يا أهلنا في غزة .. نحن معكم

Sunday, August 19, 2007

لحظات غالية

تحديث
الجلسة السادسة
21-8-2007
كنت هعمل تدوينة جديدة وبعدين حسيت ان هيه هيه جلسة امبارح مع زيادة شوية حاجات
الاجابات الغير منطقية من عاطف الحسينى من عينة
مش متذكر
هتلاقى فى محضر التحريات
لأ دى مصادر سرية
افضل الاحتفاظ بالاجابة لنفسى
وعلى هذه الشاكلة
تسير اجاباته
لكن اللى كان فوق مستوى التحمل
انه يقول فجأة بصوت زعيمى ثورى جهورى ملوخية
احنا من الشعب وللشعب ومع الشعب
طيب ايه الجديد تانى؟؟
كل جلسة بيزيد حس الأمومة عند القاضى
بجد حاجة غريبة جدا
قاضى المفروض انه يركز وياخد باله من اللى بيتقال
لأن المفروض انه على اساسه بيقول حكمه
المفروض يعنى
سيبكم من الواقع
كل ما ينشغل به
يا شرطة..هاتوا مية
يا شرطة..هات المروحة
على المروحة
احود المروحة
والله يا جماعة بحكى الحاجات دى وانا حاسة بخجل
كان نفسى يكون محتوى كلامهم فى شيئ اهم او اجدر بالمناقشة
بس ده الواقع
اليوم كان مرهق وطويل فلن أطيل
بس هاختملكم بحاجة بجد لما تسمعها غالبا لازم تضحك
عاطف الحسينى واقف بيقول الاتهامات
عمال يتنقل من تهمة لتهمة
لغاية لما وجدته بيقول
التهمة
بث شحنات ايمانية وجهادية للشباب
نداء الى جموع الاخوان فى كل مكان
طلب بسيط
شحنتين بس الله يكرمكم
قبل رمضان
لو حد عاوز شحنات
يلحق
دى يمكن طبعا جزء صغير جدا من الاحداث الغريبة الللى بتحصل فى الجلسة لكن قرأت كلمة أثرت فيه جدا لا أعرف ان كانت هى مؤثرة للدرجة دى ام انى كنت مهيئة لهذا التأثر
قرأت كلمة لشاعر تركى يدعى ناظر حكمت
أرسلها لزوجته من سجنه لشد من أزرها ويدفعها للحركة والاستمرار
قائلا لها:
أجمل الأنهار لم نرها بعد
أجمل الكتب لم نقرأها بعد
أجمل أيام حياتنا لم تأتى بعد
وهى فعلا لم تاتى بعد..الكلمات دى كمان اسعدتنى جدا عندما أخذتها بالمحمل العام
أجمل أيام دعوتنا لم تأتى بعد
ولكنها لا شك اتية
فلنتوكل ونعمل
لعلنا نكون من صانعيها
-----------------------------------------------------------------


شعورى دلوقتى زى شعور الموبايل اللى حد حاطه فى الشحن ومش قادر يفهم انه خلاص اتشحن تماما ونهائيا


full battery


بدأ الشحن من اول امبارح بعد اعتقال د.عصام العريان والمجموعة اللى معاه واللى فيها عمو نبيل مقبل اللى لسه متعرفة عليه كويس فى الزيارة اللى فاتت وعمل معانا موقف ميتنسيش هدون عنه ان شاء الله


طيب..انهارده كان يوم الجلسة الخامسة من العسكرية اللى كانت غريبة وعجيبة واى حاجة تدى معنى مش طبيعية من اول تشريف عاطف الحسينى لغاية تأجيل القاضى للجلسة ليوم الثلاثاء انقاذا للحسينى من الارتباك ولخبطة الاجابة فى منظر يحسسك انك بتشوف تمثيلية وياريت تمثيلية بجد لأ دى من النوع اللى كانوا بيجيبوه على القناة التالتة من الساعة 12 الظهر عشان محدش يشوفه


طيب عدنا لأجد أسماء المجموعة المعتقلة الجديدة اليوم اللى منهم والد بن خلدون مدون نجوم الحيرة واللى سجل تسجيل لامن الدولة اثناء تواجدهم فى بيتهم فى التدوينة دى

تسجيل فعلا لا تعليق عليه

يكفى سماعه


على فكرة وكتوضيح..محدش يفتكر أصدى بانى مشحونة يعنى مدايقة او مضغوطة او يائسة او محبطة أو أى شيئ له علاقة بالمعانى ديه مطلقا


تماما والحمد لله


مشحونة يعنى بداخلى طاقة ايجابية وعاطفية كبيرة جدا لأبى واخوانه ولكل الأسر ولبلدنا وللناس اللى بجد بتحبها وطاقة سلبية كبيرة أوى هى الأخرى بس دى بأه لكل من يمت للظلم بصلة من قريب او من بعيد


ببساطة

أمقتهم


أمقت كل من يظلم وكل من يشهد زور وكل من يتملق

والأكثر من ذلك انه لا يبالى

ورسالتى اليه


ما أصغرك فى عيون الناس

وان حسبت نفسك عظيما


وما أثقل حملك امام الله

وان حسبته خفيفا


وما أسرع مثولك بين يديه

وان حسبته بعيدا


وما أسمى ما نحلم به

وان ظننته تافها


وما أقرب اليوم الذى ننتظره

وان ظننته غير أت


وما أغلى تلك اللحظات عند الله

وان ظننتها رخيصة


هى لحظات بحس انها غالية اوى عند ربنا سبحانه وتعالى

غالية بغلو البشر نفسه اللى ربنا كرمه

واودع فيه فطرة الخير


لحظات مش بنساها

ولا اتمنى انى انساها

لانها بتحمل معانى اجمل من ان تنسى

هيه بالنسبة لهم دلالة على ظلمهم

وبالنسبة لنا

دلالة على رحمة ربنا بينا


يكفى ان ابى واخوانه
وأى حد بيتمنى الخير لبلده
وللى حواليه

وان سجنوا


يتنفسون أمل

يتنفسون رضا

يتنفسون حياة


16 comments:

Anonymous said...

الحمد لله انا اول تعليق ليكى فى المدونة واول مرة اعلق هنا دايما نيرة هى اللى بتعلق
كان نفسى جدا اروح المحكمة النهارده مع انها تمثيلية سخيفة تتكرر كل جلسة ولكنى اردت الذهاب لارى ابائى وهم كالانوار فى ظلام القفص وهم ثابتون وصامدون امام هذه الاتهامات الباطلة
بس مقدرتش اروح عشان الحادثة بقى وكده
يلا الحمد لله

مهجة عصام

AbdElRaHmaN Ayyash said...

بجد شعور رائع
عجبتني اوي اوي اوي كلمتك الاخيرة دي
انهم يتنفسون حياة
و غيرهم .. بالتأكيد
يستشعرون الموت
يتفسوونه
يرونه في عيون من ظلموهم
بالتأكيد
أحرق الله قلوب من آذونا في أهلنا
جزاكم الله خيرا
رائع

Anonymous said...

ربنا معاكوا ان شاء الله

الواحد مش عارف يكتب ايه

مره الحرية للشاطر واخوانة
ومره الحريه لغزلان و اخوانه
ومره الحريه للعريان و اخوانه

المفروض نكتب الحرية لام الدنيا

عمر جمال عبد السلام

belal said...

بسم الله الرحمن الرحيم
قل من كان في الضلالة فليمدد له الرحمن
مدا حتى إذا رأو ما يوعدون إما العذاب وإما الساعة فسيعلمون من شر مكانا وأضعف جندا
صدق الله العظيم

بيدو said...

صبرا يا اختى فالظلم لا يدوم والايام دول والله المستعان
تشرفت بزيارة مدونتك ولن تكون الاخيرة

خالد حفظي said...

الله وحده يعلم إلى أين يذهب بنا أهل الحكم في بلادنا .. د./عصام العريان يمنع من السفر و يعتقل في نفس اليوم .. ماذا يقول الإنسان .. حسبنا الله ونعم الوكيل
و لنتواص جميعا بالدعاء له ولإخوانه الذين سبقوه بإيمان م/ خيرت الشاطر وإخوانه
لك الله يا مصر
قديما كنا نتفاخر و نقول .. مصر مقبرة الغزاة
فماذا نقول الآن؟
ما ذا نقول بعد أن تحولت سجنا للدعاة؟
ماذا نقول بعد أن صارت سجنا للشرفاء ومرتعا للفاسدين المفسدين
إن موعدنا معهم الصبح .. أليس الصبح بقريب؟ بلى و الله إني لأراه في الأفق
(( ولا تحسبن الله غافلا عما يعمل الظالمون إنما يؤخرهم ليوم تشخص فيه الأبصار مهطعين مقنعي رؤوسهم لا يرتد إليهم طرفهم وأفئدتهم هواء))صدق الله العظيم

اسماء العريــان said...

asmaa>> plz

tamnene homa fe elsgn m3ako

fe el mazr3h ???

فاروتا المصرى said...

السلام عليكم
سبحان الله كم هذا الشعور نبيل وجميل وغريب
هم يسجنون ابائكم ليحطموكم نفسيا وانت تزدانون قوة الة قوتكم
انها اراده الله
وجعلها الله فى ميزان حسناتكم يوم القيامه
ورد اليكم اهليكم قريبا ان شاء الله

المنشد العام للإخوان المسلمين said...

/أختنا الفاضلة

شاركينا في حملة التضامن مع معتقلي الإخوان والمحالين للمحكمة العسكرية، وفي نشرها على المدونات والمنتديات:

http://ellygowwaya.blogspot.com/2007/08/blog-post_19.html

/أخوكِ
المنشد العام للإخوان المسلمين

آن الأوان said...

السلام عليكم

اسماء انا قلبى وجعنى اوى انا مش حاسه بالمصيف خالص انا كان نفسى اكون معاكى كنت قاعده يوم الاحد وحاسه ان فى حاجه ناقصانى وعماله اتخيل انى معاكى بس طبعا انا كنت معاكى بروحى
تعرفى رغم كل اللى بيحصل بس انا حاسه بعزه اوى
سلميلى على خالتو وعلى الاطفال

أميرة محمد محمد محمد said...

ربنا يكرمك يا اسماء ويعطيكي الصبر والقوه وباذن الله هتنتصرى انت وكل اللى معكي كلامك جميل قوي وبيدي امل في وقت صعب جدا ودى اول مره اعلق فيها عندك علي الرغم من انى كنت بزورها كتير انتى ومعظم مدونات الاخوان

Aml Ghonaim said...

غاليتى :
غالبا أنتظر كلماتك تلك فى وقت المحنة ؛؛؛
لأرى قدر صمودك وعزنا ؛؛؛
وثباتك وانتصارنا ....
فرج الله عنا ..............

Unknown said...

بجد كلنا مشحونين بالقرف اللي بيحصل في البلد ده

بس أهم منكده نحول شحننا لطاقة جبارة تخدم دعوتنا وتقرب نهاية الظالمين

مالك مصطفى

alqassam said...

حسبنا الله ونعم الوكيل
صبرا فقد اقتربو من النهاية
وشمس الحرية ستشرق لامحالة

كنت عايز رأى حضرتك فى الكليب الى على مدونتى

الحرية للدكتور عصام العريان وكل الشرفاء

Unknown said...

انتوا بتصنعوا ابطال وهميين ابطال في خيالكوا بس
اكيد اعتقالهم ليه سبب بس انتوا مش
عايزين تفكروا و تعرفوا
الله يرحمنا من عبث الاخوان

ahmed mefrh said...

بتنفسون حياه
و ينعمون بالحريه من وراء القضبان
و يبنون بحياتكم حياه بديله