يا أهلنا في غزة .. نحن معكم

Saturday, March 22, 2008

شكر..ميلاد..نجاح..سلام..انطلق

شكر

لأصحاب تعليقات التدوينة اللى فاتت وشكرهم ده لسببين ..اولهم انهم أكدوا لى ان التدوينة مفهومة..عشان فى كذا حدا (ياريت يبقوا هنا وبيقروا دلوقتى وواخدين بالهم :) )حسسونى انها محتاجة مترجم او اعادة تصنيع..بس الحمد لله طلعت ماشية تمام..وثانيهم..تعبيركم الرقيق عن تواصلكم مع المدونة ولو انكم اعطيتمونى فى كلماتكم الكثير مما لا استحق..جزاكم الله خيرا

ميلاد

هنا ومن سنة فاتت بالظبط..كتبت التدوينة دى..كتبتها عشان أقول لأبى كل عام وأنت الى الله أقرب..بمناسبة يوم ميلاده..
ولأقول له

أحبك قدرَ حجارِ السجون
وقدرَ الفراق
وقدر هطولِ دموعِ العيون
وقدر شعوبٍ
أمام الطغاةِ تحبُ السكون


أخبره
انى اعلم أنه يرضى الوجود
خلف القيود
ليبدِل مقاييسَ حبى القديمة
بأخرى جديدة
بلا منتهىَ
ليصبح وطنى ورغم الهِرم
بروحٍ وليدة
كروح الحياة
لأصبح أحبك قدرَ الأمل
وقدر ظلامٍ قد انقشعَ
وقدر النظر فى وجوه الأحبة
ونحن معا
وقدر تَنُقلِ تلك العقارب
ما بين ظلمة..كضيفٍ ثقيل
وما بين فجرٍ كحبٍ قديم
نريدُ به أن نجتمعَ

بعض النظر عن المستوى الادبى
اللى متأكدة ان أبى ان شاء الله هيعديهولى
عاوزة أقوله حاجة

صحيح وحشتنا ووحشت البيت
بس بجد جزاك الله خيرا
جزاك الله خيرا على حاجات كتير


وعلى انك اخترت الطريق ده ومشيت فيه
:)
والشكر موصول لأمى الحبيبة
لاسباب اكثر من قدرتى على العد

كل عام وأنتم بخير
:)

ملحوظة لاحظتها السنة دى..السنة اللى فاتت لما ابى تم 52 اعدوا هناك يهزروا وعمو عصام عبد المحسن يقول دول 25 ..والسنة دى لما هيتم 53 ممكن يهزروا ويقولوا 35 لكن المفاجاة يابابا ان ربنا يباركلك ان شاء الله لما ربنا يقدر و تتم 55 مش هتعرفوا تعملوا حاجة..تجيبوها كده 55..تجبوها الناحية التانية بردو 55..لن يصبح امامكم سوى الاعتراااف


نجاح

النتيجة طلعت اخيييرا يا جماعة
جبت جيد جدا
وترتيب الرابعة الحمدلله


ممكن حد يسألنى ببراءة:طب هوه انتو اصلا قسمكم كام حد
لأ
رد ببراءة بردو واقول: 18
ومع اعترافى باننا تمنتاشر الا ان ذلك لا يمنع ابداا من بعض الدهشة حول فكرة انى الرابعة
مش على اساس انها انجاز مش طبيعى
لكن على اساس انها انجاز مش ناوية اكرره كتير


سلام

أحببت ان اختم به التدوينة
سلام ارسله اليه هناك
هناك وسط كل من احب ممن سبقوه على الطريق
ممن صدقوا عهدهم مع الله فصدقهم الله
نحسبهم جميعا كذلك ولا نزكى على الله احدا
شيخنا وأبانا ومعلمنا أحمد ياسين
سلام لك فى ذكرى استشهادك
يوم ان قلت لنا بالفعل لا بالكلمات
ان من صدق العزم نال المراد
وان روح الانسان لا يمكن قهرها الا اذا اراد هو ذلك
يوم هجرت الشاطئ الآمن الهادئ
ودخلت فى عمق البحر
لتكتب لنا بروحك
ان السفن تكون فى موانئها آمنة
ولكنها لم تخلق لذلك

ابعث بسلام لا يستمد قيمة من انه منى بتقصيرى وبعدى
ولكنه يستمد قيمته من انه اليك يا من عشت عظيما ومت عظيما



33 comments:

محمود سعيد said...

للوالد
عقبال 100 سنة
وساعتها هيكتبوها
001
ونبدأ نعد من تانى


وألف مبروك على النجاح
عقبالى كده يارب من غير لا رابع ولا خامس

محمد said...

أرى أنك يمكن أن تستعيضي عن الخمس كلمات في العنوان بكلمة نجاح .. فأظنها تجمع كل ما قلت

بارك الله فيك وفي والدك وفك أسره قريبا

Anonymous said...

اولا

كل سنة وعمو ياسر بألف خير
وكل عام وهو الى ربه اقرب واقرب وربنا يفك اسره قريبا ياسمسمة يااااااااااااارب

وثانيا
ألف مليون مبروك النجاح ياقمرة وعقبال التيرم التاني والتخرج يارب بس الرابعة دي قليل عايزين الاولى ان شاء الله حتى لو كنتم اتنين بس في الدفعة :P

واما الثالثة

فرحمه الله رحمة واسعة وجمعنا به في الفردوس الاعلى

حقا اشتقت اليه كثيرا

وليكِ انتي كمان :)

صاحب المضيفة said...

بارك الله لك في والدك وفرج كربه يارب واخوانه


ومبروك النجاح الكبير ويارب من نجاح لنجاح



وألف تيحة لشيخ فلسطين الشهيد المجاهد احمد يس



دمت بخير

Anonymous said...

أولا
كل عام ووالدك ووالدتك بألف خير..
كل عام وهما وأنتِ إلى الله أقرب
وعلى طاعته أدوم
كل والوالد بينكم.. لا يحرمكم منه شيء
...
وإن شاء الله ممكن يحلوا موضوع الهزار ده... بس بره بإذن الله :)
---
وألف مبروك النتيجة
وفعلا إنجاز جميل
وربنا يديم النجاح
---
ياسين...
إليه ألف سلام
((ان السفن تكون فى موانئها آمنة
ولكنها لم تخلق لذلك))
نعم.. خلقت للإبحار.. ترسو قليلا.. لا لشيء سوى الاستعداد للإبحار القادم
...
مهما أرسلنا من سلام، فلن يستمد قيمته إلا من أنه إليه هو... في صحبته المباركة.. هناك في الفردوس الأعلى...
له ألف ألف سلام

أحمد الدريني said...

المناسبة سارة
الرجل ينتمي لبرج الحوت،وهو إذن أب محبوب بصورة غير منطقية..وهدوء ملامحه وجمال سمته اصبح مبررا لي..الآن علي الأقل
انا شخصيا كتبت عن عيد ميلاد بابا لما كان في السجن
خرج بعدها ب3 ايام
نستبشر خيرا ونسأل الله ان يتكرر الأمر..
ولو من باب الفأل الحسن

الـفجـريـــة said...

محمود سعيد

لما اقول لبابا على موضوع
001
هيتبسط
هيحس ان الموضوع مازال تحت السيطرة

اما عن النتيجة
فان شاء الله خير ويمكن امتياز ولا حاجة

-----

وضاح

لو جاءت لى فكرة"نجاح" قبل كتابتها لما ترددت فى وضعها كعنوان

هى فعلا بتجمع كل الحاجات
ربنا يتقبل الدعاء

الـفجـريـــة said...

سمسمة

الله يبارك فيكى ويكرمك يا اسموءة

اما عن موضوع الاولى
اذا كنت بقولك يا بنت الحلال
ان فكرة الرابعة دى مش ناوية اكررها كتير
تقومى تقوليلى الاول
دنتى طيبة اوى
:)

انا كمان نفسى اشوفك..ربنا يجمعنا على خير فى الدنيا والاخرة ويجمعنا مع شيخنا احمد ياسين

على فكرة..لما قلتيلى اقول لماما قلتلها وهيه بتسلم عليكى كتييير وبتدعيلك

-----

صاحب المضيفة


جزاكم الله خيرا
والله يبارك فيك ويتقبل دعاءك

الـفجـريـــة said...

اسلام ناجح

اه منا قلت لبابا فعلا
اخرجوا وبعدين نتفاهم فى موضوع السن ده
ان شاء الله يبقى 18
هنعديها ساعتها

اما عن الشيخ احمد ياسين فعلى الرغم من ان الجملة بتاعت السفن دى صاحبها غير مسلم وربما لم يسمع عن شيخنا احمد ياسين الا انى متأكدة انه لما يشوف تجربته مش هيلاقى مثال حى على جملته دى اوضح وارعظم من كده


-----

أحمد..فيه ما فيه

مبعرفش فى صفات الابراج
ولا بقتنع بيها يعنى

بس طالما بيقولوا ان بابا اب محبوب بصورة غير منطقية
هيخلوا الواحد بعد كل العمر ده يغير رأيه ولا ايه
:)
اما عن فكرة الثلاث ايام..هيه الجلسة معادها بعد مكتبت التدوينة بتلات ايام
فلو تحققت وخرجوا ان شاء الله

محتمل ان تصبح تلك الطريقة من وسائل المعارضة المصرية فى الفترة الجاية

Anonymous said...

السلام عليكم يا سمسم
وحشاني جدااااااااا
.....
زي ما قلتلك وهقولك دايما
بتقولي اللي ببقى محتاجة أقرؤه
حقيقي مش قادرة أنقلك إحساسي
...
تعرفي أنا مكتبتش في البوست اللي فات ليه ؟؟
أولا علشان أنا واحدة من اللي محتاجين مترجم :)
وثانيا بقى علشان كنت متأكدة بإذن الله إني هقرءلك بوست قريب أوي

كل ما افتح النت افتح الفجرية يمكن أسماء تكون قررت تتعطف عليا وتفكها وتكتب

عموما
كل عام والوالد على الطريق بإذن الله
وربنا يفك أسره وأسر إخوانه جميعا

وألف مبرووووووووك النجاح

إني أحبك في الله يا سمسمة

الأزوري said...

الف مبروك لنجاحك وربنا يفك أسر أخونا الوالد ويجمعنا مع شهيدنا ياسين في الجنة شهداء ان شاء الله
منتظر زيارتك لمدونتي المتواضعة ومعرفة رأيك فيها

أبوبكر حمدى said...

بسم الله الرحمن الرحيم
أولا أعرف نفسى أخوكم أبوبكر حمدى كمال
المنصوره
ثانيه تخطيط عمرانى جامعة القاهره
جزاكم الله خيرا يا أخى على هذى المقاله وربنا يجعلها فى ميزان حسناتك ونتمنى المزيد
أخوكم : أبوبكر

alfarag said...

الف الف مبروك النجاح

Anonymous said...

مبروك النجاح يا أجمل سمسم في الحياة
وليكي مني يا سمسمة
كلمة قد النمنمة
بحب فيك النظرة الباسمة
والطفولة اللي جواكي كامنة
ولحظة ما بتندهي يا منى
بحس برقتك المش ممكنة

كل سنة وأبي بخير
وفوسطكم إنت وماما

Anonymous said...

صحيح يا عم ايه الكلام الجامد ده و شهادة حق كلماتك هذه المرة رائعة وقوية وأثرت فيه
بالأخص عن بابا وعن الشيخ يس
لكن موضوع انك الرابعة فانت فعلا أنا نش هسمح لك تكرريه لانك ان شاء الله تبقي الاولى علطول
وبمناسبة الاخبار الحلوة دي أنا بقيت خالة واد اسمه أسامةبلغي الجميع وسلميلي عليهم

Anonymous said...

اسماااااء
اولا ازيك يا أسمءة وازى خالتو وعمو
يارب تكونو بخير
ده على اساس انى بقالى كتير مشوفتكيش
ثانيا بقى كل عاااااااااام وعمو ياسر بخيييييييييييير والى الله اقرب وعلى طاعته ادوم والى قلوبنا احب
ومبروك يا دحيحة هانم على المركز الرابع
ويااااااااارب سلامك وسلامنا يوصل للشيخ الشهيد ونقابله كمان فى الفردوس باذن الله
اسمااااااااء انتى وحشااااانى موووووت
ونفسي اقعد معاكى زي زمان
بس للاسف اسماء الجديدة مش فاضيه زى فبل كدة
ياااااااا رب يوفقك يا رب يا اسموءة ويعينك على كل خييير ويا رب يكرمك فى كل اللى وراكى
انا عايزة اقولك انى فعلااااا بدعيلك
وانى متأكدة انى الفترة المشحووووونة دى هتعدى هتتبقى احسن من الاول باذن الله
زيها زي فترات كتير جت وعدت على خير
وانك ادها و اداكتر منها كمان


سارة كمال

نور جديد said...

السلام عليكم
ازيك يا أسماء
بما أني من اللي علقوا في التدوينة اللي فاتت .. فجزانا و إياكم
ثانيا .. عمو ده و الله يعني .. بصي هو كل عام و هو الي الله أقرب و على طاعته أدوم و إالى الجنة أقرب و عن النار أبعد .. آمين يا رب
و مبروووووووووووك يا كتكوتة النجاح و في هذه المناسبة أحب اهدي سلامي لأمي و أبويا و خالتو أمنية و ابن عمة أبويا و ابن أم أيمن و ...... و أهديلك نشيد جينا نبارك بنجاحك .. بجد اسمعيه مني
أما الشيخ أحمد ياسين فأنت جيتي على الجرح و الله يا أسماء
مفيش في دماغي خاطرة معينة عن النقطة دي .. بس في مشاعر كتير أوي اتجمعت يا اعرف اوجهها صح

أبوبكر حمدى said...

بسم الله الرحمن الرحيم
أخوكم أبوبكر حمدى
المنصوره
ثانيه تخطيط عمرانى جامعة القاهره
مقيم الأن فى الجيزه
جزاكم الله خيرا على هذه المقاله ونرجوا المزيد يا أخت أسماء
أخوكم
أسألكم الدعاء

AbdElRaHmaN Ayyash said...

:)
كل سنة و استاذ ياسر بصحة و سلامة
من سنة قلت
:
ان شاء الله قبل 53 تكون بيننا ووسطنا ويكون الهم انزاح من على مصرنا كلنا
-----
لكن واضح ان لسه شوية
ربنا يستر يارب
---
بس سنة عدت بسرعة اوي
:( ياترى عدت عليهم جوه ازاي؟؟

AbdElRaHmaN Ayyash said...

:):) صحييح
الف مبروك على النجاح
ربنا يكرمك ياارب و يوفقك
:D:D بس 18 مش قليل
طيب هو في تعيين ؟؟؟
وللا التمانتاشر بيبقوا معيدين ؟ :D:D

ياسر سليم said...

كل سنة وعمو ياسر طيب وبخير

وألف مبروك على التقدير والنجاح

وربنا يرحم الشيخ احمد يس ويلحقنا بيه على خير

shaimaa samir said...

عمو ياسر
يااااااااااااااااه
ربنا يباركله
ويديم عليه عافيته
ويثبته
كل عام وهو الى الله اقرب

مبرووك يا سمسمة النجاح
مع انى ماخدتش ملبس ولا كارت امبارح
استغليتوا نزولى ووزعتوا
لما اشوفك النهاردة

اما الشيخ احمد ياسين
مممممممممم
فالكلمات فيه اقل تعبيرا مما يستحق

اخيرا
مكتبتيش عن البروباجانداالعظيمة
برضو لمااشوفك النهاردة

فزلوكة said...

سمسم

أنا ضايعة من غير الموبايل
اكتشفت قد إيه مهم بالنسبة ليا

rofayda said...

أسماء الحبيبة ..أو النسمة الرقيقة

هكذا أصف من عشت معها أربعة أيام

وكأني أعرفها منذ أمد بعيد

أسأل الله أن يرزقنا حبا خالصا لوجهه الكريم

وأن يجمعنا على منابر من نور

--------
سلامي لعمو كثيرا ربنا يجعله ممن يطيل في أعمارهم ويحسن في أعمالهم
--------
ومبارك النجاح والتفوق يا حبيبتي جعله الله عزة للإسلام والمسلمين
ونفع بك الأمة
--------

كلمة السر (مافيهاش حاجة يا أسماء) فاهماني يا افندم ;)
--------

الـفجـريـــة said...

الاول معلش على التأخير..الكلية الايامدى وقتها غرييييب
بس ان شاء الله هتفرج قريبا

شيماء

الاول بس عشان نبقى على نور
شيماء طب
يا رب يكون صح
عموما هوه غالبا صح
:)
الاول جزاكى الله خيرا على الكلام ده
وبكون محتاجة اكتب واتواصل معكم اكثر مما تتخيلين
بس الكلية الايامدى بتتبع سياسة استنزاف الطاقات
:(
عموما ربنا يفرجها
والله يبارك فيكى
وطبعا بما انى خلاص اقنعت نفسى انك شيماء طب يبقى سلميلى على رفيدة

-------

3laa shehata


جزاكم الله خيرا
وربنا يتقبل دعواتك

الـفجـريـــة said...

أبو بكر حمدى

جزاكم الله خيرا

-----
alfarag

الله يبارك فى حضرتك

-----

شمس بكره
او خالتو بناءا على ظهور اسامة
:)
اولا جزاكى الله خيرا يا منونا

ثانيا بأه
مش عيب عليكى يا شيخة
لما تكونى عارفانى وبيننا عشرة
وعيش وملح وسندوتشات شبراوى
وتقوليلى الاولى ومش هنسمحلك ومش عارف ايه
انتى عارفة انى _ودفعتى طبعا_اكب وارقى من الكلام ده بكتييير
:D
عموما ربنا يقدر الخير
وسلمى على اسامة ومامته سلام كبير
وفى انتظار صوره فى الكلية سريعا

الـفجـريـــة said...

سارة كمال

قريت تعليقك كتييير
كتير كتيير
وبحاول اخلينى اصدق ان انتى اللى كاتباه فى كامل وعيك وقواكى العقلية
:p
هبطل غلاسة
من غير متقولى
:)
بصى يا سارة انتى وحشااانى اكتر مع اننا بنتقابل كل يوم فى الكلية بس يمكن الوقت ضيق عن الاول بجد..لكن فى نفس الوقت فيه حاجة بات بتجمعنا مختلفة عن الاول..حاجة اعمق..
الفترة دى انا متاكدة انها هتعدى ان شاء الله زى منتى قلتى..بس يارب تعدى زى محنا بنحلم بيها
:)
عارفة افتكرت ايه دلوقتى وعمالة اضحك

صااعقااا
صااعقااا

:D:D

وحاجة تانية كمان بس خليها لما اشوفك لحسن تضربينى
-------

سلماية

منى وسارة وسلمى ورا بعض
فنون كلها هنا ولا ايه
منورييين
:)
فى انتظار انى اسمع جينا نبارك بنجاحك الللى اهدتيه لمصر كلها
وربنا يجازيكى خير عنا يا بنتى
دايما كده واخدة بالك مننا

وربنا يتقبل الدعوات

الـفجـريـــة said...

AbdElRaHmaN Ayyash

هوه واضح ان لسه شوية فعلا
بس مش كتير ان شاء الله

اما عن السنة اللى عدت..فهيه فعلا عدت بسرعة جدا..وزحمة جدا جدا..واظنها بالنسبة لهم فى المعظم هما كمان كده
مسألتش وعرفت من كل الناس
لكن ده انطباعى
الناس جوه روحها عالية ما شاء الله
ربنا يديمها عليهم

اما عن النجاح
فالله يبارك فيك

لأ مش قلبل خالص طبعا
ده حتى الدكاترة بتتلخبط فى الناس
هتعرف مين ولا مين دول تمنتاشر

:)

------

ياسر سليم

وانتم بخير
والله يبارك فيك ويتقبل دعاءك

الـفجـريـــة said...

شيمووءة

لا ده كده فعلا فنون منورة كلها

هسلملك على بابا ان شاء الله سلام كبير زى موعدتك
انا رايحة بكره ان شاء الله
احضروا انتو بأه المحاضرة التانيةوناموووا
:P
على فكرة البومبونى اللى انتىبتقولى عليه ده انا معرفش عنه حاجة
فيه ناس بتشتغل من ورانا
:D
والبروباجاندا بأه..اصبرى على رزقك
كله جاى فى السكة ان شاء الله

-----

زهروءة

اعتراف واضح انه صادق اوى
:)
يا ريته يبقى سامعك دلوقتى
:D

على فكرة بحاول اوصلك عشان تخديه..وكلمتكم انهارده ملقتكيش..وقلتلهم انى رايحة بكره الزيارة بس طلعتم مش رايحين بكره..كلمينى انتى بس ونتفق على اى مكان
تسلمى البضاعة
تستلمى الموبايل
:0:0

----
رفيدة..روفى

اهلاااا
لسه انا وسمية عمالين نتكلم عليكى انهارده
ونفتكر حاجات
كانوا اربعة ايام لا ينسوا
ربنا يجمعنا على خير فى الدنيا والاخرة

ربنا يتقبل دعواتك
اما عن كلمة السر
فتعرفى انى لسه لغاية دلوقتى باخد راى ناس
فممكن نغيرها ونخليها
ارحمينا يا اسماء
تبقى اوقع
:D:D

rofayda said...

لا انا مصرة على رأيي

مفيهاش حاجة يا فندم

بجد وحشتيني جدااااااا

Anonymous said...

اسموءة حبيبتى كل سنة وعمو ياسر بألف خير.تدوينة جميلة جدا. ممكن بقى بالمناسبة دى ابعت سلامى الشدييييييييد لرفيدة.ولو كان الموضوع هو اللى فى بالى فبجد ارحمينا يا أسماء.وتحية كبيييييرة اوى لشباب فنون تطبيقية احسن ناس.سالى

rofayda said...

ربنا يكرمك يا سالي ..

يااااااه

اللهم لك الحمد على نعمة الحب قيك

على نعمة الاجتماع عليك

وعلى نعمة التفرق عليك

اللهم لك الحمد كما تحب وترضى
--------

أسماء: مافيهاش أي حااااااااااجة :P

fenoooon said...

سمسمة

حقيقي التدوينة رائعة
الف مبروك ليكي النجاح يا سمسمتي
ويارب دايما
وتعمليها مرة وتطلعي الاولي
:D

وكل سنة وعمو طيب
وربنا يبارك في عمره ويتقبل اعماله ويجعلها خالصة لوجهه الكريم
وحقيقي كلماتك جميلة واحساسك رائع

والشيخ ياسين
تاثرت جدا بالكلمات وبالذكري


التدوينة كلها جميلة
ربنا يعزك