Sunday, April 15, 2007

صورة بعدسة خلفية



المكان...امام نقابة الصحفيين



الزمان..الساعة 5 (بس للمتاخرين امثالى بتبقى 6الا تلت)0


المناسبة ...اعتصام للتضامن مع أ.عبد المنعم محمود والمدونين اللى مرفوع قضية ضدهم لغلق مدوناتهم


صحيح العدد كان قليل


لكن بالنسبة لى كان يوم مميز لأنها أول فعالية تخص المدونين أشارك فيها




وثانيا لحدوث تطورات وندوة وكلمة أقولها وبالنسبة لى ده حدث وخطوة مكنتش متخيلة انى ممكن أعملها..عدت على خير الحمد لله




وسط مكل ده شغال ..فيه هتاف وفيه ناس بتصور وهكذا..ولما اتضح فى اجابتى للتاج المبعوت من أمل غنيم انى مبعرفش اركز فى حاجتين..




كل الناس عمالة تصور الاعتصام وانا ادامى اختيار ياما أركز يإما أصور..قلت أعمل الاتنين


فطلعت صور غريبة الاتجاه..




الاعتصام من ظهره..




من عدسة خلفية..




بس دى مفيدة فى التقارير الأمنية..نبعتهالهم..محدش عارف حد
المهم اليكم الصورتين




تمنيت أن نستمر..ونخطو خطوات أخرى..بنفس الحماس والامل
حتى يفرجوا ليس عن أفراد فقط
ولكن عن مصر كلها
تحديث
نزلت تدوينات عن الوقفة ودى لينكاتها
بعد قراءتهم وجدت انى فعلا اذا نظرت للموضوع كاعتصام وتقييمه هجد فيه سلبيات كثيرة فعلا وأراء مختلفة عشان كده
حدث شيئ من التغيير فى أمنيتى التى ذكرتها فى أخر التدوينة قبل التحديث وأصبحت بتمنى اننا نستمر ونخطو خطوات جديدة
بنفس الحماسة والامل والتنظيم والفهم

26 comments:

مصراوي أوي said...

للاسف الدعاية لم تكن علي المستوي المطلوب لهذة الوقفة ........مش عارف ليه؟؟ وتحياتي لتغطية هذا الحدث والشئ اللي بيبدأ صغير اكيد بيكبر لو اتخطط صح وسلام الله عليكي

مواطن من قاهرة المذل لعبيد الله said...

السلام عليكم
اخت اسماء انا عايز انصحك نصيحة يقوم بتقديمها لكل الاخوان لما اشوفهم
1- لا تتنازلي عن حلمك اي لازم في يوم يفرجوا عن مصر مهما كانت السلبيات اللي احنا بنوقع فيها
2- ممكن نغير تكتيكاتنا ممكن نغير خططنا لتنسجم مع واقع جديد مفروض علينا
3- ممكن ناجل بعض الاحلام لفترة ابعد
4-ممكن نشوف الدنيا في يوم سوداء وكمان فيها رياح خماسين
قد تكون رياح الخماسين مقدمة لفصل الربيع وتفتح الازهار
كلمتين لشيخ محمد الغزالي
1- ان السماء الملبدة بالغيوم يتولد منها برق مضيئ
2-ان اعشاب البحر لا تمنع البواخر العنلاقة من المرور
3- كلمة للاخت اسماء ياسر عبده
كل حالكة ليل و ليها اخر ...يعني هانت يا جماعة
ركزي علي حلمك الكبير و اسعي لتحقيقه
و لا تلتفتي للخلف ده طبعا لانك لا تركزي في حاجتين في وقت واحد بيقي لازم تختاري انك تركيزي علي حلمك
(يفرجوا عن مصر كلهاو عن كل المعتقلين)
اخ و مصري و حيران و خايف ميلحقش يحقق احلامه

سناالإسلام said...

أزيك يا أسماء وحشتينى ...خطوة متميزة فى طريق التغطية الاعلامية
سدد الله خطاك لا تنسينى من دعائك

Anonymous said...

جزاكى الله خيراااااااااا يا اسمؤة وربنا يثبتك دايما ويعز بيكى الاسلام
آمييييييييييييييييييييييين

elfagreya said...

مصراوى أوى
لأنه كان فى استعجال فطبيعى متمش الاعلان عنه كويس بس ان شاء الله يكون القادم افضل

مواطن
نصيحتك رائعة اخى الكريم..جميلة ان أعشاب البحر لا تمنع البواخر العملاقة من المرور
أضيف كلمة لسه سامعاها وكنت يوميها فعلا عمالة افكر هل جوانا خوف فى بعض الاوقات وهل بنخاف قبل خطوة زى اعتصام مثلا ونكون قلقانين لكننا فى نفس الوقت لا نرتاح اذا مخدناش الخطوة دى فوجدت هذه الكلمة التى ثبتت فى عقلى منذ قراءتها

تنعم السفن فى الموانئ بالأمان ولكنها لم تصنع لذلك

elfagreya said...

سنا الاسلام

وانت كمان وحشتينى جدا جداا..جزاكى الله خيرا على التشجيع

سلامى لكم كتييييير

مجهول
واياكم وربنا يتقبل دعائكم

ميت said...

http://www.youtube.com/watch?v=lYGAORJk950
كلمتك في المؤتمر

مواطن من قاهرة المذل لدين الله said...

السلام عليكم
أخت أسماء فعلا لم تصنع اتلسفن لتظل في الموانئ
ونحن لم نخلق لغير فكرة نحملها ونتحمل في سبيلها كل ما يحدث لنا او سيحدث لنا
و لكن للخروج من حالة شبه اليأس في نشيد رائع علي موقع طريق الأسلام اسمه لا تحزن وده اللينك بتاعه أعتقد انه مفيد في الحالات دي
http://www.islamway.com/?iw_s=Nasheed&iw_a=view&songstape_id=308

محمود سعيد said...

سبق تدوينى طبعاً العدسات الخلفية ديه :-)

انا بعت لحضرتك تاج غلس شوية بالمناسبة

tasneem said...

أزيك يا بنتى يا حبيبتى إن شاء الله تكونى بخير عاملتى أيه فى التسليمات إلى عليكى يا رب تكون أمتياز و لو سمحتى تطمنينى على طول
نرجع للبوست بأه كده تكون ليكى كلمة و ما تقوليليش ده أنا كنت سبت الكلية و جيت علشان أحضرها و أصورها فيديو هو أحنا نطول نسمع للبشمهندة أسماء أما عن الحضور فده كان ناتج عن ضعف فى الدعايا و التنظيم و الأستعاجال و جزاكى الله خيرا كثيييييييييييييييييييييييييييييييرا بجد كلامك أمبارح ريحنى جدا بالرغم إنك إنى أنا إلى مفروض أصبرك و رب أخ لم تلده أمك فعلا أنا حسيت بالحكمة ديه أمبارح و اللهى ، يا رب يكرمك و تحققى إلى نفسك فيه و طبعا يفك أسر عمو و أسر إخوانه و إنى أحبك كثييييييييييييييييييييييييييييييييرافى الله ، و سلامى لخلتو و ليكى و لعمو لا ينتهى
و السلام عليكم

احلم معايا said...

جزاكم الله خيرا .......ربنا يتقبل.بصراحة في حاجة ماعجبتنيش في الرسالة الرئسية للوقفة وهي افرجوا عن (المدون) عبد المنعم محمود...لان منعم ماتخدش علشان هو مدون ولكن علشان هو اخوان ...حتى الاتهامات الهلامية المهلبية بتاعت العروض العسكرية (شكلها بقت موضة اليومين دل)هي في الاخر اتهامات خاصة بالاخوان


تاسو بيدون يارجالة
http://e7lmma3aia.blogspot.com

muslima said...

gazaky allahu khayra ya asmo2a w rabena ykrmk ya bnty w ythabetk ana mariam

elfagreya said...

ميت
جزاكم الله خيرا

مواطن
الكلمات رائعة بس ان شاء الله مفيش يأس

تسنيم
ليه بتفكرينى..المقروض انى دلوقتى على النت كنوع من انواع موت الضمير الدراسى..بتصحيه ليه

المهم الحاجات اللى عدت عدت على خير الحمد لله بس ادعيلنا فى اللى جاى

جزاكى الله خيرا يا تسنيمو وبعدين ليه انت اللى تصبرينى..فى ناس استشهدت مش اعتقلت..قانون عام اللى رايق هوه اللى يصبر الثانى فى أى وقت..ماشى يا أستاذة

احلم معايا
هوه عشان حاجتين..يمكن عشان الوقفة كان داعى ليها المدونين فحاولوا يركزوا على دوره كمدون
وكمان لان التدوين وبالذات لمدونة استاذ عبدالمنعم كان تعبير عن نشاطه وحركته كاخوانى وما يقابله بشكل عام

مريم
مريم على المدونة..ايه يا بنتى ده دحنا تطورنا جدا
على فكرة دخلت عندك وشفت أخر لوحة منزلاها..جميلة فعلا..استمرى

خالد وليس بخالد said...

يا أيها الذين ءامنوا اذكروا الله ذكرا كثيرا
وسبحوه بكرة وأصيلا

muslima said...

shokran ya smsm rabena ykrmek

امام الجيل said...

الحمد لله على كل حال المهم ان التفاعل تم وبوقت سريع برغم كل السلبيات او الايجابيات عسى ان يؤتى ثماره ويتقبله الله

اصرار أمل said...

أعتقد ان المشكلة كانت فى ضعف الدعاية والاستعجال ....
بس هى خطوة كبيرة ؛ ولازم علشان نتعلم نغلط الأول ..
بس الصور رهيييبة يا أسماء ؛ مستقبلك بااااااهر....هههههه

امام الجيل said...

ربنا يكرمكوا ويتقبل منكو ويكون للعمل ده اثره بعد كده ويكون فى صالح اعمالكم
المهم ان حد اتحرك وعمل حاجة مهما كانت سلبيات العمل او ايجابياته

elfagreya said...

امام الجيل

ربنا يتقبل دعائكم وطبيعى اى حاجة فى اولها سلبيات وايجابيات بس المهم تتحسن بعد كده

اصرار أمل

أهم حاجة تبقى الصور عجبتك..دى متعوب فيها يا بنتى..مش أى حاجة كده

محمد السيد said...

أنا إخوان ... الكلمة هي السر وهي السبب ... وإذا عرف السبب بطل العجب ...
أنا إخوان ... من الجامعة إلي التخرج إلي الإعلام إلي الصحافة إلي كل ما له علاقة بالإعلام ...
أنا إخوان ... في المظاهرات وفي النيابة وفي المحاكم وفي مباحث أمن الدولة وفي سجن المزرعة بطرة ...
أنا إخوان ... كانت مدونته تقولها بوضوح ... وللأسف كانت في نظر نظام بلده هي جريمته ... لكن له كانت شرفه وعزه ...
كان الخبر كالتالي ...
"قامت قوات مباحث أمن الدولة في ساعة مبكرة من صباح اليوم الجمعة بمداهمة منزل المدون والإعلامي المصري عبد المنعم محمود الصحفي بموقع الإخوان بالإنجليزية ومراسل قناة الحوار البريطانية بمصر ولم يكن وقتها موجوداً بمنزله . "
ولمن لا يعرف مين هو "منعم" مثلما كنا نناديه ...
"عرف بين الصحافيين والناشطين السياسيين بلقب " رويتر الإخوان " أحد أبرز شباب الإخوان المعنيين بالشأن الإعلامي وأحد الأوائل الذين بدأوا نشاط التدوين الإخواني ويعود إليه الفضل في لفت أنظار الكثير من مدوني الإخوان الحاليين إلي هذا المجال وتعد مدونته " أنا إخوان " أحد أبرز المدونات العربية في الوقت الراهن ."
عبد المنعم محمود ...
- أقلقهم قلمه اللي مبيسكتش ... ولسانه الي مبيرحمش ....
- أقلقهم إنه مخفش بعد كل اللي جري له ... وراجع يتكلم من جديد ...
- أقلقهم شهادته عن تعذيبه في السجون المصرية ... وفي مباحث أمن الدولة ...
- أقلقهم بصوته العالي ..وبكلمته الصريحة ... زي ما أقلقهم بانفتاحه وتواصله من الآخرين ...
وكان ردهم اعتقاله .... وبالتالي نتقدم إليهم بردنا ....
مدونو الإخوان المسلمين .... واعترافا منهم بفضل "منعم" عليهم ... واعترافا منهم بجهد كل مدون قال كلمة الحق في وجه الظلمة ...
وتواصلا مع مسيرتهم .... يقررون ما هو آت ...
باسم العشرات بل المئات من مدوني الإخوان المسلمين ....
منهم الشباب والشابات.... منهم الرجال والسيدات والأطفال ...
منهم الأسر اللي اعتقل عائلها .. ومنهم الكثير اللي غيب أحبابهم وراء القضبان ...
الكلمة اللي أقسمنا نحميها ونقولها ونعلنها ...لن يوقفها سجن ولا معتقل ولا محكمة ...
الصوت اللي خرج من وسطنا ... لن نسمح له إنه يسكت أو يضعف أو يتردد أو يرتعش ...
المدونات اللي كتبت حكايتنا وأيامنا ...خواطرنا وأفكارنا ... يوم بعد يوم حتزيد وتكبر...وتوصل لكل الناس ...
إحنا اخترنا خطابنا يكون بلهجتنا ... وبلغتنا ... عشان يوصل باسمنا ويعبر عننا ...
واخترنا نوصل رسالتنا لكل الجهات ... للفضائيات والجرائد والمجلات ولكل الكتاب والصحفيين ... وقررنا ننشرها في كل المنتديات ... والمدونات ... والمواقع ...
حملة من أجل البلد دي ... حملة ضد السكوت والخضوع والخرس, ضد الاستسلام والسلام والهوان, حملة نرفض بيها القضايا المتلفقة وشهداء الزور وأدعياء الثقافة والكتبة اللي كتابتهم كلها تحت أمرالنظام وأسياد النظام .
وفي إعلانا هذا لا نفصل أنفسنا عن باقي المدونين أو تجمعا خاصا مقتصرا علينا ... بل علي العكس نتقدم فيه بالشكر كل الشكر لكل من ساعدنا في دنيا التدوين, ونعترف له بالسبق والفضل, وكم أسعدتنا صورة "عبد المنعم محمود" وهي تملأ عشرات المدونات متضامنة متكاتفة مساندة ...

- كلنا إخوان ...رغم السجون والمعتقلات والقضايا والمحاكمات ...
- كلنا إخوان ... فكرة آمنا بيها وضحينا عشاناها ومستعدين نبذل لأجلها كل غالي وثمين ...
- كلنا إخوان ... طريق اخترناه ورسمناه ... وكنا عارفين إنه صعب وشائك ومليان بالصعاب ...
- كلنا إخوان ... وتراب البلد ده بنحبه وبنموت فيه ... وأحلي أيامنا يوم ما نشوفه حر وعزيز وكريم ...
- كلنا إخوان ... وبنحب أهلنا وجيرانا وأصحابنا وإخوانا ... ومستعدين عشانهم نعمل أي شيء ونضحي بكل حاجة ...
- كلنا إخوان ... برغم كل اللي ظلمنا وحبسنا ...وبرغم كل اللي سكت علي اللي بيجري لنا ... وبرغم كل اللي حرض وتآمر علينا ...
نقدر نقولكم مش حنسكت و مش هنبطل ... لسانا هو أساسنا ... غرباء؟ ممكن ... لكن حنفضل من الناس ...
بنحب النور وبنحب البلد دي ...لأنها بلدنا ... وبنحلم لها بالحرية ... ألم الوطن ألمنا كلنا ... وشايفين فيه أحلي ما في الدنيا ...
"منعم" وراه بلد بحالها ... نفسها تكون حرة .. وأملها في مستقبل مشرق ... ومناها في حياة كريمة من غير ذل أو استعباد ...
وفي الختام :
1- نطالب بالإفراج الفوري عن عبد المنعم محمود وكافة معتقلي الرأي في مصر.
2- نطالب المنظمات الدولية لحقوق الإنسان ومنظمات المجتمع المدني بإدانة الإنتهاكات الصارخة لحرية التعبير في مصر
3- نرفض التعامل الأمني مع قضايا الرأي والنشر الصحفي والإلكتروني
4- نؤكد على تضامننا الكامل مع مجتمع المدونين على مستوى العالم في حرية التعبير عن الرأي بكافة وسائل النشر المتاحة.
وفي النهاية ... كلنا إيمان عميق... بأن الحق منتصر وأن الصواب هو الحقيقة الوحيدة ... وأن لكل فجر ظلمة تسبقه ولكل نصر تضحيات ترسم خطاه .

مدونو الإخوان المسلمين

حضرتك لو موافق علي البيان ده ممكن تبعث بموافقتك علي الإيميل ana_ikhwan2007@yahoo.com بس ياريت بسرعة عشان يتنشر في مكان .

واحدة من الاخوان بتحب البلد دي said...

بجد بجد


كان نفسي اكون معاكم

همسة قلم said...

سمسمة ليكي تاج عندي :)

http://hamset-qalam.blogspot.com/2007/04/blog-post_17.html

عدي خديه بد
ل ما يروح عليكي
اما عن التدوينة فأتفق مع كل من سبق وقال انه ضعف التنظيم وقلة الدعاية له ربما كانت سبب رئيسي في قلة العدد
ويمكن لانه الوقفة نفسها ماكنتش تبع حد بمعنى اللى دعا ليها دعا ليها منفعل من احداث الاعتقال ولكن دون ترتيب وتنظيم مع كل الجهات المهتمة بالموضوع فظهرت الوقفة بالصورة دي

وبس :)

أحباء فى الله said...

كان نفسسى كتير أكون معاكم فى الوقفه دى بس على العموم البركه فيكم

امام الجيل said...

(لقد تم رفع الحظر عن البروفايل بتاعى يمكنكم تشريفى بزيارتكم)

خطــاب said...

فكرة الوقفة بالكيبورد فكرة جميلة حقا و معبرة

الفجرية said...

واحدة من الاخوان بتحب البلد دى وأحباء فى الله

ان شاء الله تتعوض وتكونوا موجودين بس مش شرط عشان اعتقالات يعنى
وبعدين يمكن مكنتوش موجودين لكن كنتم بتعملوا حاجة عند ربنا سبحانه وتعالى أعلى واعظم

أسموءة
جزاكى الله خيرا على التاج وهرد عليه قريبا ان شاء الله..احنا نطول تاج من عندك يا فندم

خطاب
فعلا كانت معبرة ربنا يجزى اللى فكر فيها خير