ورد الجنينة..اليكم

هوه ممكن يكون مشروع اتأخر

معرفش ليه اتأخر ومعرفش ليه خدنا خطوة فيه ساعتها

يمكن كان نفسنا ابى يخرج يلاقي مفاجأة صغيرة

ايييه الحكاية؟؟

الحكاية اننا عندنا حوالين بيتنا جنينة صغيرة

كان احد اعمامى مهتم بزراعتها لكن بقالها فترة كبيرة مهملة

محدش مركز معاها يعنى

وبعد ما اعتقل أبى المرة دى عدا علينا جناينى وعرض انه يزرعلنا فيها شوية حاجات

وفعلا بدا يزرعها شوية وبقينا بنرويها كل يوم

زرعلنا مساحة صغيرة منها

فيها نعناع وورد بلدى وورد كمان جميل اوى بس مش عارفه نوعه

المهم ان الزرع طلع وبما اننا نعتبر فى الربيع

فهو دلوقتى فى احسن حالاته

وانا راجعة من الكلية من كام يوم لفت نظرى وقلت ان نفسى اوريه لناس كتير كانوا من ضمن احلامهم ان الجنينة دى تتزرع

مش للناس دى وبس

لكن كمان لناس نفسى اهديهولهم واقولهم جزاكم الله خيرا

كل راغب حقيقى وحالم بالاصلاح

الى كل معتقل ومظلوم فى سجون مبارك او بره

أبى وابائى كلهم فى العسكرية واسرهم

قبل الجلسة بيوم حسيت انى محتاجة اهديهولهم مصحوب بشكر كتييير ودعاء

وتنويه صغير بأه

الجنينة دى

هى الارض اللى داس عليها بتوع امن الدولة لما جم البيت يعتقلوا أبى

وكانوا ملينها يمين وشمال

عادى يعنى محصلهاش حاجة

طلعت ورد

طلعت نعناع

وممكن تطلع ريحان كمان

ويمكن فى يوم تطلع فراولة او توت

او مانجه

مش بعيد يعنى

:))))
نتكلم بجد بأه مع ان اللى فات مكانش هزار اوى يعنى

الا اننا لو ركزنا فى اى ارض بقالها فترة مش مزروعة

مش بتنبت

هنلاقى انها فى اى وقت ممكن تغير من حالها ده

الا فى حالتين

فقدت قدرتها على الانبات

او فقد اصحابهم ايمانهم بقدرتها على الانبات

فسابوها

زى نفوسنا بالظبط

لم تفقد قدرتها على العطاء والانبات

لكن ربما فى حالتى وجدت انه انا من فقدت ايمانى بها

وسيتغير ذلك ان شاء الله

اليكم الورود

ناس تانية نفسى اهديلهم ورد الجنينة كمان

اصحاب تعليقات التدوينة اللى فاتت

قرأت كلماتكم ووصلت الى

و تركت فى اثرا كبيييرا

وكل من دعا لى ايضا
اعطيتم لى من وقتكم ودعاءكم

جزاكم الله خيرااا

وأخص منهم وردة لحبيبتى شيماء سمير بمناسبة انها اخيييرا دونت

وعموما الكثيرات من فنون فى طريقهم للتدوين

بس يارب ميتـأخروش

كمان وردة مخصوصة جداا لأمى

:)

واخر حبة ورد لناس مختلفة..وحشنى جدا..بهديهولهم على امل اللقاء قريبا

أفاجأ هذه الايام ببعض من اقابلهم يخبرونى انهم من متابعى المدونة

اتمنى لو كنتم منهم ان تصلكم تلك الورود

افتقدكم

اتذكركم فابتسم تلقاءيا

:)

أيات

رقية

رفيدة

أمنة

أروى

خالتو حفصة

خالتو رانيا

زهراء الزقازيق

واليكم جميعا ورد الجنينة