يا أهلنا في غزة .. نحن معكم

Tuesday, October 23, 2007

قوللى امته !!؟ تجربة



قوللى امته!!؟


تجربة بالنسبة لى غريبة


هيه ممكن تكون عادى مش غريبة


لكنها بالنسبة لى كده


كتبتها منذ فترة طويييلة


وقلت أنزلها الأيامدى


انا بجبها جدا على فكرة


مع انها عادية جدا


يمكن مرتبطة عندى بذكرى معينة


ويمكن انى انزلها ده تدريب لنفسى على شيئ ما


المهم كفاية كلام


واليكم

قوللى امته!!؟

قوللى امته هييجى الربيع
واحنا فى زمن
بيقولوا فيه
ان القوى فوق الجميع

أنا رأيى انه جاى أوام
مهو الربيع هوه القوى
شابك ايديه فى كل الأيادى
فى أصغر أوراق نباته
أما الخريف
خاوى وخفيف
وتلاقى كل فرع فيه
مكتوب عليه
أنا القوى
مع انه غرقان فى سباته
...

قوللى امته هييجى الصباح
و احنا فى زمن بيقولوا فيه
ان القلوب زادت جراح
أنا رأيى انه جاى أوام
مهو المرض أوقات يكون
هوا الدوا
وازاى أحس بالشفا
من غير مشوف ضلع إلتوى
وازاى أدوق طعم الحياة
غير لو تشوف عينى الخطر
وأدينا دُقنا الليل ليالى
وقلبى قام من غفلته
حس كأنه محتاجلها
محتاج لدقات الصباح
يفتحلها
ولو الصباح وفى و لاح
صدقنى
مش هيكون لوحده
هيكون معاه
كل اللى راح
....
....




21 comments:

Anonymous said...

ايه يا بنتى الكلام الجامد ده
والله عجبتينى
انا ما كنتش اعرف انك بتكتبى شعر كده
يلا ربنا يوفقك
اختك
نيره عصام عبد المحسن

محمد said...

ما شاء الله

جميلة وثورية

أما آن للخريف أن يرحل
فكلنا ننتظر الربيع

الحرية لأمير بسام said...

ماشاء الله يا أسماء إيه الجمال ده كله .....مش قلنا لطرة سبع فوائد
أهمها تفجير المواهب
أبدعتى

فزلوكة said...

شعر جميل يا سمسم
بجد كلنا منتظرين الربيع
بس يارب يكون على إيدينا إحنا مش جيل تانى غير جيلنا
منظراك تشرفينى فى المدونة وتقوليلى رأيك
وسلالالالالالالالالالالالام

FadFadA said...

فكرني كلامك بكلام لمطر بيقول

الشمس لا تزول
بل تنحني
لمحو ليل آخر
في ساعة الافول
* * *
أقول
يبالغ القيظ بنفخ ناره
وتصطلي المياه في أواره
لكنها تكشف للسماء عن همومها
وتكشف الهموم عن غيومها
وتبدأ الامطار بالهطول
فتولد الحقول
* * *
أقول تعلن عن فراغها
دمدمة الطبول
والصمت إذا يطول
ينذر بالعواصف الهوجاء
والمحول
رسول
يحمل وعداً صادقاً
بثورة السيول
* * *
أقول
كم أحرق المغول
من كتب
كم سحقت سنابك الخيول
من قائل
كم طفقت تبحث عن عقولها العقول
في غمرة الذهول
لكنما
هاانتذا تقول
هاهو ذا يقول
وها أنا أقول
من يمنع القول من الوصول؟
من يمنع الوصول للوصول؟!
* * *
أقول عودنا الدهر على
تعاقب الفصول
ينطلق الربيع في ربيعه
فيبلغ الذبول
ويهجم الصيف بجيش ناره
فيسحب الذيول
ويعتلي الخريف مد طيشه
فيدر القفول
ويصعد الشتاء مجنوناً الى ذروته
ليبدأ النزول
أقول
لكل فصل دولة
لكنها تدول


على فكرة عمرنا ما هنعرف قيمة الربيع إلا لما نشوف الخريف

محمد عبد الغفار said...

هيجوا هيجوا

فقط علينا الصبر على غيابهم وعلى انفسنا

أميرة محمد محمد محمد said...

ايه الجمال ده يا سمسم
ماكنتش اعرف انك شاعره جميله كده
ربنا يكرمك وحاولي تزودي موهبتك
بانتظار مزيد من الابداع

فنان من الأخوان said...

فعلا جميلة
و أكيد هيجي الربيع
و أول المطر قطرة
وعظيم النار من مصتصغر الشرر
وعظيم الجبال من صغير الحصي
والله أكبر ولله الحمد)
)
والله غالب علي أمره ولكن أكثر الناس((لا يعلمون

Anonymous said...

ولو الصباح وفى و لاح
صدقنى
مش هيكون لوحده
هيكون معاه
كل اللى راح


عجبتني اوي الحتة دي ياسمسمة .. بس ماكنتش اعرف انك جامدة كده :)

جميلة ياأسماء ومعبرة جدا

واكيد الصبح لما يلوح هايجيب معاه كل اللى راح وفات وضاع :)

عايزين من ده كتييييييييييير

عشاق الحياه said...

يااااااااااااه سؤال لذيذ حضرتك بس الناس دلوقتي بتسال هو هايجي ولا لأ وطبعا دي مرحلة من الياس مش ينفع اننا نوصلها
هو جاي الصبح هايجي والربيع هايجي
بس السؤال الي يحير هايجي علي ادينا ولا ايد حد تاني...
زي ما حلمناه ولاشئ غريب...
..............................
لا هايجي وبادينا ان شاء الله

بس نصبر ...نزرع امل نرويه محبه...نمشي ونرعي قلوب بنحبها
رغم القرار عايشين..وبحبها بلادي وكل الناس
اصل الحقيقة اني برغم جمال وعز وطعم المر والعسكر
قلبي فتح طاقه امل لكل الناس وكتبت جوايا ببنط عريض
هنا ارضي هنا عرضي وبحبها من كل قلبي الحياه
بايدي يا بلادي هارجع صبحك الضحكان بعزم ولادك اخواتي نرجع زهور القطن تغزل فستان الربيع ليكي
ونمشي ورسنا مرفوعه
ومصحفنا يونسنا..ويحمينا....ويجمعنا علي صلوت

belal said...

ما شاء الله
جميل أوي
نروح احنا نلعب بعيد بأه
..

الـفجـريـــة said...

نيرة
وضاح
زهراء أمير
فزلوكة
فضفضة
أ.محمد عبد الغفار
أميرة 3محمد
فنان من الاخوان
سمسمة
عايش
أخ بلال


جزاكم الله خيرااااا يا جماعة على التشجيع
انتو ناس طيبين
كده ممكن اتشجع وانزل كل المحاولات العجيبة اللى عملتها
من زمان لدلوقتى
وعليكم استيعابها بأه

هما فعلا هييجوا هييجوا
لدى ثقة فى ذلك
بس زى المعنى اللى فى تعليق أ.محمد عبد الغفار..ان علينا الصبر على غيابهم وعلى انفسنا مع بذل كل ما نستطيع لمجيئهم
نفعل ذلك بيقين الواثق فى ان القادم افضل
ولكنه يجتهد ليكون من صانعيه

شكر لـ أ.محمد(فضفضة)لأن قصيدة مطر دى أول مرة أقراها وجميلة جدا

فوضى منظمة said...

جميل .. استمري في الكتابة .. بالتوفيق

Unknown said...

من القلب على اللسان جاري ده10/10 أيه الكلام ا

سناالإسلام said...

ما شاء الله...رائع يا سمسمة
ننتظر الباقى

أغنية الحيـــاة said...
This comment has been removed by the author.
أغنية الحيـــاة said...

السلام عليكم ورحمة الله وبركاته
جزاك الله خيرا
بجد كلام جميل جداااااااااا
بجد كلامك دخل القلب أووووووي
وحسيت زي ما يكون طالع مني

......
عموما ده اللي حسيته في كل تدويناتك
أنا أول مرة أعلق
لكن مش أول مرة أقرأ
ربنا يكرمك

آن الأوان said...

ايه بس يا اسماء الفن ده
جميله اوى
وبتفكرنى ب "مسجدى هو حياتى"م

الأستاذ said...

والله أعلم
أقدر أقولك لما نفكر إننا نفكر في تغيير الروتين وبعدها نفكر في تغيير الكلام والأفعال والتصرفات
والعادات والتقاليد القديمة المحبطة والأخريات المكتسبة
وبعدها نبقى نغير طريقة تعاملنا ونشوف هنقدر نغير اللون الاسود للأبيض ولا لأ؟؟
كلماتك حلوة واستمري في ده وإن شاء الله كلماتك ممكن هي اللي تغير ده
مع أطيب تمنياتي بالتغيير
تحياتي

Anonymous said...

تجربه جيدة وشعر جميل ملئ بالمشاعر .. لكن صراحة كنت اتمنى ان يكون باللغة العربيه الفصحى .. خسارة كلماتك المؤثرة دى باللغة العاميه

الـفجـريـــة said...

فوضة منظمة
mazlomen
سنا الاسلام
أغنية الحياة
م.فرج

جزاكم الله خيرا على التعليق والتشجيع
وبالنسبة للباقى
فانتم اللى جبتوه لنفسكم
اما اللغة العربية
فليه تجارب باللغة العربية واخرى بالعامية
حسب ما اشعر به اثناء الكتابة

الأستاذ

جزاكم الله خيرا
بس هل مينفعش
اننا نمشى
فى كذا قناة من قنوات التغيير فى وقت واحد
؟؟
لأننا هنلاقى ان انتظار تغيير شيئ متأصل فى نظام مجتمعنا زى الروتين مثلا يحتاج لسنين لتغييره وحده


أن الأوان

المفروض أضحك بأه يعنى
:0
:0
بكره تدورا على حد يألفلكم اغانى وتقولوا ولا يوم من ايامك يا اسماء
:1
:1