يا أهلنا في غزة .. نحن معكم

Tuesday, January 1, 2008

كام حاجة كده



كام حاجة كده عاوزة أقولهم..قبل مييجى بكره ان شاء الله

أولهم ان بكره هتبدأ الامتحانات.. دى حاجة مقلقة من ناحية ولكنها مفرحة من ناحية بردو لأن معنى ان الامتحانات بدأت ان الأجازة قربت..ده لو بصينالها بنظرة تفاؤلية يعنى..كنت بأعد أسال نفسى هيه الناس لما تكتب تدوينة وتكتب فى أخرها دعواتكم..يا ترى الناس هتدعيلها فعلا..ومع الوقت بدأت اجاوب على نفسى لما لقيت انى فعلا بقيت بدعى للناس لما بشوف طلبهم ده..وأظنكم كمان أطيب منى : )..وعلى ذلك فادعولى يا جماعة..وبالأخص يعنى من الساعة 2 للساعة 6 ان شاء الله..الساعة 2 وانا بستلم ورقة رسم معمارى واللوحة قدامى فااااضية وبيضاااء..والساعة 6 وانا بسلم الورقة اللى كانت فاضية وبيضاء بس بأت مليانة خطوط ..هيه الفكرة مش انها تبقى اتملت خطوط..الفكرة فى انها تبقى خطوط صح..انا مستبشرة خير يعنى..ومش هزعل يعنى اذا استمر دعاءكم حتى يوم الخميس عشان عندى فيه هوه كمان امتحان..هما يومين ورا بعض كده يخلصوا على خير ان شاء الله..


ثانيهم..فى أيام ميلاد أخواتنا واصحابنا والناس اللى ليها مكانة عندنا..معرفش الأولى يوميها اننا نهنيهم ولا نهنى انفسنا بوجودهم معانا ولا ندعى اننا وهما نكون شاكرين للنعمة دى وربنا راضى عنا..وبعدين حسيت انى بغلس على نفسى يعنى..طب منعمل التلاتة مع بعض..وعلى ذلك
فكل عام وأنت الى الله أقرب وبخير يا مروة أو يا أن الأوان
وكل عام ونحن معا ان شاء الله
وربنا يرضى عنا ويجمعنا على الخير فى الدنيا والأخرة


ثالثهم..بحلم بكتاب ممتع أقرأه ..كتاب من الكتب اللى بنفضل فاكرنها مهما قرينا بعدها..أوقات الكتاب ده بيكون عادى جدا لكن بيكون داس على نقطة معينة أول لمس شيئ معين جوانا أو كان شط بالنسبة لنا ومرسى لأفكار كثيرة متقلبة بالنسبة لنا فأصبح مؤثر وساب بصمة..هنشووووف وهلاقى ان شاء الله


رابعهم..واحدة بحبها جدا عملت مدونة..أو بتعبير اخر دخلت عالم التدوين..وان اتفقنا فى حاجات واختلفنا فى حاجات تبقى من الناس اللى اتعلمت منهم كتير ..مع انها لسه رقم العشرات فى عمرها واحد..وانا رقم العشرات فى عمرى بأه اتنين ..معلش يعنى يا سلمى دى الحقيقة :)..هى كانت لى نور جديد فى الحياة..وأتوقع ان مدونتها هتكون هيه كمان كده نور جديد



خامسهم..من حين لأخر أعود اليه.. ونشتاق للبوح أحيانا..كل مرة يعلق معايا حاجات احيانا مبكنش ركزت فيها قبل كده أو يمكن بتكون هى الأنسب لى دلوقتى فبتشدنى..المرة دى خاطرتين كانا أكثر ما أثر فى..

استقرار
أجمل أعطية
أن يجمع الله عليك نفسك
ولا يشتتها

طاقة نور
الابداع بداخلنا
يظل يصرخ طول الحياة حتى يتنفس
ومنا من يسمعه..ويفتح له طاقة من النور
ومنا من يصك أذنيه عنه
حتى يختنق ويموت

وأخيرا..أعود اليها..لتظل هى الثابت عند قراءته كل مرة..

يا الله
كم أنا محتاج لأكون موصولا بك..
فلا تدعنى

ربنا لا تدعنا

35 comments:

Mustafa Şenalp said...

very nice a blog :)

محمد said...

أظن أنك الآن في امتحانك

اللهم ذكرها ما نست ورد عليها ما استودعته عندك

اللهم بارك لها فيما بقى وألهمها الصواب فيه

اللهم تقبل

***

كل عام وأخواتك بخير وبارك الله لهم في أعمارهم
***

تدوينة وتشتاقي للبوح أحيانا .. فعلا رائعة واقتباساتك منها جميلة

أحسن الله إليك
:)

صاحب المضيفة said...

كان الله لك وسهل لك عسير

وبارك لك في اخواتك ونفع بكم

دمتم بود

dandana said...

كان نفسى اوى الحق التدوينة فى وقتها
بجد بحب اقعد اقرا ياسين لكل اللى بيمتحن..وادعيله


ع العموم انتى كنتى متفاءلة..اكيد ان شاء الله عملتى كويس



الخواطر الاخيرة...رائعة...

اسمحيلى ..انا هابقى احطها عندى فى المدونة..


ويلكم بالمدونين الجدد

Unknown said...

ربنا يوفقك في امتحاناتك و ترفعي راسنا بامتياز ان شاء الله
مستنين تدوينه جميله جديده

Sanaa basha said...
This comment has been removed by the author.
Sanaa basha said...

ربنا معاكى يا اسماء
ليكى تاج عندى على اللينك ده
http://3eeshella7za.blogspot.com/2007/12/blog-post_24.html

إخوانى مخربش said...

المدزنين كلهم دخلوا بيات امتحانى

ربنا يستر ويخرجوا منه

دعواتنا لكم بدوام التوفيق

وفققكم الله لما يحب ويرضا

Anonymous said...

اختي الحبيبة اسماء


كان نفسي ادخل المدونة من فترة فعلا
لاني اشتقت لكلماتك وخواطرك واحساسك في الكلمات


تدوينة جميلة
زي صاحبتها

ربنا يكرمك يا جميل في الامتحانات
ويوفقنا كووووووووولنا يااااااااااااارب



fenoooon

Anonymous said...

التدوينة في تقدم ملحوظ ربنا يكرمك
وأنا كمان بيعجبن رسمك
بصراحة ياأسماء أسلوبك بيشدني وبيخليني أفتفت المدونة كلها قراءة قديم وجديد حتى لو كنت قارئة القديم ده ألف مرة بلاقي نفسي مشدودة لقراءته
إني أحبك في الله ووفقك الله في امتحاناتك إنت وسمية ومريم ومنى وسارة سعيد وسارة كمال وكل الكلية

الـفجـريـــة said...

عدنا للمدونة وتعليقاتكم على خير الحمد لله

Mustafa Şenalp

بالرغم من ان التعليقات الثابتة اللى بتتوزع على المدونات دى مبحبهاش ومبحسهاش ليها معنى
لكن ماشى هنعديها دى
:1

شكرا


وضاح

كنت فى الامتحان وقتها فعلا
وعملت كويس الحمد لله
ودعواتكم وصلت جدا

ربنا يجازى كاتبه أ.محمد عبد الجواد خيراا


صاحب المضيفة

تقبل الله دعائك
وجزاكم الله خيرا

الـفجـريـــة said...

مى..دندنة

ملحوقة يا ستى
عندك يوم الأربعاء الجاى والاحد اللى بعده و..و..
الخير كتير يعنى الحمد لله
اقراى سورة ياسين زى منتى عاوزه فى الايام دى

اما عن الخواطر فاتفضليها ..هيه اصلا مش بتاعتى يعنى احنا الاتنين متفضلنها
:1

ومتقلقيش من موضوع المدونين الجداد
بحب أرعى المواهب المبتدئة
:p
هعيش عليكى بأه


emy

منورة هذا المكان المتواضع
:)
اميين وكل الناس اللى بتمتحن

موضوع امتياز ده موضوع ليه ابعاد مختلفة واتجاهات فكرية ويمس المواطنة والامن القومى وحاجات اخطر من كده بكتييير
خلاصة الكلام..رحم الله امرئ عرف قدر نفسه يعنى وبلاش الافكار دى
:)

الـفجـريـــة said...

سناء باشاا

يا أهلا يا أهلا بالناس بتوع السياسة

ربنا معاكى انتى كمان وشدى حيلك

التاج وصل


اخوانى مخربش

ايوة فعلا بيات امتحانى
ربنا ييسر للجميع الخير ويعيننا كلنا ويخرجنا منه على خير

الـفجـريـــة said...

اهلاااا رشا

فنون دى هناك..هه

عارفة هناك فين طبعا
:)

كما اشتقت أنت للمدونة فصاحبة المدونة اشتاقت لك جداا
لأن حتى لما بشوفك بيكون كده بسرعة

ربنا يعينك وترفعى راسنا فووق
فوق أوى مش فوق بس
:)

-----
نيجى باه لأخر تعليق
أولا..جزاكى الله خيرااا..
:)
ثانيا..انا احترت فيكى يا بنتى
قلت انك سارة او سارة لقيتك دعيالهم فى الاخر

قلت يمكن سالى بس معلش يعنى سالى مش بتقول الكلام الحلو ده فى الأول كده
الا اذا كانت الامتحانات بتغير البنى ادم :p
يارب متكونش هتقرا الكلام ده عشان مضربش
:0
عموما ايا كان مين
فجزاكى الله خيرا ودعواتك

نور جديد said...

أسماااااء
وحشتني مدوناتك اوييييييييي
و انت كمان بفتقدك بسرعة
اولا مش عارفة اقول حاجة غير ان احساسك في التدوين وحشني
و متشكرين يا ستي على مكتب الدعاية اللي فتحتي ده مش تريقة على فكرة بس رخامة
وبعدين يا هانم فرق السن اللي ما بينا ده فايدة انا لو عملت حاجة غلط اهي غلطة اما حضرتك فا غلطتين
و بجد يا اسماء بعيدا عن اي حاجة من اللي فاتت انا بعتز بأخوتك ربنا يخليكي ليه و بجد فعلا اتعلمت منك يمكن حاجات مكنتش اساسا بتخيل اني ممكن اتعلمها بالسهولة دي
و سلامي لخالتو جدا انا حلمت بيها على فكرة
و سلامي لعمو جدا
ادام الله الحب
وعلى فكرة ليكي عندي مفجأة بس مش دلوقتي

نور جديد said...

صحيح يا اسماء نسيت اقولك
احساس ربنا لا تدعنا ده حلو اوي كنت لسه امبارح في موقف كده صعب شوية و يمكن من زمان وانا محستش اني فعلا فعلا بكل الحسابات المنطقية و الروحانية مليش مكان اروحه و لا حد الجلأ له غير ربنا فدخلت مسجد و قعدت اقوله متسبنيش يا رب
يا رب توكلت عليك فلا تكلني لاحد غيرك
وكم كانت رائعة تلك اللحظات التي اشعر انه يقول لي فيها
لم اكلك لاحد

AbdElRaHmaN Ayyash said...

ربنا يوفقك يااااااارب
و انا كمان
و كل سنة و الاخت مروة طيبة
و الكتاب الممتع ان شاء الله هتلاقيه
و المدونة نور جديد كويسة اوي
اما و نشتاق للبوح احيانا
ان شاء الله لما الاقيهم في اي مكانهشتريهم
سلاام

dandana said...

طيب يا ست الراعية المهتمة بالشؤون


واضح اننا لازم نشوف حد يقرالنا ياسين الاربع والحد و..و...

انها مواعيد امتحاناتى...
اقطع نفسى بقى

الـفجـريـــة said...

سلماية

وانتى كمان وحشاانى
بس ايه الكلام الحلو ده كله
براحة عليه يعنى
ده من تأثير المدونة الجديدةيا ستى وغيبة الامتحانات ودخلك يا طير وأحن والكلام ده
انا عارفة يا بنتى
بس اما نشوووف لما تخلص الامتحانات والاجازة ان شاء الله ونرجع للكلية تانى
هيفضل حاجة منه ولا اييه رأيك
:D:D
مش تريقة يعنى بس بحب أغلس انتى عارفة

على كده يبقى انا عاوزة اعرف منك حاجتين لما اشوفك ان شاء الله..الحلم والمفروض اكون ظهرت فيه ولو حتى بعمل باىباى للكاميرا كده او اى حاجة..والمفاجأة التى انتظرها وانا معرفهاش دى

عموما لو ذاكرتى كويس اتنين وتلات مفيش مانع تدى لنفسك جايزة وتنزلى تشوفينا الاربعاء
اظن جايزة حلوة أوىىى
:D

الـفجـريـــة said...

عبدالرحمن عياش


أميين
لقيت كتاب الحمد لله

اما ونشتاق للبوح احيانا
هما حاجة واحدة يعنى مش حاجات
-------
مى..دندنة

لا حول ولا قوة الا بالله
دنيااا
ربنا ييسرلنا كلنا الخير
هتفق مع جدتى بأه تخلصلنا الموضوع ده
:D

اسماء العريــان said...

انتى يا بنت يا الى اسمك اسماء انا دعتلك متنسيش تدعيلى

يا اوختشى انا مش عارفة مين الى اخترع الامتحانات دى

dandana said...

واحد فاضى....
بيشتغلنا

آن الأوان said...
This comment has been removed by the author.
آن الأوان said...

طيب اولا ربنا يوفقك يا اسماء و تجيبى تقدير جيد جدا اهو ماقلتش امتياز


ثانيا ربنا يكرمك وانت طيبه وبخير
ونفضل مع بعض على طاعه ربنا:)

ثالثا فين يا اسماء الكتاب اللى قلتيلى هاديهولك

رابعا مدونه نور جديد سلمى جمييله

و خامسا ربنا يسامحك عشان انا كنت هاشتري كتاب و نشتاق للبوح احيانا و انت قولتيلى لا

يبقى خلاص هاخد بتاعك

:p

همسة قلم said...

ربنا يوفقك ياسمسمة ويكرمك

بالمناسبة وصلتني منك رسالة على المحمول غريبة اوي انا قلت دي اكيد من تأثير المذاكرة :D

ربنا يعينك ياسمسمة ويوفقك وييسرلك كل امورك دايما يارب

أخـــ مسلمة ـــت said...

الله عليكي

الخاطرة الاخيرة جميلة جدا

ما شاء الله

ربنا يوفقك في الامتحان

و يتقبل منك

اللهم أمين

yomna said...

سلام عليكم إزيك يا أٍسماء ربنا يكرمك بجد إسلوبك ماشاء الله جميييل اويي،ربنا يوفئك لكل خيير ودايما للأمام إنشاء الله :)

الـفجـريـــة said...

أسماء العريان

دعتلك يا بنتى
ومستمرييين

انتى عارفة لو على المذاكرة عموما
فمعنديش مشكلة معاها نفسيا
واللى اخترعها مسامحاه
واللى اخترع الامتحانات بردو مسامحاه

هى الفكرة باه فى اللى ربط ما بينهم
يعنى اللى قال ذاكروا قبل الامتحانات
هنا يكمن العداء
:D

مى دندنة

كاتبتلك فى مدونتك انى مش فاهمة تعليقك ده
بس انتى لسه مردتيش
تقريبا ده من اثر المذاكرة ولا اييه
:)

مروة

بصى يا بنتى
يوميها قلتلك هاتى كذا وانا اجيب ده
ونبقى نبدل
نفس الاختراع العجيب اللى بنعمله كل مرة وغالبا مبنبدلش
عشان كده بقول اهوه من دلوقتى
والمعرض على الابواب
جهزى فلوسك
هنجيب من الكتاب الواحد عشر نسخ
ونقرا براحتنا بأه
:D
ثانيا..اللى عاوز كتاب ييجى يا خده
ايه رايك
:p

الـفجـريـــة said...

همسة قلم

ربنا يكرمك يا سمسمة

اما عن الممسج
فخدت بالى بعد مبعتها والله معلش

اصل كانت فى محاولات لايقاظى مكثفة وورا بعضها..يعنى 4 متفقين عليا
فانتهى الامر بمسج ليهم اللى هيه وصلتلك
صحونى كمان ساعة تقريبا
وقفلت الموبايل..صعبو عليا بس مكنتش مستعدةلاى رد فعل تانى

جت فيكى باه
:)


----
أخت مسلمة

ربنا يكرمك ويتقبل دعائك
والخاطرة الاخيرة فعلا بحبها جدا

جزا الله خيرا كاتبها

-----

يمنى

اهلاااا
شكرا يا ستى وجزاكى الله خيرا كمان
سلام كبير ليكى ولخالتو ولعمو ولعز
انا وسمية بنجيب فى سيرتك كتيير
كل شوية
اقولها تخيلى
يمنى بأه عندها عز
تقولى مش متخيلة
ديقتين ونقولها تانى
فضا بأه
:)

جمعاوى said...

أعانك الله

قبحها الله تلك الإمتحانات

dandana said...

تعليقى يابنتى كان زى رد على اسماء العريان وهى بتقول ماتعرفش مين اللى اخترع الامتحانات...؟

بس

سورى انى اتاخرت فى التوضيح...انا بس فعلا مشغولة بالامتحانات


وانتى عاملة فيها ايه

Anonymous said...

مكونتش ناويةأقولك أنا مين وسيبتك تعرفيني من أسلوبي لكن ماأعتقدش إنه شبه سارة أو سارة ولا حتى سالي وعلى فكرة سالي أستاذة كلام حلو وأنا ما جيش واحد من مليون فيها وكنت فكراك هتقولي شيماء أو نهى لإني مش كتبتهم للتمويه
وتفتكريني شيماء ولا حاجة
المهم أنا منى عبد الحي خريجة2007

alfarag said...

نسأله سبحانه ان ييسر لك كل عسير .. وتفرحينا دايما بتفوقك كما عودتينا ..

Anonymous said...

عملتي ايه في امتحان الكهربية عرفت انه كان يوم الأحد
وباقي الناس عملت ايه.طمنونا عليكم
منى عبدالحي

Anonymous said...

جمعاوى

تقبل الله دعاءك
جزاكم الله خيرا

مى دندنة

الحمد لله بخير
هانت
يارب تكونى عملتى كويس فى كل اللى فات واللى جاى ان شاء الله

منى عبدالحى

ياااه..وحشانى خالص يا منى
ربنا يكرمك وجزاكى الله خيرا على السؤال
عاملة ايه ..
انت اللى طمنينا عليكى

امتحان الكهربية الحمد لله عدا على خير
احسن بالنبة للى كنا متخيلينه
وكلنا كويس الحمد لله
شيماء هيه اللى كانت خارجة زعلانة خالص
بس ان شاء الله خير



alfarag

ربنا يتقبل دعائك يا عمو
سلامى لكم
ولا تنسونى فى دعواتكم