Wednesday, August 29, 2007

قديم التاج وجديده


التاج

واللى لغاية دلوقتى لم يستقر فى ذهنى معنى لغوى ليه

لكن ممكن نقول معناه التدوينى

الاسئلة اللى بتتبعت من مدونة لأخرى

واللى غالبا بيكون هدفها زيادة مساحة البوح الشخصى _زى مبيقولوا_للمدون/ة


ومعرفة رأيه فى حاجات


طيب

التدوينة دى هيكون فيها تاجين



تاج قديم مبعوت من فترة طويلة

من حبيبتى أمل غنيم



وتاج جديد لسه طازة

مبعوت امبارح من الأستاذة والاخت والانسة الفاضلة


:)

يلا نقول كلام حلو فى الأول عشان يبقى فى فى اجابات التاج فرصة اكبر من حيث الصراحة



نبدا بتاج أمل



هل كنت طالب شاطر فى المدرسة ؟

اه الحمد لله..بس انواع الشطارة كانت بتتغير..يعنى فى ابتدائى كانت الشطارة من النوع بتاع انه يكون ليه ترتيب والأولى والتانية و الكلام الجميل ده وصولا لاعدادى كمرحلة وسط تلاها ثانوى اللى فيها كنت شاطرة بس مش اوائل والقصة دى يعنى بجيب درجات عالية لكن مش لدرجة الترتيب بس ده مكنش مزعلنى لانى كنت فى بداية اكتشافى للدنيا فكنت مقتنعة ولازلت ان موضوع الدرجات ده نسبى يعنى انا عايزة افرح ابى وامى وعاوزة اكون صورة كويسة وعاوزة ادخل فنون تطبيقية يبقى اذن اذاكر كويس بس معقول مش اطحن نفسى زى حد عاوز طب مثلا



ايه أكتر مادة حبيتها وأكتر مادة كرهتها فى المدرسة والجامعة؟



فى المدرسة

أكتر حاجة حبتها



الرياضة والتاريخ

واحيانا الفيزياء

واكتر حاجة كرهتها

الاحياء بلا منازع تلاها الجغرافيا والكيمياء



أما فى الكلية

اكتر حاجة حبيتها

معظم المواد العملى

المواد اللى ليها علاقة بتاريخ الفنون ممكن ييجى منها معايا

واللى ليها علاقة بالتصميم عموما



اما باه اللى كرهتها

اللى بحس داخلة فى الدراسة بالعافية

ملهاش اى لزمة

ولا حتى بتوسع مدارك البنى ادم بعيدا عن الدراسة

من ادارة انتاج لكيمياء لانواع من الرياضة السخيفة بشكل غريب



وطبعا

اى مادة عملى فيها نسبة هندسية عالية وعاوزانى اخد بالى من المللى والنص مللى

زى رسم معمارى

بس كده

حاجة بسيطة

السؤال الثالث :كنت عايز تطلع ايه وانت صغير ؟

لأ دى مراحل كتير..بدأت بانى كنت عاوزة اطلع صحفية وانا صغيرة وبعدين تطورت لمهندسة اتصالات وبعدين على اخر سنة فى اعدادى كنت حودت على فنون تطبيقية تماما وبالذات الجوانب اللى ليها علاقة بالرسوم المتحركة

ودلوقتى هوه خليط مابين رسوم الأطفال وما بين الكتابة


كده خلص التاج الاولانى على خير

ندخل على التانى اللى من عند أروى




اسمك ايه؟؟

أسماء

فكرتينى ببنت واحنا فى كى جى كانت بتحب تغلس عليه وتعد تقولى كل واحدة فينا ليها اسمها بتاعها وانت اسمك اسماء يعنى ملكيش حاجة وتضحك وانا طبعا بكل عبط اعيط واعيط جامد لغاية ما فى واحدة ربنا يكرمها قالتلى قوليلها وانت عندك اسم واحد بس انا كل مبزهق اغير واعدت فى الموال ده سنة




لو قلتلك عرفى نفسك هتقولى ايه؟؟



بنت مسلمة ومصرية ومازلت تبحث عن مشروعها فى الحياة وان كانت بشائره بدأت تهل الحمد لله وأحب امى وأبى واصحابى وعائلتى أخواتى وبلدى وذكرياتى كثييييييرا



على فكرة الاسئلة دى الاجابة عنها مش سهلى زى ما الواحد كان فاكر
نكمل



اسم مدونتك؟؟



الفجرية




ايه الاسم الغريب ده؟؟يعنى ايه؟؟



حتى أنت

اصل فى ناس كتير بيقولولى عليه غريب

وناس تانية بتقول كويس

انا بحبه

ومش غريب على فكرة..الفجرية يا جماعة..عادى

يعنى ايه؟؟




ما هو توجهك السياسى ولاى جهة تنتمى؟؟


مين اللى جاب عاطف الحسينى هنا

اخوان الحمد لله



ما رأيك فى جماعة الاخوان المسلمين؟؟



ناس بحبها جدا..بس بحس انى مش عارفة اتكلم عن جماعة الاخوان يعنى مفيش حاجة مادية منفصلة بذاتها اسمها جماعة الاخوان

بحس الاخوان هما احنا بكبيرنا وصغيرنا

يعنى لما هقول فيها حاجات رائعة وفيها مواطن قصور

فده من طبيعة مكوناتها..اللى هيه بشر

لكن لو قصد السؤال منهجها وقيادتها مثلا وانشطتها

فبحسها الانسب لى حتى الان لأحقق دور من خلاله بس هيه لسه محتاجة توصل للناس اكتر

افكار توصل للناس اكتر وافراد توصل لللناس اكتر



اما لو هنتكلم عن عاطفتى تجاهها



فهى مدرستى بجد..وليها فضل عليه من هنا للسنة الجاية واكتر..وذكريات وتجارب وكل حاجة ومنها ناس مهما قلت عنهم لن اوفيهم حقهم

ربنا يجزيهم عنى خير



ما رأيك فى انشاء رابطة تدوينية تجمع المدونين؟؟



هوه موضوع الرابطة ده بيطلعلى فى كل حتة

المهم وباختصار

دلوقتى انا بحسه ليه سلبيات كتير ومش لقياله هدف محدد او نتائج معينة اقول هنتقبل علشانها سلبياته..يعنى ايه اللى هيتم بيه ومش هيتم بغيره..لو فى اهداف ظهرت ليه قوية..الله اعلم يمكن الموضوع يتغير بس الى الأن مش مرحبة بيه

ما رأيك في اداء المدونين المصريين مقارنة بالاخرين؟



جميل وبيتطور وبيزيد وبينتشر وبيتوغل وبيستمر وكده


ايه رأيك في المدونات دي؟؟



انا اخوان..جميلة يعنى بحب اتابعها باستمرار وفعلا هيه صحفية زيادة شوية على صورة المدونة اللى احنا معتادين عليها

جبهة التهييس الشعبية..دمها خفيف مع اختلافى معاها شوية فى بعض حاجات بس فيها تدوينات بستمتع وانا بقراها

واحيانا بتكون هجومية زيادة بس عموما لما بتحكى عن ذكريات بتبسط



انسى

مدونة تجمعنا وبحبها جداااا وهى من اوائل ما ازور اول مبدخل على النت..بحسها بأت جزء من حياتنا



بنت سعد

اتمنى ادخلها كتير عشان اعرف اكون عنها راى ..دخلتها مرات بسيطة

واحد بيحب مصر

جميلة بس بقالى فترة مشفتش الجديد

هدخل اشوف بعد مخلص التاج ان شاء الله



لسانها مولوتوفى



بسيطة وصريحة وبحبها..بتضحكنى ..أحيانا على حاجات كاتباها..واحيانا اخرى على نفسى لانى شفت شذا صاحبتها كذا مرة ومتوقعتهاش زى مبتظهر شخصيتها يوم بعد يوم فى المدونة

تقولى ايه لمبارك؟؟



مش كفاية بأه ولا ايه رايك



طيب وجمال؟؟



مش لاقية حاجة فى دماغى اقولهاله دلوقتى

ممكن من شبه أباه فما ظلم

بس انته شبهه و ظلمت بأه



لو مكنتيش مصرية كنت تتمنى تكون جنسيتك ايه؟؟

فلسطينية-سورية-تركية




ليه؟؟

كده

بحب التلات بلاد دول



لو انتى مكان مبارك لخصى هتمعلى ايه؟؟



يعنى الله اعلم..اصل الحاجات دى الحكم فيها مينفعش من بعيد

بس بحس يا اما هكون كويسة وماشية تمام

يا اما هكون ظالمة ربنا يعافينا بس دايما بفكر انى حتى لو ظلمت ونصبت هاجى عند سن معين واسيب الكلام ده كله واروح بلد بعيد..حتى الواحد يصرف الفلوس اللى تعب فيها وجمعها من الشعب الغلبان

لكن ما شاء الله عندنا ..العمل شغال لأخر لحظة واخر نفس وطالما فى الصدر قلب يبنض



لما بتسمعي خبر بيقول ان الريس مات بتحسي بإيه؟؟



ومع انى عارفة ان اللى جاى يخوف ويقلق

وان نهاية ظالم مش معناها نهاية ظل

الا انى منكرش انى بفرح

وبقول عقبال كل اللى فى بالى



ماذا يمثل التدوين بالنسبه لك؟؟

اصبح حاجة مهمة جدااا بالنسبة لى اكثر مما كنت اتخيل

يعنى مش بعرف الباقيين بس لكن احيانا بعرف نفسى من اول وجديد من خلاله

تحب تقولي ايه لأولاد واسر المعتقلين السياسين وعلي رأسهم الاخوان؟؟

احم احم..يا جماعة مفيش حاجة باقية

لا الظلم باقى ولا الظالم باقى ولا العسكرية باقية ولا طره باقى

كلهم حاجات هتروح وتنتهى

واللى جاى اجمل بكتير

ان شاء الله


بس احنا نجمد

ربنا يجعلنا من الصادقين والصابرين



عندك استعداد تتضامني معاهم؟؟
:)

:)

:)

لا معنديش

ايه الاسئلة دى

عندى الحمد لله..متضامنة معاكم يا جماعة

مع انى مليش دعوة بالموضوع تمام ونهائيا وانتو بتحاولوا توقعونى فى الغلط

بس انا واخدة بالى

:0



اجمل بوست كتبتيه ولماذا؟؟


اصل كل تدوينة او معظمهم يعنى ليهم معايا ذكريات يعنى اللى هقولهم هنا مش الأحسن من حيث الكتابة والحاجت دى لكن ممكن أقربهم لنفسى وبكون مبسوطة لما ارجع أقراهم تانى ..بحب

ربنا ..لا تدعنا


و رسالة ورجعت فيها وبحب بردو قصاقيص
وبحثا عن مشروعى فى الحياة و مراسلتكم من مزرعة طره


وكفاية كده دانا جبت المدونة كلها تقريبا
بس دول بجد بحبهم جدا وبينقلونى لحالة جميلة


احلي مدونة دخلتيها؟
لأ دى صعب اوى تتحدد فى واحدة او حتى اكتر لكن بالنسبة لى المدونات اللى فى تجدونى كثيرا هناك هى أكتر مدونات بحبها


لو تدوينه مالهاش تعليقات بتحسي بأيه؟
بحس انها موصلتش للناس بس مش علطول بحس كده
لييييييه؟؟
لأنى بقالى فترة بتحصل معايا حاجة غريبة كل متعجبنى تدوينة فى مدونة وابقى متأثرة بيها جدا الاقى ملهاش تعليقات..حصلت كذا مرة فبقيت بحس انه الغالب لو ملهاش تعليقات يبقى مش واصلة للناس لكن فى استثناءات ونفس الاحساس لو كنت انا اللى كاتباها..




ما رأيك في فكرة التاج؟؟
جميلة بس كنت فاكراها للوهلة الأولى الاجابة عليها اسهل من كده..يعنى بحبها.. بتظهر الجانب الانسانى اكثر بس فى اوقات تاجات بصراحة بتنرفزنى




واخيرا ايه رأيك في مرسل هذا التاج؟


أروى الطويل يعنى
:)


كنت مستنية السؤال ده


شخصية جميلة ..وحالمة..وليها هدف بتسعى ليه وان شاء الله توصله..بس طبيعى وسط كل الطاقة والحلم ده يكون فى أحيانا خطوات او لحظات تشتت شوية وده جزء من حيوية الطموح أصل الطبيعى انه مش هيكون كل حاجة ماشية تمام


وبجد ده رأيى..مش بجامل ..بالاضافة انى عرفت اروى زى مبيقولوا فى العالم الافتراضى اللى هوه النت وبعد كده شوفتها فى العالم الواقعى المرادى بس كانت رؤية بسيطة فى الهايكستب..فماحتكتش بيها كتير فى المواقف الحياتية اللى بتبين الصفات اون كنت حطالها صورة فى تخيلى..


يعنى من الاخر يا حاجة أروى_معرفش انت حجة ولا لسه_لما بعد أفكر مع نفسى فى موضوع الاعتقال او التدوين والناس اللى اتعرفت عليهم فى الفترة الاخيرة وتركوا فيه أثر بتكونى من أول الناس اللى بتيجى فى بالى..


جزاكى الله عنى خيرا


خلص التاج على خير الحمد لله


فضل أمرره لمين


أن الأوان


سنا الإسلام


مروة ..حلم الحرية


همسة قلم


وأى حد عاوز يخده يتفضل طبعا


تم الحمد لله


15 comments:

other_things said...

الرياضة السخيفة دي..سخيفة ازاي..الأرقام بتهرب..ولا بتقطع الورقة..ولا بتبوظ الآلة الحاسبة
سخيفة ازاي يعني
...

اصرار أمل said...

أنا كنت نسيت التاج ده يابنتى ؛ كويس انه لسه فى بالك ........
وبعدين ازاى تحبى التاريخ وما تحبيش الجغرافيا ؛ تيجى ازاى دى ؟!!!!!!!!!!
بجد يا أسماء اجاباتك رقيقة كرقتك ؛
ورائعة كاحساسى بروعتك ...
دمتى متألقة ؛ ومتميزة ....

اروي الطويل said...

ياكثوفي
دا انا
عامة أنا حجه اضربيها في خمسة او سنة :D

والله أنتي أحلي
ربنا يفك أسر باباكي ويسعدك يارب

وضـّاح said...

ما شاء الله إجابتك على التاج جميلة

ربنا يكرمك وييسر لك أمورك

FadFadA said...

من أصعب الحاجات في التدوين : التاجات
و بغبط كل من يستطيع أن يجيب عليه اجابات جيدة كاجاباتك
بس وقفة صغيرة مع سؤال عرفي نفسك
هل هذا هو التعريف بالفعل , أم أن هناك تعريف أدق تحتفظين به لنفسك

لا أظن أن مكان التعليق يكفي لتوضيح ما أقصده, فهذا يحتاج إلى تدوينة خاصة

محمد

شذى مولوتوف said...

اييييييييييية ده
انا اسمى مكتووووووووووب

بتجيبوا فى سيرتى
اخص عليكو
طب كنتوا قولوا حاجة وحشة علشان اخد حسنات ده انتو عالم وحشة

اية الجمال ده يا سمسم

بس اية موضوع قابلتك مرتين كده ولا حاجة

امال انا حاسة ليه اننا متربين مع بعض
وحافظين بعض كمان

المهم
سلميلى على مامتك وان شاء الله هازوركم بعد ما اخلص الهم اللى عليا
ادعيلى

أميرة محمد محمد محمد said...

كلامك جميل يا اسماء وشخصيتك رائعه ما شاء الله عليكى.علي فكره النشيد جميل جدا. ربنا يكرمك

elfagreya said...

أخ بلال

واضح ان الرياضة لها قيمة كبيرة لديك
سواء من التعليق ده
او من اخر تدوينة فى البلد بلدنا

عموما..قصدت بسخيفة..انها ليست ممتعة بالقدر التى كانت عليه قبل كده
يعنى زمان كان الواحد لما يكون زهقان وعاوز يفرح يعد يحل رياضة

اما فى الكلية فالمناهج بعيدة كل البعد عن ذلك..والدكاترة كمان..حتى المسائل..مش مشجعة على الاشتباك معها
ويمكن العيب بأة فيا
الله أعلم

elfagreya said...

أمل حبيبتى

اول متنسى حاجة
اعرفى انى لسه فاكراها
على فكرة مدرسة الدراسات اللى كانت بتدينى كانت بتستغرب
كانت الاسئلة اللى ليها علاقة بالتاريخ اشتغل فيها تمام
واللى ليها علاقة بالجغرافية تلاقينى بجاوب على اد السؤال
وانسى حاجات
معرفش ليه؟؟

اما عن رقيقة كرقتك
ورائعة كاحساسى بروعتك

فالاكيد ان الروعة فى العين التى ترى
وليس فى المرأى اللى هوه حضرتى

elfagreya said...

أروى

اه انت
ما شاء الله..منا عرفت من شروق انكم كنتم هناك سوا
عقبالنا يا ستى

ربنا يتقبل دعائك
سلام

elfagreya said...

اخ وضاح

جزاكم الله خيرا

أميرة

جزاكى الله خيرا يا حبيبتى
انا بحب النشيد ده جدا
بس بيقولوا مش نشيد عشان فيه ايقاعات
اسمه اغنية
بحب الاغنية دى جدا
:)

elfagreya said...

أخ محمد

هوه فعلا الاجابة على التاجات صعبة وبالذات لو عاوزة تجاوبى اجابات بجد

اما عن السؤال ده بالذات
فملحوظتك فى محلها تماما
حتى انى بعد اجابته ادركت انى لم اقل ما اريد قوله ولم اعرف كيف اصيغه فاتبعت الاجابة بجملة

على فكرة الاسئلة دى الاجابة عنها مش سهلة زى ما الواحد كان فاكر

وهى فعلا كده

elfagreya said...

شذى اللى وحشانى

اه بنجيب فى سيرتك
عندك مانع
:0

اما عن قابلتك كذا مرة..فانا بردو كان فى دماغى كده انى عارفاكى كويس وحفظنا سوا وغنينا ولعبنا وخرجنا وحاجات كتير..بس يا ستى لقيت نفسى كل شوية بكتشف جديد فيك فى المدونة فأعدت افتكر واقول يمكن انا مشوفتهاش كتير فمكنتش عارفاها..وقلت لنفسى كده

مستنيين زيارتك قريبا ان شاء الله
وربنا ييسرلك فى اللى عليكى

اسماء العـــــــريان said...

غدا الاثنين 3 سبتمر
استئناف قرار الحبس بالتجديد 15 يوم لمجموعة الدكتور عصام العريان ومن معه

فى محكمة شمال القاهرة بالعباسية

الساعة 10 صباحا

ارجو ممن يريد التضامن معنا ان ياتى

اسماء العـــــــريان said...

غدا الاثنين 3 سبتمر
استئناف قرار الحبس بالتجديد 15 يوم لمجموعة الدكتور عصام العريان ومن معه

فى محكمة شمال القاهرة بالعباسية

الساعة 10 صباحا

ارجو ممن يريد التضامن معنا ان ياتى