Wednesday, September 12, 2007

رمضان..احنا نفطر لما نور الشمس يطلع


من رائعة الأستاذ مختار نوح "يعنى إيه كلمة سجين"

يعنى ييجى شهر صومنا
وكرسى بابا...يبقى فاضى ع الفطار
يعنى رغم المغربية
لسه صومنا له أذان
منتظر ييجى النهار
إحنا نفطر...لما نور الشمس يطلع
وقتها هندوق حلاوة...
من ليالى الصمت...والصبر الطوال
وقتها ندعى الدعا...
لما هيروح الظمأ
والعروق تتبل بالماء الزلال
عندنا للصوم معانى
والتلذذ لما اعانى
يعنى اصبر عالمشاعر
واحتمل حمل الجبال
يعنى أسعد باختيارى
وارتدى ثوب الرجال
يعنى ان القلب مش لازم ينام
يعنى ان الفجر ثمنه مش كلام
عندنا للصوم معانى
لما ليل الظلم يشتد فى بيوتنا
يلقى منا بيوت أغانى
لونها أبيض
زى بكره
الصيام له معنى غالى
الصيام له معنى عالى
وخلى كرسى بابا فاضى..وهبقى راضى
ان وقت الفطر لينا
يبقى فى العام الجديد
حتى ليلة القدر..والعيد السعيد
كلهم يستنوا عالباب الحديد
لما وحده ينفتح..أو يوم يزول
لما نور الصبح يطلع
بعد لما تزول يا خوف
لما سور السجن يسقط من الكسوف
لما نلقى
طاقة السجن الحزينة
تنتفض والناس تشوف
وقتها هيكون لصومنا
ألف معنى من معانى الافتخار
وأبقى عارف ان فخرى من صناعتك
وابقى وارث.. رغم إنك لسه حى

16 comments:

أنس الشامي said...

رمضان كريم

كل عام و أنتم بخير

وضـّاح said...

كل عام وأنت بخير

كل عام وآباءنا الكرام بخير

فك الله أسرهم

د.وليد said...

كل عام وكل المسلمين بخير
ويارب يصبر ويثبت المظلومين من المعتقلين وأهليهم ويجعل لهم فرجاً قريباً إنشاءالله

The Last Samurai said...

كل عام و أنتي بخير
اللهم فك أسر كل عبيدك الصالحين
اللهم لا تحرم أي مسلم أو مسلمة من أهله في هذا الشهر الكريم
اللهم انهم عبادك قد شهدوا لك بالوحدانية ... اللهم أرزفهم أجر المجاهدين ومنزلتهم يارب العالمين

اللهم أرزق أهليهم أجر المحتسبين وصبر عبادك المخلصين

اللهم إنا نسألك بكل اسم هو لك سميت به نفسك أو أنزلته في كتابك أو علمته أحدا من خلقك أو استأثرت به في علم الغيب عندك أن ترحم الإخوان يارب العالمين
وخاصة المعتقلين منهم و تجمع شملهم مع أهليهم و أن تعفو عنا و عنهم يارب العالمين ... إنك عفو كريم

اللهم حررنا ممن استعبدنا يا رب العالمين
اللهم حرر بلدنا و أعد أمرها الى أيدي عبادك المؤمنين المخلصين لك الدين يارب العالمين

ربنا دعوناك كما أمرتنا فاستجب لنا كما وعدتنا
اللهم أنت حسبنا فيمن ظلمنا

كل عام و أنتم بخير

other_things said...

والله الواحد بيدعيلكوا
ربنا يفك أسر معتقلينا كلهم
..
ربنا معاكم
..

alqassam said...

ربنا معكم ويفك اسراكم وحسبنا الله ونعم الوكيل
ويجعل كل ما يحدث لكم فى ميزان حسناتكم

وكل عام وانتم بخير

القسام

The Last Samurai said...

أخت فجرية ... حاولي أن تقرأي هذه المدونة

http://wtany.blogspot.com/

و تابعي خطابات سيد قطب لأخته من السجن

أدخلي و لن تندمي

چـِنين .... عيلة و عايزة افهم said...

اسماء ... أبكيتيني

بس

اروي الطويل said...

قريب قوي ياحبي ....ربنا يفك عنكوا يارب يارب
وحشتيني اوي علي فكرة

farag said...

السلام عليكم .. رمضان كريم تقبل الله منا ومنكم

بنت أبيها said...

كل سنة وانتى طيبة

رمضان اتى فهل من مشمر

ومن مستغل لكل افضاله

ودعاء المظلوم مستجاب فى الاوقات العادية

فما بالكم برمضان

أنـــــــــــــــس said...

كلمات تقطر حزنا

علي الاباء المغيبين خلف قبضان السجون بدون اي تهمة او ذنب

الا تهمة لا اله الا الله

و ما أشرفها من تهمة ...

بس ان شاء الله

هيفطروا

و ابوهم هيكون علي كرسيه علي الفطار ...

موجود ان شاء الله

ويقول دعاء الافطار

أميرة محمد محمد محمد said...

كلمات رائعه مبكيه وفي نفس الوقت بتعطي امل

ربنا يباركلك يااسماء ويحرر اسر كل المأسورين ان شاء الله

حور الجنة said...

رااااااائعة جدا

كل سنة و انتى طيبة

ربنا يفك اسر كل المعتقلين

Human said...

فعلا نفطر لما نور الشمس يطلع ...الكلمات فعلا على قدر من الإبداع والبساطة ...كل عام وانتم بخير

الباحث عن الحقيقة said...

بعد لما تزول يا خوف
لما سور السجن يسقط من الكسوف
لما نلقى
طاقة السجن الحزينة
تنتفض والناس تشوف
وقتها هيكون لصومنا
ألف معنى من معانى الافتخار

كل سنة وحضرتك طيبة
الكلمات دى علمتنى استنى رمضان تانى غير رمضان
رمضان الافتخار