يا أهلنا في غزة .. نحن معكم

Thursday, May 3, 2007

وعد الحر


بعد تأملى للوضع الراهن (الراهن دى لأن الموضوع يخص الدراسة فلازم يكون جد) و لزيادة التسليمات والتقييمات كل يوم بشكل غريب..

وبعد فوقان كل الدكاترة يعنى اللى مكنش امتحنا ميد تيرم نفسه أوىى أوىى يمتحن دلوقتى..

واللى مكنش متواجد معانا من اول السنة بدأ فى الحضور والطلبات اللى مبتنتهيش وكأننا شغالين من اول السنة يعنى..

وبدأ تاريخ 20/5 يزحف مقتربا ومعلنا عن اول الامتحانات..

وبدأ بابا يشير لى فى الزيارة من بعيد كده(مش عاوز يحرجنى يعنى) ويقوللى الا ايه اخبار مادة كذا أو كذا..فتكون اجابتى ابتسامة يعقبها..كله بخير يا بابا..كل شيئ مدروس ..فهوه كمان يبتسم معلنا عن خبرته السابقة حول ابنته التى تتفنن فى تضييع الوقت حتى تجد نفسها أخر أيام وقد أصبح المطلوب منها جهد 24 ساعة فى ال24 ساعة ..ربنا بييسر والحاجة بتخلص الحمد لله لكن بيكون دوما فى ضغط وشد..

المهم بعد كل ده..

قلت لأ..لازم اعمل مع نفسى اتفاق ووعد لا اتنازل عنه لان وعد الحر دين عليه ..ربما ممكن اتنازل على خفيف كده..بس ميقعش الوعد كله يعنى..

وعلى ذلك مش هبطل تدوين طبعا ان شاء الله لانه اصبح جزء مهم فى حياتى..وطبقا للتدوينة السابقة أصبح لا غنى عنه بالنسبة لى.. لكن مع شيئ من التركيز فى الوقت..لأنى معرفش ليه بكون داخلة بنية هعمل حاجة على المدونة وخارجة بس الاقى نفسى لازم اعمل لفة صغيرة على الباقيين والاقى الوقت بيعدىىىىىى..بالاضافة الى ذلك وقت النوم وتقليل لحظات الضعف الانسانى التى تجعلنى اقرر الضغط على المنبه ليسكت الى الأبد بلا أى مبالاة..

ده أول جزء..تظبيط وقت النت والمدونة والنوم ودى حاجة بسيطة ان شاء الله بس محتاجة لتركيز


والجزء الثانى..الجانب الايمانى..وده بمجرد ان الانسان يتابع نفسه ويشوف هوه بيعمل ايه وايه المشكلة ..ربنا بييسر..ربنا كريم أوى أوىىىىى و الطريق مفتوح ..وما علينا سوى السير..لنجده يكرمنا ويعيننا بفضله ورحمته.

أما الجزء الثالث..فهو انى أركز فى قراءتى على موضوع خوض التجارب و تكرار المحاولة وعدم الياس والقدرات..
لانى بطبيعتى شخصية ملولة دراسياً يعنى لو فى حاجة مطلوبة منى ..مجتش معايا مرة والتانية بمل وبحس انى مش هعرف اعملها..


الجزء الرابع..تخطيط الوقت فى الفترة القادمة..وده بس محتاج أعدة أركز فيها هعمل ايه وبعدين ايه وامته ودى جارى تنفيذه..

اكيد فى حاجات تانية كثييييير لكن دول النقط الأهم..وعلى فكرة انا مش مرتباهم بالاهمية..ده اى ترتيب يعنى لانى بكتب التدوينة مباشرة دون تجهيز..

هيه ان شاء الله مفيش حاجة هتختفى لأن حتى لو كانت فترة امتحانات مهما كانت مهمة عادى هتعدى يعنى ان شاء الله..لكن فيه حاجات هتقل عشان الوقت..

رسايل قصيرة وسريعة..

لكل من قرا المدونة فى الفترة اللى فاتت أو علق أو شجع

جزاكم الله عنى خيرا كثييييييرا


لأمى الحبيبة

اطمئنى يا ماما..هبدأ مذاكرة ان شاء الله بس محتاجة دعااااائك..ورأيك دايما..وانك تسامحينى لما بقصر معاكى وتيجى تقوليلى بس بعد متكونى سامحتينى..


لدفعتى الجميلة


اللى منها بيدخل هنا يعنى..واللى مابيدخلش اللى بيدخل يقول له ان شاء الله
اشحذوا الهمم يا بنات وربنا ييسر الخير
وبعدين انتو أدها وأدوووود
ولكم فى تقييمات السنة اللى فاتت عبرة..
الى كل اخوات كليتى الجميلة بردو

الفترة القادمة يمكن مبشوفكمش زى بقية السنة وبيكون كل حد منا أوقات مش مركز لكن بكون فاكراكم دائما وبفتقدكم وبحس بدعائكم وانا كمان هدعليلكم ان شاء الله

الى الجميع

ربنا يجعلنى واياكم من ذوى الهمم العالية و أن نكون بردا وسلاما على قلوب من نحبهم ويحبوننا


الى أبى


أتذكرك دائما يا بابا وبالذات الأيامدى وبفتكر كل مواقفك الباسلة (مستغربوش الكلمة أصلها كانت فعلا باسلة) معى أيام المذاكرة والامتحانات ولن تكفى المدونة كلها لذكرهها فهى كثيرة قدر عطاءك وحبك..

جزء كبير من نيتى فى المذاكرة هى ادخال السرور لقلبك عندما ترانى احاول القيام بما على بغض النظر عن النتائج..وهذا أجمل ما فيك يا ابى

دعاااااااااااااائك يبقى ركنا شديد يعيننى

كل يوم جديد يمر على افخر انك أبى


-------------------------------------------

ومع كل الكلام السابق ومع ازدحام الحياة والزخم وضيق الوقت الأيامدى..الا أن هناك لحظات من الوحدة تأخذنا ولو كنا وسط الزحام والانشغال وعشرات الأشخاص..تاخذنى احيانا وتتركنى أحيانا..لا اعلم لها سببا..غير انها ورغم ما تتركه فى القلب من شجون الا انها توفر له فرصة جديدة للتأمل ورؤية الكثير والكثير الذى كنا احيانا نغفل عن رؤيته..

التدوينة القادمة ان شاء الله عن مقالة قرأتها و اعجبتنى جدااااااااااااااااا ووجدتها لمست شيئا بداخلى واستطاع كاتبها ان يمسك بقلمه ويكتب عن مشاعر و خواطر أحسست بها ولكنى لم أستطع أن أكتب أو أعبر عنها... وأتمنى ان تصل لكم مثلما وصلت لى...

15 comments:

مشروع انسان said...

انا اول المعلقين ولله الحمد
طيب خير كويس ان الواحد يكون مخطط كويس لحياته وعارف هو عايز ايه وعارف المفروض يرتب وقته ازاى ويعمل ايه قبل ايه بس الاهم هو العمل نفسه وان الواحد يبتدى نسال الله التوفيق

me said...

موضوع رااائع يا أسماء
هبقى آخد شوية من الخطة التكنيكية دي
وأطبقها
علشان الامتحانات ع الأبواب
وأختك لسة ما حطتش خطة
ربنا يسهل
بس بجد
ربنا يكرمك يا قمر
ويفك أسر أبيكِ وأسر جميع اخوانه

محمود سعيد said...

إلهى يا رب أنا كمان أعقل بقى وأعرف أعمل مع نفسى الوعد ده

علشان ماروحش فى داهية :-)

Anonymous said...

asalmaolikom ya asmoo2a mawdoo3 gameel gdn w gay fy el sameem f3lan m7tageen nshd 7elna shwya w inshallah hat3ady e7na ah madghoteen fy el ksm bas dah 3ady bas nd3y lba3d w rabena inshallah hay3deha 3la kheer ,, okhtek fy el ksm......

Anonymous said...

ربنا معاكى ويوفقك فى الفترة القادمة وادعيلى معاكى وأن ان شاء الله هاستفيد من هذا الوعد وهذه الخطة

فاروتا المصرى said...

السلام عليكم
ربنا يوفقكم جمعيا
وربنا يرد اليكم ابائكم قريبا ان شاء الله
كويس ان الواحد يحدد هو عايز ايه
اه صحيح هو انا عايز ايه؟؟
ربنا يكرمك وتنجحى وبتقدير علشان خاطر عمو ياسر يفرح بيكى يا اختنا
؟؟؟
وربنا يفك اسر كل اسير

Anonymous said...

امام الجيل

كلام حضرتك صح جدا أحيانا كثيرة نخطط ونجهز وتبدأ الخطوة الاولى للتنفيذ هى المحك الأصعب

خديجة
ربنا ييسرلك الخير
وعادى لسه فى وقت ان شاء الله
تتحط فيه أجمد الخطط

أ.محمود سعيد
ان شاء الله هيتعمل..أصل لا مفر

مريم

متخافيش يا أنا متفاءلة ان شاء الله
وحسه ان كله هيعدى على خير
وبجد يا مريم بتصعبى عليه واحنا كل شوية بنسألك فى كل حاجة
كله فى ميزان حسناتك ان شاء الله

أ.أحمد
جزاكم الله خيرا

فاروتا المصرى
ربنا يجعلنى من أسباب فرحه ان شاء الله..اءمل فى ذلك

آلاء الرحـمـن said...


كلنا ذاك الرجل

ربنا يكرمك يا رب يا سمسم

و يوفقك و تجيبى تقدير و ترتبى كمان

و تكونى قره عين لوالدييكى يا رب

و ان شاء الله لما تقسمى وقتك كويس هتلاقي عندك وقت انك تعملى كل حاجه

ربنا يعينك و تخلصي امتحاناتك على خير يا رب و نفرح بيكى كده

همسة قلم said...

ربنا يعينك وييسر لك امرك ياسمسمة وتنفذي وعدك بجد

نا افتكر وانا في سنة رابعة كلية سنة تخرج يعني لما اتعرفت على الكمبيوتر والنت كنت صعب اوي اني اسيبه واقوم اذاكر المواد البايخة اللى ورايا ..عملت عهد زي ده كده وحدد ساعتين في اليوم اقعد فيهم اتابع اللى ورايا واشوف اخر الاخبار والحمد لله عدت وخلصت واتخرجنا
ربنا يعينك حبيبتي وييسر لك امرك ويوفقك وتنجحي وتتخرجي بقى وتخلصي :D

الـفجـريـــة said...

الاء الرحمن

ربنا يتقبل دعائك يا بنتى
ونقفل على موضوع الترتيب ده خااااالص

اسموءة

ماشى يا ستى بتفكرينا انك دلوقتى عارفة تعدى براحتك..
ربنا يباركلك فى الوقت (طبعا من أعماق اعماق أعماق قلبى)0
وبجد يا اسماء نفسى اتخرج دراسة بس منفسيش اتخرج كلية..تيجى ازاى؟؟

Anonymous said...

يااااه يا أسماء الموضوع رائع وشجعني على الاستمرار في الدعاء لكي بشدة وبجد يا أسماء الله يعينك و يعينا معاكي و يخلي لك خالتو و قولي لها متنسناش في دعائها فعلا و سلامي الشديد لعمو ياسر و فعلا محتاجين دعائه
"و الله معكم ولن يتركم أعمالكم "
أكيد هتعرفيني
سلمى حلي

Anonymous said...

جزاكى الله كل خير يا بنتى فعلا موضوع جمييييييييل و تدوينة و أفكار رااااااااااائعة ربنا يباركلك و يبارك فيك
دعواتك أنت و خلتو كتييييييييييييير علشان أنا بجد فى أمس الحاجة ليها
و سلام الله عليكى يا أختى حبيبة

Anonymous said...

سلماية..

اتبسطت لما شفت ردك جداااااااااا

عارفة ليه؟؟

عشان فيه لمحة تفاؤلك المعتادة واللى بتيجى لأى حد بمجرد انه يكلمك مش حركات يوم الخميس يا استاذة

وعاوزة أقولك انك انت أول واحدة توصلى معنى اية"و الله معكم ولن يتركم أعمالكم "
جزاكى الله خيرا وربنا يباركلنا فيكى

تسنيم
باين من كلامك انك بداتى مذاكرة ربنا يعينك وييسرلك ان شاء الله
سلامى لخالتو كتيييير
..

Aml Ghonaim said...

ياسلاااااااااااام
انا فعلا حاسة ان معاد 16\6 ده بعيد جداااااا
مش عارفة ان شاء الله هبدأ فى وضع الخطة امتى ؟!
لكن ياأسماء ؛ راائعة جداا التدوينة دى ؛
انتى عارفة أنا دايما كنت بقول جزء كبير من نيتى فى المذاكرة ( ادخال السرور على قلب ماما الحبيبة )
أسأل الله أن يشرح صدرك ؛ وييسر لك أمرك ؛ ويثبتك ؛ ويثيبك على قدر تعبك ...
ربنا معاااك ....
سلامى لوالدك ؛ ولوالدتك .........
ودعواتى الطيبة لكم .....

AbdElRaHmaN Ayyash said...

ياااارب تثبتي على كده
و الله انا عاوز حاجه زي دي
جزاكم الله خيرا
فعلا ترتيب جميل اوي وخطة روعة
سلام