يا أهلنا في غزة .. نحن معكم

Saturday, August 11, 2007

بعيداً عن الكركرة



الذكريات جاية فى الطريق يا جماعة لكن هناك سببين لتأخيرها شوية


أولهما..التدوينة دى من مدونة نجوم الحيرة

مش هتكلم عن المدونة نفسها كتير وعلى عن التدوينة دى والتى مست معانى كثيرة عندى جعلتنى لا رغبة لى فى التدوين وفى أشياء كثيرة


وثانيهما..حدث مهم جدا حصل انهارده

هو طبعا مش مهم عموما

لكن بالنسبة لى مهم جداااااا

انهارده كانت أول حصة لى فى تعليم السواقة

الموضوع طلع كبير وملخبط وبنزين ودبرياج وفرامل وكلهم مع بعض..وخبرتى السابقة فى السواقة كانت صفر..فقلت لازم ادون عن هذه التجربة الخالدة..


المهم بدأ اليوم فى الساعة السابعة استعدادا للحصة فى السابعة والنصف وكمحاولة للحد من تاثير التدوينة السابق ذكرها فقد قررت نزول الحصة بروح مختلفة متطلعة لانجاز جديد وحاجة جميلة هعملها ان شاء الله..


موضوع السواقة ده له اكثر من جانب..جانب يخصنى من حيث انه كويس ان البنى ادم يعرف يسوق..وان اقول وداعا ولو مؤقتا للمواصلات العجيبة..


وجانب يخص من حولى وعلى رأسهم أمى التى أحلم ان اقف تحت البيت وانقلها بين اى مشاوير براحتها ..الى جانب الاخوات واصحابى ودفعتى الجميلة والتى اتخيلهم وهم جوا العربية وبفسحهم او بنجيب حاجة الكلية دون الحاجة لان نحمل ادواتنا_ذات الاحجام العجيبة_بين الميكروباصات والمترو او حتى التاكسيات فى منظر يثير الشفقة والضحك طبعاً..


أما عن الحصة نفسها


فبشكر أولا أ.رشا اللى بتعملنى ..استحملت كثير جدا لأنى عند أى لحظة اشعر فيها بالقلق بسيب الدركسيون والبنزين والدبرياج فجأة تاركة لها الموضوع تخلصه بمعرفتها..اخبرتنى بان مستوايا بالنسبة لاول مرة كويس جدا ..معرفش اذا كان ده بجد..ولا ده طبيعى تقوله لحد بيبدأ أول مرة..مشكلتى الأساسية هى انى لما بدوس بنزين برفع قدمى من على الدبرياج فجاة


فالعربية تعمل ايه


تكركر


ولمن لا يعرف معنى تكركر زى حالالتى قبل الحصة

فهى تعنى ان العربية تتنطط من مكانها وتفصل وأنا اتهزأ لأنى خليتها تكركر

لم أسمع أبى من قبل ذلك او اى حد من اللى بيسوقوا بيتكلم عن العربية لما تكركر..بس واضح ان الموضوع معروف

واحنا اللى مكناش واخدين بالنا


لفيت كذا لفة وحودنا كام حودة وعدنا سالمين والحمد لله..


بس استفدت كذا حاجة من التجربة دى منها استفادة فى صلب الموضوع ومنها استفادة قياساً..اللى فى صلب الموضوع ان كل شيئ فى اوله صعب ومحتاج تدريب وان اللى مش متعودين عليه دلوقتى بعد مرور الوقت بيصبح حاجة بتحصل فى اللاوعى ومتعودين عليها..بس استعانة بالله ونعرف الحاجة ونجتهد شوية وبتعدى كويس..


اما الاستفادة قياسا فى ان معظم الاشياء بيكون فيها التدرج هو الحل الامثل..قياسا على مشكلتى مع الدبرياج..نجد أحيانا ان مشكلتنا مع غيرنا او مع نفسنا ان نطلب دائما منها مستويات عالية دون تدرج..انجازات عظيمة دون محاولات..ثقافة واسعة دون اضطلاع..وندوس جامد ونوقف فجأة ونطلب كتير..ثم نتعجب ونندهش عندما
تكركر


وضعت هدفا لى فى الحصة القادمة هو

نحو عربية اقل كركرة

وان شاء الله يتحقق


هوا المفروض انى اذا سقت ان شاء الله هسوق عربية ابى الى حين خروجه..وحينها ربما نتبادل السواقة..فأقود أحيانا ويجلس ابى وامى مرتاحين شوية..وأحيانا يقود هو

وأعود الى الكنبة اللى ورا والتى افتقدتها كثيرا

ربما استمع لأناشيد

بعيدا عن الانشغال بالطريق

والانشغال بالسيارات والمرايات


والاجمل من ذلك


بعيداً عن الكركرة

27 comments:

challenging_sam said...

بصي بقى ذكريات ... كركرة ... أي حاجة هتكتبيها برده حنعلق ...

انتي قلتي حاجة قوية جدا قد تكون إختراع انا وصلتله و بعد اما وصلتله اكتشفت ان كل الناس عرفاه

التدريج

هو ده سرالنجاح في كل ما نتمنى اتقانه

التدرج محتاج ... "صبر" على التقدم في مستوى الاتقان
و محتاج ... "ايمان" بالوصول الى الغاية النهائية

و أخيرا ... "اخلاص" شديد في المرحلة الحالية من عملية التدرج حتى نحاول ان نقترب الى أقصى درجة من الكمال في اتقان و احتراف هذه المهارة أو الحرفة او حتى العبادة

و أظن أنكي تتلمسي هذا كثيرا في الفن

عموما رغم ان هذا من حقائق الحياة الرئيسية و احدى المهارات الأساسية التي كان لا بد أن نتعلمها باكرا عن طريق التربية و التنشأة وللأسف لم يحدث هذا و اضطررنا أن نتعلمه و نحن في نهاية مرحلة التعلم و قد نطبعنا خلاص

و لكن الحمد لله اننا تعلمناه متأخرا خبر من عدم تعلمه مطلقا

مبروك الرخصة مقدما و بالراحة على إخوانك السائقين المشرحة مش ناقصة قتلى

همسة قلم said...

هههههههه

فكرتيني بنفسي يااسماء اول ما بدأت أتعلم بس انا اخويا كان بيعلمني الحقيقة واخر ما زهق مني قاللى روحي مدرسة تعليم انا مش ناقصك :)

وطلعت الرخصة وبسوق العربية دلوقتي بفضل من الله وكانت كل مشكلتي انى لا بعرف اركن ولا ارجع لورا :)

بس دلوقتي الحمد لله اخويا بيقوللي يجي منك :)

خليها على الله ياسمسمة وشوية شوية هتلاقي الدبرياج بقى سهل خالص والتلات حاجات اللى تحت دول بقوا سهلين خالص

المهم عليكي ليه فسحة لما تطلعي الرخصة ..ها بعد الرخصة علشان العمر مش بعزقة وكده :)

ربنا يعزك ويكرمك ياسمسمة

همسة قلم said...

المهم نسيت اقولك اني برضه كنت ناوية اكتب عن ذكرياتي مع السواقة :)

بس ربنا ييسر

Anonymous said...

لو مخنوقه اوي من المنوال اتعلمي علي اتومتيك بس بعد كدا مش هتسوي الا التومتيك
بس في امريكا لما بيقولوا تمتع برفاهية القيادة بيكونوا اصدهم علي العربيات
المنول
بس عن تجربة المنوال احلي بكتير من الاتومتيك
ومن الاخر محتاجه صبر وممارسه

Anonymous said...

أولا السلام عليكم
ثانيا أنا مبسوطة جدا بالخطوة الإيجابية جدا دي يا أسماء
ربنا يسدد سواقتك
بس الحقيقة السبب الثاني اللي عشانه كتبتلك هوه ادعيللي جدا أنا محتاجة دعااااااااااء
إني أحبك في الله
أكيد هتعرفيني
سلمى حلي

قلب أبيــض said...

السلام عليكم
قرار تعليم السواقة قرار جميل
والركرة بتاع العربية
حاجة معتادة
يارب يوعدك بعربية مبتكركرش خالص

Alaa said...

مبروك تعلم السواقة
بس خلي بالك من المطبات
:)
ربنا يحفظك يارب
و اسف لقلة الزيارة

يلا مش مهم said...

جميل قوي ان الواحد ينقل تفاصيل في حياته ممكن يحس انها مش مفيدة لحد او انها مش هاتقع في اهتمام حد
لكني لاحظت ان الناس لاما تتعامل مع بعض رسمي وبجليدية هتلاقيها بتتكلم في الشان العام او القضايا العامة وكلما زادت مساحة القرب او الارتياح او الارتباط او الرابط الانساني هتلاقي المواضيع بدات تختلف وبدات تنسحب من الشان العان الي الخاص ومن القضايا الهامة العامة الي قضايا الفرد واهتماته وتفاصيل حياته
وهو ده التدوين
والله ينور
بس انا عندي اضافة
الكركرة
في شأن السيارات ما ذكرتيه اي اهتزاز السيارة عند رفع القدم عن البنزين مع عدم الضغط علي دواسة الدبرياج
وهناك تعريف اخر للكركرة وهو
تعريق يخص السادة المدخنين وهو مرتبط اكثر بمدخني الشيشة
ويللا مش مهم

عمر أفندى و أبووه said...

اسماء

انا اول مرة اخش مدونتك و ربنا يكرمك حلوة جدا و تحسيها طبيعية و موش متكلفة ...و موش مكلكعة بمفاهيم ايدلوجية على غرار موش هنبطل مثلا او ما شابه...

بخصوص موضوع السواقة...انا لسه مكملتش سنة سواقة بس الحمد الله بسوق الى حد ما كويس دلوقتى ...مكنتش متوقع انى هتحرك و هسوق لوحدى بالسرعة اللى حصلت يعنى انا سوقت على عربية واحد صاحبى فى حدايق الاهرام تلات مرات و بعد كده رمانى فى فيصل ...فا طبعا علشان امشى فى شارع فيصل البغييييض ...فا اتعلمت...

و الممارسة هية الاصل

اه حصلت فى البداية شوية طرف و مفارقات اللى الناس العادية ممكن يطلقوا عليها شتائم من الاخرين و انتى سايقة بس علشان تريحى دماغك اعتبريها طرف و مفارقات ...هتسوقى بكده و انتى رايقة

اه متنسيش تقرى التدوينة القديمة دى بقى


العربية ...حلاوة الروح

mazagat said...

بوست لذيذ هذه المرة ..

وزيارة لي هنا ببعد انقطاع شوية

شدي حيلك في تعلم السواقة


وربنا يبعدك عن الكركرة ..



تحياتي

... مزاجات

الـفجـريـــة said...

اسفين على التأخير يا جماعة
الأيامدى الوقت غريب

the last samurai

هوه التدرج فعلا هوا سر النجاح
وبنعرف ده بعد فترة
اما بالنسبة للفن
فمشكلتى الاساسية معه انى بدات فى تنفيذ التدرج فى معظم الاشياء الا هو
دائما ابحث عن النتائج قبل المحاولات


سمسمة

لا ترعفى تركنى ولا ترجعى لورا

ما شاء الله يعنى كل الفرصة المتاحة ليك انك تفضلى ماشية قدام
لمالا نهاية
:)

سمعت من كذا حد فعلا انه بلاش قرايب يعلموكى
مدرسة احسن

عقبالنا يا سمسمة لما نطلع الرخصة ان شاء الله واوعدك ساعتها بالفسحة اللى تختاريها
ومنتظرين تدوينك عن السواقة

الـفجـريـــة said...

مجهول

احنا اصلا عربيتنا مانيوال
فمينفعش اتعلم اتوماتيك

وهيه فعلا القصة كلها فى الممارسة



سلماية

ربنا يكرمك يا حبيبتى
ويسدد سواقتى دى جميلة
اما بالنسبة للدعاء
فهدعيلك ان شاء الله

وطبعا بعد مكلمتك انهارده زمانك مش عاوزة دعاء ولا اى حاجة من ناحيتى خالص

يا سلماية دول 70
وانتى فكرتى فى واحد
مش هنكر ان اللى حصل غلط
ومكنش ينفع
و مش هقولك اطمنى مكنش حلو اصلا
لانى عارفة ان مش هيه دى المشكلة
سامحينا لو سمحتى
:)
فاهمة

الـفجـريـــة said...

قلب أبيض
أخ علاء

جزاكم الله خيرا
وان شاء الله هتعدى
وهنتعلم


أستاذ مجدى

هوه انا لاحظت كده فعلا
انه بمرور الوقت بتزيد القدرة على التعبير عن التجارب الشخصية والانسانية

وحتى لما ييجى كلام عن قضية عامة بيكون الكلام من وجهة نظر المدون نفسه
يعنى مش شرط طبعا تجارب شخصية فقط

لكن قضايا عامة بس الفكرة فى طريقة طرحها..
الكركرة فى ما يخص السيارات افضل بكتيير

الـفجـريـــة said...

أبو عمر

جزاكم الله خيرا
هيه مش هنبطل مختلفة
بس من المدونات اللى بحب اتابعها باستمرار

كلام حضرتك عن السواقة
خلانى احس ان فى امل الحمد لله ..وفعلا الممارسة هى الاساس ..لكن شارع فيصل :(
سيئ جداااا فى عربياته والسير فيه

التدوينة دى قراتها منذ فترة وجميلة..

اما عن الطرف والمفارقات
فأخذت منها كثييرا بدون سواقة نتيجة انى غالبا بكون ماشية بفكر فى حاجة ومش واخدة بالى من العربيات
فاللى بيسوقوا لا يكنوا لى اى تعاطف

فمش هتفرق وانا سايقة يعنى ان شاء الله



مزاجات

جزاكم الله خيرا على التعليق

جمعاوى said...

السواقة

...

ياااا ربنا يكرمك يا أبو حبيبة

محدش يحط ف باله مين أبو حبيبية

بس الراجل ده

أول من لف نظى لتعلم القيادة

و ربنا المستعان

بس خشى بقلب جامد و مايهمكيش

و

ود

حور الجنة said...

مبرووووك يا اسماء
عقبالى لما الاقى حد يعلمنى

سناالإسلام said...

ما شاء الله ...ربنا يوفقك يا سمسمة
بس ايه ده من غير ما تأخذى أذنى

ممكن أسامحك لما أشوفك غدا إن شاء الله

سناء

Anonymous said...

اللهم اني أحقد علي كل من وصل 18 سنة
اللهم اني أحقد علي كل واحد بيعرف يسوق
يارب بقي عاوزة اوصل 18 سنة بقي
ياريت أسماء تتعلمي بسرعه علشان تعلميني :D
احنا اصحاب برضه

ahmed mefrh said...

العربيه بتكركر
انتى شغاله ببنزين 80 ولا ايه
هههههههه
ان شاء الله تتعلمى السواقه و عقبالى انا كمان
سلام
ابو مفراح

Aml Ghonaim said...

عقباااااااااااااااااااااالى
مش عارفة ليه أنا مش متحمسة لموضوع تعليم السواقة ده ليه ؟
هو طبعا فى القاهرة لازم غصب عنك تتعلميه والا مش هتتحركى من مكانك _ تجربة أسبوعين ونصف فى قاهرة المعز _ لكن مش حاسة أوى بقيمته فى مدينة صغيروة كالمنصورة ....
بس يلا ياعسل علشان نشوفك بسرعة لما نيجى القاهرة ..........

alqassam said...

مدونة رائعه واحلى حاجه فيها بجد اسمها الفجرية جاية اكيد معنى يديلك امل فى وقت صعب فيه الامل بالنسبه لموضوع السواقه خطوة حلوة فى الطريق وربنا يكرمك وتختفى الموصلات من حياتك

بنت أبيها said...

ربنا يوعدنا

وبالتوفيق فى التعليم

على فكرة انا مررتلك تاج ... ابقى ردى عليه

يلا سلام

حلم الحرية said...

يسسسسس

ضمنا لما نيجي القاهرة في الزيارة الجاية ..انك تفسحينا

كده حلو اوووي

هههههه


ربنا يكرمك يا اسماء
ويبعد عنك الكركرة

الـفجـريـــة said...

جمعاوى
أبو مفراح

جزاكم الله خيرا
والبنزين مش هوه المشكلة
المشكلة فى اللى بيدوس عليه جامد

حور الجنة
الله يبارك فيكى يا حبيبتى
وان شاء الله تلاقى حد
ممكن اقولك استنينى لما اتعلم واعلمك
بس صعبتى عليه
قلت بلاش اضيعك يعنى

الـفجـريـــة said...

حبيبتى سناء

يا رب تكونى سامحتينى لما شفتينى غدا اللى هوه كان امبارح
:)
كان يوم جميل
الحمد لله

بس ايه أخد اذنك دى؟؟
دتى خدتى عليه أوى
:)

أروى الطويل

اللهم اني أحقد علي كل من وصل 18 سنة
اللهم اني أحقد علي كل واحد بيعرف يسوق

ايه يا بنتى
مكنتش سواقة اللى تعمل فى قلبك كده
:)
بس بجد هو انتى لسه موصلتيش 18
ايه يا اروى ده
لا ده انتى كده المفروض تقوليلى يا خالتو
هتم عشرين الشهر الجاى

الـفجـريـــة said...

اصرار أمل

بس المنصورة مش صغيرة اوى كده
جيتها كذا مرة
يعنى العربية تنفع فيها بردو
بس اكيد القاهرة اكتر

تعالى انتى بس وانا اجيلك سريييع ان شاء الله

القسام

جزاكم الله خيرا
احب الاسم ايضا
مع ان الكثيرين من اصدقائى
لا يفضلوه على الاطلاق

الـفجـريـــة said...

بنت ابيها

ربنا يوعدك قريب ان شاء الله

اما بالنسبة للتاج

فجزاكى الله خيرا
هروح اشوفه حالا


مروة
مصلحة يعنى

ماشى هفسحكم ان شاء الله

ده على اساس ان اذا ربنا قدر و جيت اسكندرية
قريبا ان شاء الله
الاقى عند المحطة
عربيااات عربيااات