يا أهلنا في غزة .. نحن معكم

Thursday, May 22, 2008

يحدث فى فنون هذه الأيام


انهارده وبعد مرور 4 أيام من التقييمات العملية المتتالية عندنا فى الكلية الواحد ممكن يكتب شوية أخيراا..المشكلة فى التقييمات متبقاش بالنسبة لى فى الشغل نفسه ولا فى قلق التقييم..بتكون فى نقطة واحدة..هى سياسة تخليص الحاجات..
تخليص الحاجات اللى ورانا بيبقى ليها سياستين..الاولى هى سياسة "اتعب شوية وبعدها خلاص" ودى اللى بفضلها ..يعنى مثلا اقول هركز خمس ساعات واذا عملت فيهم كذا يبقى خلاص خلصنا..والسياسة التانية هى"اشتغل حتى اخر نفس" ودى بأه اكتر حاجة مبحبهاش..بمعنى ان الشغل يكون كتيييير لدرجة ان مهما خلصت هيبقى فى حاجة لسه..ووقت متظن ان اخيرا المادة خلصت تتأكد ان لسه فى حاجة مستخبية هتبان كمان شوية عشان تعملها..
بس عموما يعنى الحالة العامة ليه ولدفعتى هى الانبساط الحمد لله لأن فى أربع مواد كباار خلصوا ولانهم فى أكتر الاحوال خلصوا بنتيجة جميلة..

التدوينة دى هوريكم فيها حاجة من تداعيات ايام التقييمات ..وبالاخص تقييم مادة "رسوم متحركة" . .بدأ الموضوع فى يوم من أيام السنة دى وفى سكشن رسوم بدات الدكتورة تحدد لنا مشروع هنقدمه السنة دى تحت عنوان " أخضر فى أخضر"..دى كانت أول حاجة عرفناها عنه ..وبمرور الوقت بدأ الموضوع يتحدد شوية ونفكر فى حاجات ونعمل تصميمات مبدأية ونعرضها ونصلح فيها..
كان من ضمن أفكار الدكتورة اننا يبقى فى قاسم مشترك بين كل افلامنا الصغيرة وهوه ان خلفيتها الصوتية تكون أغنية لمحمد منير..و بمرور الوقت _ده غير الوقت الاولانى طبعا_بدأت فكرة كل حد فينا تبان وتختلف شوية عن صورتها الاولانية ويمكن احيانا عن العنوان الاصلى ويتغير فيها حاجات وصولا ليوم 21-5 اللى هوه كان امبارح وكان فيه تقييم رسوم متحركة..
قدمنا الحاجات اللى عملناها واللى كان منها الفيلم الصغير..وبغض النظر عن كل الدفعة بلا استثناء مكنتش نايمة اليوم اللى قبليه وفى بعض الحالات اللى قبل قبليه كمان وكنا خلاااص جبنا اخرنا الا اننا كنا عاملين زى الاطفال المندهشين لما اتجمعنا فى اوضة التقييم واتعرضت الافلام بتاعتنا كلها ورا بعضها وكانت جميلة وكمان عجبت الدكاترة..كنا حاسين اننا عملنا حاجة كبيييرة اوى على الرغم من ان الفيلم صغييير اوى ولا تتجاوز مدته الديقتين..وبالرغم كمان من انه....بصوا اتفرجوا الأول وبعدين نتكلم..



لييه قلتلكم اتفرجوا الاول..لان من ضمن صفاتى الرااائعة اللى بحلم اتخلص منها هيه انى غالبا وانا بعرض على حد حاجة عاملاها او عاجبانى لازم اقوله رايى فيها بصراحة الأول واقول العيوب اللى انا شايفاها ..مع ان ده قمة الخطأ خاصة فيما يتعلق بالمجالات الاباداعية زى الاناشيد او الموسيقى او الفنون او الكتابة لانها غالبا بتفرق بين حد للتانى..فليه انقل لحد قناعتى عن الحاجة مسبقا قبل ميشوفها بنفسه ويستقبلها الاستقبال الخاص به..
كنت بقولكم اننا كنا فرحانين بالفيلم اوى رغم انه صغير ورغم كمان انه فيه بعض العيوب اللى كان سببها احيانا تقنى واحيانا فى الاختيارات نفسها واحيانا لضيق الوقت وزنقته..اما جودة الصورة فالمشكلة حصلت عشان الرفع على اليوتيوب لكن هوه فى الأصل صورته افضل من كده بكتييير..
كنا فرحانين كمان لان رسوم دى بالذات كنا حاسين اننا عمرنا مهنخلصها قبل ميعاد التقييم..لكن خلصت الحمد لله على خير..
طبعا مش عاوزة تريأة فيما يخص التتر..وانه رسوم وتلوين اسماء وتحريك اسماء بردو والمفاجأة اللى محدش يتوقعها انه بردو اخراج أسماء..ده نظام التتر يا جماعة..مش هنعترض بأه..اعتبروه نوع من انواع التأكيد
:)
ولا فيما يخص انه غناء محمد منير وما تعطيه تلك الكلمة من احساس ان احنا ومحمد منير كنا فى الاستوديو امبارح بنسجل الاغانى يعنى
الموضوع انه طالما هنعيش حالة اننا بنعمل فيلم
ولو صغير
يبقى نعيشها كاملة بأه
مريم..نهى..هاجر..سارة..نهال..شيماء..سمية..مروة..شيماء 2..دانا..ياسمين.. كريستين ..أميرة ..أمينة..ليديا..
دفعتى
أبليتم بلاءا حسنا امبارح
:)
قبل مامشى بأه..افرجكم على حاجة تانية..الفيلم بتاع سمية..صديقتى الصدوقة التى لم اكتب عنها هنا من قبل و احد افراد دفعتى التمنتاشر..الفيلم بتاعها ده بالذات لييه عندى مكانة كبيرة اوى..وبحب اتفرج عليه كل شوية..يمكن عشان ألوانه اللى بحبها..او عشان كنا فى اغلب الاوقات بنشتغل مع بعض فشفته من ساعة مكان لسه فكرة واسكتشات مبدأية..ويمكن عشان فى كلمات فى الاغنية ولحنها بحسها متفاءلة..عموما شوفوه ودعواتكم فيما هو قادم ان شاء الله..

16 comments:

آن الأوان said...

انا اول تعليييييييييييق

اول مرة اعملها
:)
بس ايه السرعة ديه

و ايه الفن ده

Anonymous said...

bosy ya asmaa2 ya yasser
hwoa t3lee2 w7ed :
ana ba7trmeeek n so proud ane 3rft 7ad zayaeeek .

ياسر سليم said...

السلام عليكم

انا طبعاً مش فنون جميلة .. بس انا شايف انه شغل رائع واتبذل فيه مجهود كبير جداً
ان كان بتاعك ولا بتاع صديقتك سمية

لكن فى تعليق صغير جداً :
بالنسبة للفونت بتاع الاسم والاخرج : اسماء ياسر
ما كانش فيه امكانيه انه يبقى بشكل تانى .. ولا الخط ده مقصود وحاسه انه ماشى مع الفيلم ؟

الـفجـريـــة said...

أن الأوان

اه صحيح اول مرة تعمليها

السرعة ديه
ده شيئ متعودة عليه وبالذات فى تنزيل التدوينات
:)

والفن ده

بردو متعودة عليه يا بنتى
انتى ناسية ولا ايييه

:D
------
Al-m7rab

كان نفسى اعرف انتى مين ولو انى يعنى محتارة ما بين تلاتة اظن انك حد فيهم

اما عن تعليقك
فهنقلبه عليكى

انى انا كمان فخورة بجد انى عرفت ناس زيكم

وجزاااكى الله عنى خيرا

-----
ياسر سليم

وعليكم السلام
ولا انا فنون جميلة على فكرة
انا فنون تطبيقية

وجزاكم الله خيرا على التشجيع ده

اما عن الفونت فهو يستحق الوقوف عنده طبعا

لانه فعلا مش الأنسب و غير مقصود
لكن اللى حصل ان فى يوم من ايام انهاء المشروع كان الوقت مزنوق جدا وكان لازم اخلص التتر يوميها وفوجئت ان الكمبيوتر اللى انا قاعدة عليه مفيهوش فونتات عربى والنت كان فى مشكلة فمعرفتش انزل فونتات ورضيت بالأمر الواقع مؤقتا على اساس انه و فضل وقت اعمله من الاول بالفونتات اللى بفضلها

بس طبعا مفضلش وقت
فقدمته كده

لكن ده من الحاجات اللى ناوية اعدلها عليه فى الاجازة ان شاء الله

جزاكم الله خيرا على الملاحظة دى

muslima angel said...

ana fakhora beko ya bnaat koloko aflamna kanet gamela fe3lan w7seet enena 3mlna mo3geza lma tel3t lel 7yah , asmoo2a wsomayaton felmko gameel mashallah ba sfe3lan ya asmoo2a el font law bas ytghyear hayb2a zareef gdddn ,b7bkom fe allah ya wlad raena ykrmko

Anonymous said...

برافو
فعلا ماشاء الله جمااال

Anonymous said...

اسمؤة
بعد ما ادليتى بصوتك لدكتور بكر على الوان سمية
محدش هيعرف يكلمك بعد كدة
وبعدين متنكريش ان فيلمى بيجبلك حالة
حالة حلوة
مش حالة من اللى باللى بالك
ههههههههههههههههههه
المهم مبرووك لينا كوووولنا والحمد لله
وادعى بتاعى بقا يترفع وربنايقومه بالسلامه من اليوتيوب

مبروووووووك

Anonymous said...

بجد الشغل ده جميل جدا واضح تاثير الكلية عليكوا فعلا بس بجد فناننين واختيار الاغانى حلو اوى والالوان تحفة يارب نشوف شغل احلى واحلى ليكوا والدفعة كلها امتياز فى المادة ان شاء الله


شيماء طلعت

Anonymous said...

برضه مافيش فايده حطيتوه من ورايا على اليوتيوب
أعمل فيكوا أه بس
يابنتى كنت أنصح من مُهيب عمرك شوفتى له حاجة هناك
انت مش مستوعبة ليه ان فى حرامية ومافيا كمان للحاجات دى
والكارتونات اللى بتتحط بتبقى تبع شركات وحقوق نشر محفوظة وحوارات جامدة
لكن هاقول ايه
بالرغم من كل ده فرحت جدا لما شوفتهم بصراحة ; )
أسماء حبيبتى شوفى اللينك ده كده
http://al-ghareeb.blogspot.com/2007/04/1_18.html
وسلام ;)
نهى رضوان

الـفجـريـــة said...

muslima angel

مريومة

مريم هنا فى المدونة..الواحد مش مصدق نفسه يعنى

كفاااية بأه كتابة فرانكو اللى انتى وسمية جبتولى بيها حالة نفسية
:D
ولو انى هعديهالك بردو من منطلق كذلك كنا من قبل فمن الله علينا
:)

الافلام فعلا كانت جميلة وتبسط
بس اييه معجزة انها طلعت للحياة دى

دحنا بأينا بنستخدم استعارات بأه وبنفهم فى العربى
:P
بس بصراحة تعبير قوى اوى
قوى اخر حااااجة
:P:P
اتغاظى بأه
-----

شمس بكره

ربنا يباركلك يا منى
جزاكى الله خيرا

الـفجـريـــة said...

شيماء سمير

ايوة بجد بيجيبلى حالة حلوة
بس انتى ارفعيه بس عشان اشوفه كل شوية

وبعدين اصلا انا لولا قلت للدكتور تعليقى على الوان سمية

الله اعلم كان ايه اللى حصل
:D

أخبار ال 450 ميجا ايييه
يعنى ادامك بتاع سنة كده
:D
-----

شيماء طلعت

اييه يا بنات انتو جايين مع بعض ولا ايه
فنون كلها هنا

جزاكى الله خيرا يا شيمو
واتبسطت انه عجبك

-----

نهى رضوان

الله يسامحك يا نهى ..مش عارفة ابطل ضحك بجد

كل مقرا التعليق اضحك تانى
اصلى متخيلاكى وانتى بتكتبيه

انا بالنسبة لى الموضوع ابسط من كده يا بنتى
يعنى قارنت ما بين انه اول حاجة ليه وعاوزة ارفعها عشان احطها هنا وابعتها لناس وهكذا وما بين انى مرفعهاش واتاكد ان محدش هيعمل بيها حاجة لكن مش هعرف ابعتها وانزلها

واخترت الاولانية
:)

وبعيدن سيبك من كل ده
مهيب وممكن ياخدوا حاجته لاسباب كتيير

لكن حاجتى
هياخدوها ليه يا جميلة
:D
حبة تواضع بأه

اما عن اللينك فشكرا يا نونا
اذا كنتى كملتيه وشوفتى التعليقات هتلاقينى معلقة فيه

بس لقتيه ازاى
بتجمعى عن المدونة معلومات ولا اييه
:)

صحيح..كان نفسى اشوفك انهارده بعد الامتحان..يارب تكونى اتبسطتى
:P:P

ياسمين نعمان said...

ايه الحاجات الحلوة دي يا سمسمة ..
فنانة متعددة المواهب :-)
أخبار المتحانات ايه يا سمسم .. يارب تكوني بتعملي كويس
ربنل يوفقك

نور جديد said...

halloooooooooooooz
ازيك يا اسماء
انا طبعا الفلمين عجبني جدا اصلا
ربنا يتم علينا كلنا باقي الامتحانات على خير ياااااااااارب

فزلوكة said...

ضحيت بالمذاكرة ووقتى الثمين إللى المفروض أذاكر فيه , وقررت
أدخل المدونة أشوف الدقيقة ونص

بجد يستاهلوا
هوا أنا ليا تعليق على النهاية , هقولهولك بس مش هنا
وبالنسبة لفيديو سمية
بجد مبدع , عجبتنى الفكرة أصلا

لكن إيه التطور دا يا أسماء
منير مرة واحدة
كان ممكن تخليها حاجة لفيروز أغانيها معبرة وبعدين يكفى إنى بحبها

بالتوفيق يا ستى فى النظرى
دعواتك بقى

حاجة أخيرة
الفيديو بجد يا أسماء جميل جدا
الكلمتين دول عشان هخلى حضرتك تعلمينى الموضوع دا , لإن بقالى فترة عايزة أعمله
اجهزى بقى وذاكرى كوووووووووويس

هند محسن said...

أسماء حبيبتي وحشتيني
أول مرة اعلق في مدونتك الجميلة
بس الفيلم تحفة فنية مش بأتريأ حقيقي والله إبداع جميل

Anonymous said...

ايه يا بنتى الجمال ده حلوين خالص الفلمين اكثر من رائعين
وطبعا الوان سمية دايما مميزة
وفكرة الفلمين تحفة بصراحة
جهاد