدالرحمن هى كانت ملحمة..على فكرة فيديوهات المحاكمة كلها نازلة على اخوان اون لاين وفيها كلمات معاز و عائشة وحسن وكل حاجة وكمان فى أجزاء على انسى..

سنا الاسلام..هنيئا لى ان لى اخت مثلك..وحشتونى.سلمى عليكم جميعا

أخى محمود سعيد..كلامك صح فعلا..الجو بيكون مختلف جدا..أصل لما بتشوفهم داخل القفص سعداء ومتفاءلين بتنتقل لك هذه المشاعر مباشرة وللجميع..

اروي الطويل said...

ربنا يكون فى عونهم يارب
يالهوى الواحد عيط والله لما شاف معاذ اشمعنى هو ماعرفش بس هو كده

Aml Ghonaim said...

حبيبتى ...
هذا هو الايمان حين تخالط بشاشته القلوب ...
فلا تعجبى بل انتظرى القادم ...
والغد سيكون أكثر اشراقا ...
وأكثر نقاءا وحــــــــــــرية ...
تلك التى نفتقدها كثيرااا
لا تفتقدى أباك فهو هناك يدفع ضريبة ( لا اله الا الله )
بل يحق لنا نحن أن نفتقد أنفسنا فى ذلك العالم الذى كساه الضباب ...
الى آبائك وآباؤنا أيضا ملايين التحايا وأقول لهم : شكــــــــــرا ؛ أن جعلتمونا نرى رأى العين من أمة محمد _ صلى الله عليه وسلم _ من يضطهد لأجل رسالته ..
وأشكرك أكثر أن نقلتى لنا تلك الأحاسيس ..
فرج الله عنكم وعن المسلمين ...
_________
الحبيبة سنا ... الآية _ ان قصدتى ذكرها هى ( ان الله اشترى من المؤمنين أنفسهم وأموالهم )

None said...

ادخل عندى ضرورى جدا وانصر الطلبه المفصولينhttps://www.fnangeology.blogspot.com/

وسلااااام

mohamed elbanna said...

ربنا معاكى يا اسماء وان شاء الله ازمة وتعدى المهم حاولى تستفيدى بأجمل ما فى تلك الأزمة مشاعرك مع والدك وحبك ليه وارتباطك بيه
مش هيبقى كلام فلسفى لو قلتلك ان ده ممكن يكون اجمل ما فى الأزمة
لو تحبى اقولك مشاعر والدك ممكن
بيموت فيكى ونفسه يحضنك ويضمك ليه ويفضل قاعد جنبك يبصك وانتى بتتكلمى وزمانه دلوقتى بيفتكر كل مواقفك معاه وبيبتسم لما يفتكرها
معلش اصى انا مجرب
ابوكى من الناس اللى انا بحبهم جدا
قابلته مرتين بس
مرة زرته فى البيت من يجيى 7 سنين قبل ما اسيب الاخوان واتكلمت معاه كتير وكان اد ايه واسع العقل والقلب ومنظم التفكير
ومرة تانية هو زارنى فى السجن لما اعتقلونى فى 2002 - غالبا اعتقلونى عن طريق الخطأ تشابه اسماء- وزارنى على اعتبار ان انا عضو نقابة التجاريين وهو كان فى مجلس النقابة
انا بحترمة وبحبة جدا
وياريت توصليله سلامى ومحبتى وتقديرى
وكنت شاكر جدا ليه تلك الزيارة

Anonymous said...

لو كل المراسلين تميزوا بهذا الصدق والاحساس والاخلاص كانت الامور تغيرت من بدري. لست أدري من الذي اخترع مسالة حياد المراسلين عند نقل اخبار مايحدث بين الجزار والضحية. مع تحياتي لمنى الشاذلي ومعتز ومي والاداء الاعلامي الخالي من الموقف.
عم الشباب

أبو نضال said...

رغم أنى لم أحضر للأسف و لكن شاهدت مقاطع الفيديو و تأثرت كثيرا، اللهم فك أسر إخواننا المعتقلين و أنزل عليهم و أهلهم الصبر و الرضا و كن معهم و كن له أنيسا يا رب العالمين اللهم آمين

الـفجـريـــة said...

سلام عليكم,,

أمل..جزاك الله خيرا بجد بقيت بتبسط لما ألاقيكى معلقة على الموضوع..اتعودت خلاص..
بشاركك فى قول شكرا لهم .. وليس الشكر على نقل الأحاسيس ولكن هو لكم لاستقبال تلك المشاعر..

أستاذ محمد البنا..جزاكم الله خيراجدا على التعليق..على فكرة المشاعر دى فعلا اجمل فى الازمة .. بعد أفتكر مواقف كتير وهوه أبى ربنا يكرمه أثر في ومازال بمواقف وذكريات مش بنساها وبالذات موضوع الاستيعاب وسعة الأفق ده وأمام عينى طوال الوقت..جزاه الله هنى خيرا
هوصل السلام لبابا ان شاء الله

عم الشباب..أشاركك التحية بس على فكرة الوقت اللى احنا فيه أصبح فيه الاعلام الخالى من الموقف شيئ متميز أمام اعلام يسير فى اتجاه واحد لدرجة انه هو نفسه لا يصدق ما يقول

أبو نضال..أشارككم الدعاء..ربنا يتقبل

zahra said...

ربنا يثبتهم يارب ويجعل البسمة دائما على شفاههم فهى اسمى رمز لنصر ويثبت كل اسرة بها احد معتقل وربنا يستر غدا فى الحكم (قل لن يصيبنا الا ما كتب الله لنا) ربنا يوفقكك يا اسمؤة وجزاكى الله خيرا على توضيح الموقف بهذةالصورة فقد شعرت اننى كنت واقفة وسط الزحام فجزاكى تااه خيرا على اشعارنا بكم الا اننى شعرت اننى بين انفاسكم

Anonymous said...

السلام عليكم
انا نيرة عصام عبد المحسن
ازيك يا اسماء
مبروك على المدونة الجميلة وان شاء الله تؤتى ثمارها المرجوة
وبالنسبة للمحكمة فوالله الواحد كان عايز يبقى معاكو بس الحمد لله ابى مش معاهم الحمد لله ولما اتفرجت على الفيديو ماشاء الله على الحماس والهتافات اللى تقشعر لها الابدان من كتر ماحساها فعلا والله
وان شاء الله ينصركم غدا فى المحكمة ونراكى فى ارقب وقت
وجزاك الله خيرا

أحمد سعيد بسيوني said...

بسم الله
قال رسول الله صلى الله عليه وسلم : يبتلى الناس على قدر دينهم ، فمن قوي دينه اشتد بلاءه
او كما قال علية الصلاة والسلام

وبعدين هو ده مواصفات طريق الدعوة صعب وطويل ومليء بالمشاقات والمتاعب

صبركم الله ، ونسال الله العظيم ان يفرج عنه ويعيده الى اهلة سالما معافي منتصرا على الظلم والظالمين

ممكن نتشوف وقائع المحاكمة بالصوت والصورة على اللينك ده
www.ana-elbahr.blogspot.com
منقول طبعا من موقع الاخوان

تحياتي
البحر

Anonymous said...

السلام عليكم
ازيك ياأسماء
في الأول حابة اقولك اني بحبك في الله جدا من غير ما اشوفك او اعرفك معرفة وثيقة على ارض الواقع
وحبيت اقولك كمان انه دولة الظلم ساعة ودولة الحق الى قيام الساعة
واذا كانوا بيحاربونا حتى في لقمة العيش فربنا أكبر ورزقه اوسع ومش في ايدهم يمنعوا عنا رزق ربنا مهما عملوا او قالوا
ولا ألف محاكمة عسكرية هاتحنينا وتخلينا نتخلى عن الفكرة والدعوة
وألف تحية ليكي ولكل ولاد المعتقلين الشرفاء
واقولك كلمة كان والدي دايما يقولهالي الله يرحمه لما كنت اروح ازوره في ملحق طرة ايام اعتقاله
ده وسام على صدرك يابنتي اوعي في يوم تخجلي منه ..امشي وراسك مرفوعة فوق وقولي لزمايلك كلهم والدي من شرفه اعتقلوه:)

اختك في الله
اخوانجية

Anonymous said...

بصراحة يا أسماء أنا مش عارفة ابتدي إزاي لكن أنا ممكن أيضا أقول بعض المشاعر الني خالطت قلبي
أولا : الإحساس بالظلم وحش أوييييييييي
ثانيت : إني بحب الإخوان أوييييييييييييي
ثالثا : أني بحب أبي جدا ، وكمان كل أباء أخواتي فعلا
رابعا: لمست صدقا في المشاعر ألهب مشاعري لدرجة البكاء
خامسا: عزة من هنا للسنة اللي جاية
سادسا: استبشرت جدا بمعاذ
ولن يسعني إلا أن أقول:
إن المظالم للإخوان دوافع
و طلائع التحرير تصنعها المحن
و النصر يضمنه الجهاد لأمة
رضيت لنيل حقوقها دفع الثمن

أكيد هتعرفيني
(سلمى (حلي

الـفجـريـــة said...

سلام عليكم,,

ازيك يا زهرة يا جميلة ..كويس انك حسيتى انك واقفة معانا هناك..المرة الجاية نكمل رحلة الكلية وتيجى بجد ان شاء الله

نيرة..نورتينا يا بنتى..وافتقدك كثيرا يوميها بس افتقاد و سعادة فى نفس الوقت ان عمو مش معاهم..


اخى البحر,,
ربنا يتقبل دعائك..وهدخل على المدونة أشوف ان شاء الله..مع ان فى مشكلة دائمة ان اى فيديو موجود على بلوج مش بيشتغل عندى خالص ..لو فى حل قولوا ياريت


اخوانجية..أولا الاسم فكرنى بحقبة الستينات والسبعينيات ..أحبك الله الذى احببتنى فيه يا حببيبتى..كلامك وصل ..ربنا يرحم والدك ويلحقنا به فى زمرة الصالحين

عرفتك يا أستاذة سلمى
الابيات جميلة
مسمعتهاش قبل كده
بس لو كانت من تاليفك..هيبقى لينا كلام

Anonymous said...

أولاأحب أحيكى ,اشكرك وأقولك أنك أنتى مش لوحدك ,ان الظلمة سوف يقتص منهم الديان الذى لا تضيع عنده الودائع و أريدك يا أختى أن تنظرى الى نصف الكوب الممتلئ فالحشود التى كانت وقت المحاكمة وظهورها عللى شاشات جميع الفضائيات توئلب الحشود ضد ذلك النظام الظالم و ثانيا انتم تعرفون أماكن أعتقالهم بعكس الكثير من المعتقلين "أهلهم بيلفوا ويعمولوا أتصالتهم ليعرفوا فقط أين أعتقلوا و ثانيا أنا كنت أنشئت مدونة و لكن مش عارفة أكتب فيها حاجة كل ما أكتب يكتبلى post وميظهرش الى أنا كتبته فأرجو منك أن تعلمينى كيف أكتب فيها مثلك وتظهر المقالات على الشاشة امامى عندما أقوم بفتحها ولكى الثواب أن شاء الله وجزاكم الله خيرا

Anonymous said...

وأحب أضيف شئ أنا كتبت الرسالة بناء على تجربة شخصية فلقد قام زوار الفجر بأعتقال أخى الأكبر لمدة 10 أيام بعد أنتخبات مجلس الشعب الأخيرة وشكرا لكى مرة أخرى

Anonymous said...

وكمان أزاى أعدل فى البروفايل بتاعى بدون لأن كل ما أعدله واملا صفحة البروفايل بتاعى يقولى أستنى و افضل أنا بأه مستنية فهل أستناه لغاية الأخر و هو بيقعد فترة طويلة ولا فى طريقة تانية و أعذرينى لجهلى وشكرا

Anonymous said...

وأرجو الرد فى أقرب فرصة على المدونة حتى تعم الفائدة وجزاكم الله خيرا وأعذرينى "لرغيي والسلام عليكم

Anonymous said...

سلام عليكم,,


أختى الحبيبة التى لا أعرفها..جزاكى الله عنى خيرا لبث هذه الروح فاحنا فعلا أفضل من غيرنا كثييير زى مقلتى يكفى معرفة اماكنهم والاطمئنان عليهم وتيسير الأمور الحمد لله وحاجات كتير تانية بفضل الله..فربنا سبحانه وتعالى يهيئ لنا الظروف ومعها الثبات واللطف والرحمة..

ثانيا موضوع المدونة.. دى لينك فيها شرح تفصيلى لانشاء المدونة والعمل فيها ومستنيين مدونتك بفارغ الصبر وياريت تحطى عنوانها

اللينك هوه

http://bmadvice.blogspot.com/

Anonymous said...

جزاكم الله خيرا أختى الحبيبة وأخوتك شئ أتشرف به فعلا فأنا أبنة وحيدة وليست لى أخوة سوى ثلاث شباب و أن شاء الله أضع أسم المدونة لاحقا أختك فى الله تسنيم