يا أهلنا في غزة .. نحن معكم

Sunday, October 26, 2008

مـســــاحة أوســــــــــــــــــــع


سلام عليكم.. من ساعة مكتبت رسالتى لداود _اللى الحمد لله لبى النداء وجاء للدنيا من حداشر يوم بالضبط _وانا بمر هنا من وقت لأخر من غير منزل حاجة تانية مع ان فى حاجات كتير جدا نفسى ومحتاجة اتكلم عنها..حاجات فى اتجاهات كتير من الدراسة وما فيها ورغبتى فى اشراككم معى فى ابداعاتى:) الجامدة _ده على اساس انى ببدع_فى كذا مادة عندى..لذكرياتى كواحدة يقال انها فى سنة رابعة وقاربت على التخرج ان شاء الله وبتبص على خمس سنين كلية _او اربعة حتى الان_عدوا بسرعة جدا بكل ما فيهم وتركوا فى اثر لا يمكن نسيانه ابدا وعرفت فيهم ناس لا يمكن نسيانهم هما كمان وما يصاحب ده من نظرة لحياة ما بعد التخرج بكل ما فيها هى الأخرى..حكايات تانية على طريق جيزة..جامعة..جيزة....قصاقيص بلاقيها من وقت للتانى وبستغرب اوى لما بفتكر الوقت اللى اتكتبت فيه..وكلام تانى كتيييير له علاقة بحاجات بتحصل حوالينا وبنقابلها فى كل دايرة احنا متواجدين فيها ومن ضمنها الدعوة..نجاحات واحباطات..ولما بسأل نفسى طيب طالما كل ده عاوزة تكتبى عنه إمال مبتكتبيش ليه؟؟؟

لقيت ان فيه اسباب مختلفة لكن على رأسها سبب اظنه هو اكتر واحد بيقدينى..هو انى فى معظم الاحيان لما باجى ادون بفضل انتظر كل حاجة تكتمل فى ذهنى..او استنى لغاية ماحس انها _من وجهة نظرى_تستاهل تنزل وتتقرى..ده ممكن يكون مفيد فى بعض الموضوعات..لكن فى اغلب الحاجات اليومية والبسيطة _وان كان معناها عميق _واللى بحس انها اصلا اساس التدوين مش شرط نقيد نفسنا بكل اللى بفكر فيه ده..مش عارفة المعنى واصل ولا لا..لكنى قررت انى ابعد عنى القيد ده وأدى لنفسى حرية اكتر فى تدوين ما يطرأ على ذهنى او اقابله ولو كان مقولة اعجبتنى لا تتجاوز سطرا واحدا..نشيد صغير فيه معنى جميل..خاطرة سريعة جاتلى وخايفة تروح ولا حاجة : ) وهكذا..مساحة أوسع تستوعب كل ما اريد ان يكون هنا وهو كثير..


ممكن يكون فى حد دلوقتى بيقول وايه لزمة الكلام ده..وله اقول انى وان كنت مهتمة طبعا ان كل قارئ/ة يشوفه ويفهم التغيير اللى نفسى اعمله الا ان سبب كتابتى الأول للكلام ده هو لى شخصيا اولا..عشان افكر نفسى بيه كل شوية..كل ملاقينى بضيق على نفسى مساحة الحركة وبفكر فى الحاجة اكتر من اللازم وبضيع فرص كتير لمناقشة حاجات كتير هنا بدافع ان دى محتاجة تكمل..ودى عايزة افكر فيها شوية..ودى كتبتها من زمان فخلاص مش هنزلها دلوقتى..ودى صورة محتاجة كلام..ودى..ودى..ودى..كل ملاقى نفسى بعمل كده..افتكر انى قررت أعطى لنفسى ولكل من يهتم بالمرور هنا مساحة اوسع ..وأتمنى تكون خطوة للأفضل..دعواتكم




10 comments:

None said...

وانا كذلك ايضا

م/ الحسيني لزومي said...

شارك في الحملة الشعبية للقيد بالجداول الانتخابية

اسماء العريــان said...

منتظرين يا فندم :):)

الـفجـريـــة said...

fnan_geology

جزاكم الله خيرا على التعليق
وموفق ان شاء الله


----

سمسمة

ماشى يا ستى
ان شاء الله مش هيطول الانتظار

Anonymous said...

ذكرتني بمدونتي

و حزنت علي حالها و حالي

في انتظار المساحة الاوسع

بس حاسبي توسع منك :)

محمد said...

ربنا يعينك ويوسع عليك
:)
في انتظار توسعاتك

همسة قلم said...

في انتظار المساحة الأوسع ياسمسمة :)

علشان انتي وحشتينا جدا جدا جدا

:)

الـفجـريـــة said...

ان الأونا..مرواية

طب متوسعيها انتى كمان عشان ربنا يوسعها عليكى
:)
اما عن انها توسع منى
فاحتمال بردو

-----

وضاح

جزاكم الله خيرا
وسع الله علينا جميعا

-----

سمسمة

جااى فى الطريق ان شاء الله
وانتى كمان وحشتينى
وبجيب فى سيرتك
:)

Anonymous said...

سمسماية
إنتى
راااااااااااااائعة

أعتقد ان الحل فى نويت الرحيل
التدوينة دى


تلك المساحة "الضيقة " بتلك "العقول" الضيقة,, تسببت فى التأخر كثييرا

دعواتك كتييييير
لم استطع ان امنع نفسى من التعليق
رغم إنى مازلت راحلة D:D:

الـفجـريـــة said...

زهرروءة

ربنا يجبر بخاطرك
:)

سعيدة جدا انك وجدتى الحل او حتى جزء منه هنا
وخلاص باه مفيش رحيل ولا حاجة

مدونتك أولى بيكى يا بنتى
:D
بنا يكرمك يا زهراء ويوفقك لما يحب

بس على فكرة انا اتكلمت عن المساحة الضيقة ومجبتش سيرة العقول
الا لو انتى شايلة من العقول وجاية تفتفضى فدى حاجة تانية
:P:P:P