Saturday, June 2, 2007

حاجات كتيييير ووقت مستنياااااه



حاجات كتييييييير

نفسى أكتب عنها...

وأفكار كتيييييير بردو

رايحة وجاية فى عقلى

وكل شوية اكتبها فى ورقة واقول بس ييجى الوقت المناسب و تطلع كل الحاجات

منتظرة الوقت ده جداااااا..وبقول امته ييجى

هييجى ان شاء الله

يعنى نفسى اكتب عن..

1- تدوينة نفسى اعملها من زمان..هيه بس توضيح..وبحسها بردو أمانة

توضيح بخصوص المدونة..الفجرية...ملخصه ان بطيبعة الانسان بتتكون اهتمامته وتفكيره من حاجات كتير..حاجات شخصية او تخص عيلته وصحابه وحاجات فى الدراسة وحاجات بتحصل فى بلده ولو ليه انتماء سياسى وفكرى بيشغله بردو ..يعنى لو اخت بيشغلها اللى بيحصل والدعوة والناس والاحداث..يعنى الانسان من جواه شوارع وطرق..فلما جيت ادون كان هوه ده اللى بفكر فيه..بس التدوين يعتبر تفكير بصوت عالى..ويعتبر بردو مساحة اكبر من طرح تأملاتنا والنقاش حولها او صياغتها بشكل جديد..محاولة اننا نعرف نفسنا واللى حوالينا بشكل جديد..ونفكر بشكل اجمل ..ويمكن رأيي ده يبان من اول تدوينة نزلتها طب يعنى ايه المطلوب؟؟

ان كتييير بيكون داخل الفجرية على اساس انها مدونة الحرية لياسر عبده..بيكون داخل ومنتظر دائما اخر اخبار الجلسات والمحاكمات والاخبار وهكذا..ممكن يكون فيه منهم بينزعج انه داخل عشان كده وملأهوش

فاللى عاوزة اوضحه ان طبيعى موضوع ابى يمثل جزء رئيسى واساسى بالنسبة لى بداية من انى انسانة ثم مسلمة ومصرية ثم اخت ثم بنت ابى فالموضوع اكيد واخد جزء كبير من تفكيرى لكن فى جمبه حاجات

ولان الطبيعى ان المدونة تعبر عنى يبقى هتعبر عن الموضوع ده وجمبه بقية الحاجات والتفكيرات وكل حاجة..

هوه انا كده تقريبا كتبت التدوينة كلها من غير ماخد بالى..كويس


2- كان نفسى بردو اكتب عن خواطر جاتلى حول كنوز الابتلاءات وان مفيش ابتلاء بيمر بينا مهما كان صغير الا وبداخله كنوز وهدايا من ربنا سبحانه وتعالى لكن بس بتحتاج مننا عين بتبص بتفاؤل وتدور عليها وهيه هتلاقيها..


3- كان نفسى اكتب عن أستاذنا محمد احمد الراشد..الشخصية اللى كل مبقرالها شيئ جديد..بنبهر بيها اكتر
عارفين لما الروح والفكر يمتزجوا..لما العقل اللى شغال وبيفكر يمتزج مع القلب المتصل بالله..المزيج ده بيخرج ناس زى الراشد..وكلام كتير عنه وعن كتبه مقالاته..ربنا يجازيه عنا خير

4- كان نفسى اكتب عن جلسة المحاكمة العسكرية اللى جاية يوم الاحد ان شاء الله وعن الامتحان بتاع يوم الاحد بردو سبحان الله واللى هيخلينى مكنش موجودة مع انى كان نفسى اكون موجودة عشان اشوف ابائى كلهم واشد من أزرهم ونقف فوق الكراسى و اشاور لابى واقوله عامل ايه..وارفع ايد امى عشان يشوفها..كان نفسى اشوف كل البنات ربنا يكرمهم بس مستبشرة..يمكن لما مروحش ..........الله أعلم


5-ويا سلام لو فيه وقت بردو اكتب فيه عن سعادتى باللى حصل بعد موضوع المصرى اليوم عن المدونين
الموضوع نفسه محتاج كلام
لكن اللى اقصده ما حدث بعدها...عن أسلوب ورد فعل المدونين عليها
الأسلوب الراقى فى التعامل..والمتنوع..والأجمل الفردى
يعنى مش بيان موحد..ده يمكن بيكون مفيد فى امور تانية
لكن ما يخص التدوين بالذات فالاجمل انه يكون كما هو الواقع
كل حد باسلوبه وفكره لكن يظهر اتفاق عام فى الرقى واستخلاص ما يفيد من الموضوع كله
بجد كانت حاجة تفرح مخليانى وانا بكتب دلوقتى نفسى ابطل كتابة واسقف للجميع تسقيفة كبيييرة
وده كل بفضل الله علينا ورحمته ولطفه وتوفيقه..يعنى ده من فضل ربنا ليبلونا أنشكر أم.......

6- كان نفسى اكتب بردو عن طبيعة الانسان التى فطره الله عليها من احتياجه لركن شديد يأوى اليه..لرب كريم واله قادر ورحيم..اذاى واحنا فى قمة احتياجنا لربنا سبحانه وتعالى واستغاثتنا به بنكون اكثر قوة ويقين لان ده جزء من فطرتنا..ازاى لو جت لحظة احساس بالنفس شوية او استغناء بالاسباب عن رب الاسباب ومهما كنا نمتلك من الاسباب دى الا اننا بنكون فى قمة ضعفنا ..


7-كان نفسى اكتب عن فكرة حلوة نفسى كلنا نعملها اسمها كراسة النجوم..وعن بحث كنت بحاول ارتبله عشان ابداه فى الأجازة ان شاء الله فى شكل سلسلة تدوينات يخص موضوع الاراء النقدية واختلاف الأساليب
يعنى مش تناول لنقد فى امر ما
لكنه تناول لوسائل وطرق للنقد ده..تخليه أقرب للناس..ازاى تخلى موضوع همك جدا وليك رؤية فيه مختلفة او معترض على نقاط فيه ..ازاى تحوله من هم خاص ليك كفرد لهم عام كجماعة
ازاى نقدر نكون حياديين وموضوعيين فى طرح افكارنا
وان ده زى مهوه حاجة جميلة المفروض تكون فى شخصيتنا
لكنه فى نفس الوقت بيعطى لنقدنا ده مساحة اكبر من تفكير الطرف الاخر(المعروض عليه النقد) وبيخليه ينظر هو الاخر لما نطرحه بشكل موضوعى ..
ازاى متحملش رايك ما لا يحتمل وتقلل من فرص قبول الناس ليه باستعلاء فى عرضه او بالهجوم على ثوابت فى مضمونه..وفى نفس الوقت متتنازلش او تحاول تقرب بيه تقرب بيه الى ان يفقد هو نفسه مضمونه
ناس كتير بتتريأ لما بقولهم عليه..عشان عارفين انى مبحبش الابحاث ابداااااا..لانها دائما بتفتح منى..يعنى مش بعرف ارتبلها منهج وخطة بحث صح
لكنى ما وصلت ليه انى واضح كده انى عشان اركز فى موضوع واكون ملمة به لازم ارتب نقطه فى دماغى وادور عليه فى حتت كتير..والكتابة بتثبت بردو
يعنى فى الاخر طلع بحث...يلا مش مشكلة..هتأقلم ان شاء الله

لسه مخلصتش الحاجات لكن شكل الوقت خلص..
بس اكيد هييجى الوقت اللى ينقع اكتبهم فيه ان شاء الله
مستنيااااااااااااااااااااااااااااااااااه
الوقت اللى بحلم انى اكون فيه خلصت امتحانات زى البنت اللى فى الصورة اللى فوق
والى ان ياتى لو كان فى العمر بقية
متنسونيش فى دعااااءكم






13 comments:

علاء said...

الله المستعان
دول سبع تدوينات في بعض ما شاء الله

ليا تعليق على اتنين منهم
أولا : لما أقرأ للاستاذ الراشد باحس اني اقرا لانسان يستحضر قربه من الله كل ثانية بل أقل
و بالذات كتاب صناعة الحياة

ثانيا موضوع النقد:
فعلا الموضوع ليس بسهل أبداً فهناك مشكلة تطغى هذه الأيام أن أغلب الإخوة و الإخوات يأخذ النقد على صدره و يكن عصبية و أحيانا حقدا ناحية الناقد
و اعتقد أننا نحتاج لتعلم طريقة النقد الصحيحة
كيف تنقد و لا تترك في نفس المنقود شيئاً سيئاً تجاهك
ربنا يباركلك و يوفقك في امتحاناتك

ياسر سليم said...

السلام عليكم
أولا عايز اعلق على البنت اللى فوق دى ..
دى شكلها مش مخصله امتحانات وبس !
شكلها مش حاسه بالمسؤلية خالص .. وابوها ضربها قلمين على وشها وقالها أمتى هتحسى بقه ..راحت رفعت إيديها لفوق وقالت أنا ما فيش فيا أمل :) ..
ثانبا لما انشاء الله حضرتك تلاقى وقت تكتبى فيهم التدوينات السبعة دول هتلاقى 14 فكرة غيرهم ظهرت عايزين يتكتبوا ..
تحياتى

Anonymous said...

مستنيين يا اسماء تدويناتك بس لبما تخلصى طبعاااا
اما بالنسبة للمحكمة فخيرها فغيرها ( يارب ما يكونش فى غيرها )لانى كمان هيكون عليا امتحان الاتنين صعب جدا فربنا ييسرلهم ان شاء الله
ربنا يوفقنا ويوفقك
نيرة عصام

ساره سعيد said...

السلام عليكم
اخيرا ياسمكه هاكتبلك
ربنا يكرمك ويباركلك في وقتك
وان شاءالله في الاجازه تكتبي تدوينات كتيييييير وجميله كالعاده بس ذاكري دلوقتي
لي تعليق
ان شاء الله يوم الاحد هاتبقي الحكم بتاع عمو واخوانه ربنا يفك اسرهم وانا الحقيقه كان نفسي احضر معاكي لكن لا انا ولا انتي هانحضر ولذا فانا متفاااااااااائله جداااا
بالنسبه لكتابات استاذ الراشد فهي حقا رااااائعه وثريه
ربنا يجعلها في ميزان حسناته
بالنسبه لموضوع النقد وطريقته
فهو موضوع هااااام جدا
بس انا لسه ماعرفتش موضوع البحث
ربنا يكرمك ياسمكه ويوفقك في الامتحان
يااااارب

القادم من الريف said...

السلا م عليكم

ربنا يوفقك
وفعلا موضوعا ت البوست كله كويس خصوصا موقف المدونين من المصر ى اليوم
وربنا يفك اسر كل المعتقلين
تحيا تى

سالى said...

حبيبتى اسماء وحشتينى جدا وبجد مفتقداكى جدا انت وكل دفعتك الجمييييييييلة.وربنا معاكى فى الامتحان وتعرفى تحلى كويس وربنا يفك اسر عمو ياسر قريبازوقولى لسارة سعيد انى فرحت لما شفت اسمها لانها وحشانى .ولى طاب اخير عندك(بصراحة همااتنين)اول واحد.عايزة اقرأ البحث بتاعك لما يخلص ان شاء الله قبل النشر(قصدى قبل ما ينزل على المدونة) والثانى بعدين بقى والطيب احسن.

امام الجيل said...

خير ان شاء الله ويارب يخرج والدك ومتحتاجيش تروحيله تانى ربنا كبير
هما ولا اللذينه مكنوش عايزين يدخلوا اهالى المعتقلين بس دخولهم بعد فترة واخروا المحامين كمان بس عايزين نعرف اخر الاخبار ويا رب تكون خير مع انى عارف انه هيكون تاجيل تقريبا
الله الموفق

الفجرية said...

أخ علاء

كتاب صناعة الحياة فعلا رائع

بس هوه من الكتب اللى حظها معايا سيئ

كل مبدأه تحصل حاجة ميكملش

أخ ياسر

هوه فعلا كل اوقات جديدة
بحاجات وافكار جديدة
بتدوينات جديدة
الله المستعان

نيرة

ردى ده بعد الجلسة والتأجيل
خير ان شاء الله
سلمى على عمو لما تروحى
عشان بقالى فترة مشفتوش

الفجرية said...

سارة سعيد

أخيرا يا سارة

التعليق رضى ينزل

أحمدك يا رب

فرحت جدا بجد جدا يا سارة
اول مشفت سمكة دى

والله وانا بردو قلت يمكن لما منكونش موجودين...الوضع يختلف

:)
وبعدين يا سارة
يلا دونى بأه
وساعتها هنفذ اتفاقنا ان شاء الله

:)

القادم من الريف

جزاكم الله خيرا على المرور والتعليق

سالى حبيبتى

واحنا كمان مفتقدينك انت ودفعتك الجمييييلة بردو
اما بالنسبة لسارة سعيد فهيه فرحت انك فرحت لما شفتى اسمها..شفتى اللفة

اما البحث باه..فتحت امرك يا فندم بس يتعمل الاول ان شاء الله

امام الجيل

هما فعلا غلسوا فى الدخول بس دخلوا جزء منهم على فترات
هوه التاجيل كان هوه المتوقع
لكن احنا مستنيين فرج ربنا سبحانه وتعالى بدون ميعاد..وفى اى وقت

النجمة الصامدة said...

انا دماغي لفت
ايه ده يابنتي
ربنا يديكِ الصحة
ويعينك على تحقيق كلللللللللل اللي نفسك فيه
ياااااااااااااااااارب

إخوانية مصرية said...

يااااااااااااه كل ده ولسه كمان
شكل المذاكرة معاكي ماشاء الله
عارفه بجد وانا كمان نفسي في حجات كتير
نفسي الحب يسود
نفسي الناس تتقبل بعضها
نفسي بلدنا تنظف
نفسي كل معتقل يرجع بيته
نفسي نتعايش مع بعضنا
نفسي بجد نعرف معني الحرية علي حق
نفسي الصحافة الامنية تبطل هدم في الاحلام
يااااااااااااااااه داالواحد نفسه في حجات كتير
ربنا يثبتنا جميعا ويعيننا ويرزقنا الاخلاص
دا بقي بجد الي نفسي فيه جدااااااااا
وشكرا ياقمر علي مدونتك العسل دي
وربنا يوفقك في امتحاناتك

salma abd el _ said...

أسماء يا حبيبتي بجد بجد أني أحبك في الله مع إني لسه شايفكي انهارده معلش مضطرة أعلق بسرعة ربنا يعينك على هذه المدونات و يدينا طولة العمر و الصحة ... ها ها عشان نشوفها و بجد بأه سلامي لعمو ياسر و تحياتي لكل من معه من الشرفاء و سلامي لخالتو و عشان خاطري ادعيللي
أكيد هتعرفيني
سلمى حلي

الفجرية said...

جهاد الصامدة

ربنا يكرمك يا حبيبتى

وانا كمان دماغى لفت بردو

:)

اخوانية مصرية
نفسي الحب يسود
نفسي الناس تتقبل بعضها
نفسي بلدنا تنظف
نفسي كل معتقل يرجع بيته
نفسي نتعايش مع بعضنا
نفسي بجد نعرف معني الحرية علي حق
نفسي الصحافة الامنية تبطل هدم في الاحلام


ربنا ييسرلك الخير ويتحقق كل اللى فى نفسك ونفسى معاكى
وقريبا كمان

سلمى
أحبك الله لاذى احببتنى فيه
بدعيلك يا سلمى
اون شاء الله خير
اما عن التدوينات
فهستنى رايك فيها
لما تنزل بعد زوال الهم ان شاء الله
اللى هوه الامتحانات طبعا