يا أهلنا في غزة .. نحن معكم

Thursday, May 10, 2007

قصاقيص لها ذكرى

جاءت لى فكرة هذه التدوينة فى طريق عودتى من الكلية اليوم الخميس عبر الجيزة المزدحمة بالطرق والطرق المزدحمة بالعربات والعربات المزدحمة بالناس وبعد يومين مظبطة فيهم وقت النت الى حد كبير يعنى انهارده أجازة الحمد لله ..


مرت فترة على وصولى وبعدها قررت البدأ فيها


و نظرت فى مكتبتى اللى محتاجة تتنظم جداااا حتى وجدتها



ما هى؟؟



شنطة الورق




وهى شنطة تعودت أن أجمع فيها أوراق اود ان أحتفظ بها تذكرنى بيوم معين أو ذكرى أو ناس..فبطبيعتى أحب الذكريات جدا...وحتى لو مكنش فيه أحب أعمل..يعنى مثلا لو بذاكر وهاجمنى الملل أطلع ورقة لأكتب "دلوقتي انا قاعدة أذاكر ومملولة"وأكتب تاريخها وأضعها مع بقية الورق لاراها بعد الامتحانات..وهذا يتكرر كثيرا..المهم اخترت كذا ورقة وجدتهم يحملوا ذكرى لى ولكنها فى نفس الوقت ترتبط بناس تانية وأحداث منها ما يشغلنا جميعا



إليكم قصاقيص لها ذكرى



القصقوصة الأولى



حاجة من اللى بيقولوا عليها "من ريحة الحبايب " ووجدت منها عندى الكثير..واحدة مكتوب على ظهرها كلام والتانية فاضية والتالتة مقطوعة والرابعة متنية..


اييييييييييييه هيه؟؟



تذكرة طفطف مزرعة طره



توضيح : طره طبعا كبييييييير عشان يكفى اللى موجود واللى عاوزينه ييجى

المهم كان زمان التنقل فيه سيرا ..الى أن جاء القرار الجامد جدا بان يصبح النقل فيه بالطفطف (زى اللى فى الحديقة الدولية كده)بس على أخضر..


والطفطف ده بيتقطعله تذكره بواحد جنيه مصرى وبيجمعنا فيه قبل منوصل لمكان الزيارة وبنتكلم وبنفتكر حاجات عاوزين نقولهالهم..وطبعا الأطفال بيهيصوا فيه..وعندهم حق..انا لو كنت طفلة وقالولى باباكى يعتقل وتركبى طفطف ولا ميعتقلش ومتركبيش..الاختيار هيبقى صعب مش بسهولة كده ..ده طفطف يا جماعة فيه ايه؟؟!0



القصقوصة الثانية



هوه مش قصقوصة هوه كارت..بس موطن تميزه أنه اول كارت من أخت يجيلى فى الكلية..واخت بحبها فى الله جداااااا..وجدته وأنا بقلب الحاجات وافتكرت من 3 سنين عدوا لما الواحد كان لسه بيخطو أولى خطواته فى الكلية..وناس كان لها فضل على لا يمكن أنساه..وناس علمتنى حاجات مظنش كنت هتعلمها فى مكان تانى..ربنا يكرمهم ويجزيهم عنى خير الجزاء


ده الكارت الاولانى



أما الكارت التانى فهوه منها بردو..لكن ده ليه ذكرى جميلة جدا..

كان مؤتمر من مؤتمرات دار الحكمة الرائعة

بس مكنش عادى كان لا ينسى ابدااااا

كانت فيه أمنا الغالية "أم نضال"0

مؤتمر تظل طول مدته شاخصا بصرك و لولا ان عينيك تحتاج للغلق كل فترة لما وددت أن اغلقها حتى لا تضيع لحظة دون أن اراها

هى سيدة مختلفة بكل المقاييس

وكأنها جاءت من عهد الصحابة لتقول " أفيقوا"0


بس بعد الكارتين دول عاوزة أقول حاجة..

أولا لأختى الغالية التى أتمنى أن تكون من قارئى هذه السطور..حقا أحبك فى الله..وتعلمت منك الكثير ولازلت أتعلم..وبقصر فى حقك اوقات وتسامحينى..بس بجد أصبح لكل موقف ذكرى معك أتذكرك بها دوما..


ثانيا.. اتحاد الأطباء العرب و لجنة الاغاثة و بالأخص د.جمال عبد السلام..مازلنا فى انتظار عودتك سالما غانما ان شاء الله وفى انتظار أول مؤتمر نراك فيه وده قريبا ان شاء الله..بس لو ينفع عشان الدعاء يوصل مباشرة تكون ضيفته " أم نضال"0


القصقوصة الثالثة


ودى من أخ مجاهد كبير جدا جدا رغم صغر سنه


من عضو فى رابطة اطفال من أجل الحرية

من أنس أيمن عبد الغنى


يوم ما تم قبول الطعن يعنى يوم الثلاثاء وبعد النطق بالحكم جبنا ورقة وقسمناها نصين..نص كتب فيه هوه ونص كتبت فيه وبدلنا

وكان فيه الجملة اللى اخترناها


"أبى انهارده أخد افراج"


وتناول الحديث 3 مستويات من الفرحة عند أنس


فقال انه هيفرح بس عشان الحكم

وهيفرح اوى لو بابا خرج

وهيفرح أوى أوى لو بابا خرج ومخدوهوش تانى


الولد منظم افكاره مش أى كلام وخلاص..


-----------------------------------------


مثلت هذه القصاقيص الثلاثة أحداث فى ذاكرتى


احتوتها هذه التدوينة كما احتواها قلبى وعقلى..


فمثلما هو من نعم الله علينا النسيان فى بعض الامور فنعمته الكبرى هى الذكرى فى أمور اخرى فطالما كانت الذكريات دافعا لنرى انفسنا ومن حولنا بصورة أجمل ونتقبل واقعنا بسعادة ورضا أكثر وأكثر..





33 comments:

Anonymous said...

فعلا جميل ان يتذكر الانسان ما مر به من احداث-خاصة الصعبه منها- .ولكن الاجمل ان يتذكر كل منا هذه الاحداث الصعبه بعد انقضائها.

يعنى هايبقى شعور رااائع عندما تتذكرى هذه الاشياء مع والدك بعد عودته سالما غانماً ان شاء الله

ادعوا الله ان تنالى هذا الشعور قريباً

*تدوينه رااائعة وكلها مشاعر رقيقة .جزاكى الله عليها خيرا، وتقبل منكم جهادكم.

Anonymous said...

بسم الله ماشاء الله فكره جميلة ... وانا مثلك تماما .. احب الإحتفاظ بكل شىء ... ولكن كل فترة ابحث فى هذه الأشياء لأعيد التفكير فيها .. واتخلص من الكثير منها ... بس جامد جدا الاختيار هيبقى صعب لوقالولى باباكى يعتقل وتركبى طفطف ولا ميعتقلش ومتركبيش ... اهم حاجة الصراحه مع النفس ههههههههه ... وكمان انس عبد ايمن عبد الغنى التجربه اللى عايش فيها بتخليه يفكر اكبر من سنه .. ربنا يرجع والده ووالدك والباقيين كلهم على خير وفى اقرب وقت ..

Anonymous said...

جزاكى الله خيرا يا اسموءة وبجد يا أسماء انت عندى حاجة كبيرة اوى.اكبر مما تتخيلى انت وخالتو (ربنا يخليهالى(وعمو ياسر ربنا يرجعه بالسلامة

اسماء العريــان said...

ضحكتنى اوى تذكرة الطف طف يا سمسم

هههههه

رجعتلنا الذكريات مع الطفطف ... بس وما ادراكى بقى لو الطفطف بايظ

بنتحرك بعربيه الترحليات ... ربنا ما يعودها ايام يارب

ويرجعلك باباكى سالما غانما منتصرا

Anonymous said...

هو فعلا يا اسماء هيكون الاختيار صعب لو خيرونا مابين خروج ابائنا وما بين الطفطف ( بس هو مش هيبقى صعب اوى )بس انتى عارفه يا اسماء
ان شاء الله ان شاء لما ابائنا يخرجوا هاكون طبعا فى قمة السعادة بس فى نفس الوقت هابقى زعلانة عشان الواحد مش هيشوفكم بعد الصحبة والاخوة اللى الواحد ما شفهاش فى اى مكان تانى
( بس هما يخرجوا بس )

نيرة عصام

Anonymous said...

أ.معاذ

جزاكم الله خيرا
كلامك صحيح..فالذكرى بعد مرور اى موضوع صعب بتصبح رااائعة..ده فى اى حاجة حتى لو حاجة فى الدراسة مثلا مش ميسرة فى عملها وخدت مجهود..تصبح بعد الانتهاء منها ذكرى رائعة

أ.ياسر سليم

بحاول كل فترة أعملها فرز واشوف ايه الأخبار..ولكن غالبا معرفش أتخلص من الحاجات ودى مشكلة..لأن والدتى تعتبرها كركبة ..بس بنوصل لحل وسطى
ربنا يتقبل دعائكم

Anonymous said...

سالى

واياكم يا سالى

مع انى مهما قلت فلن أوفيك حقك على

بس انا على يقين ان ربنا سبحانه وتعالى هيوفيك
على قدر استحمالك وصبرك عليه وحاجات كتير


أسماء العريان

عربية الترحيلات..لا ربنا عافانا الى الأن الحمد لله
اللى يدايقك انهم غراب جدا يوم ما الناس تكون قليلة يشغلوا الطفطف كامل ويوم ما الناس تبقى كثيييييييرة يشغلوا عربية واحدة..
يعنى بجد ناس ذات دماغ متنورة وفاهمة شغلها:)


نيرة


وايه علاقة خروجهم يا استاذة باننا منشوفش بعض..

هه؟؟؟

هيخجوا ان شاء الله وهنفضل نشوف بعض حتى لو الرؤية قلت أو مبقتش منتظمة لكن بردو هتكون موجودة ولا انت ناوية عمو يخرج تقومى بيعانة فى لحظة كده..

لا لا يا نيرة مكنتش متخيلاكى كده..دنتى بنت عمو عصام يا شيخة..الراعى الرسمى للرومانسية فى طرة

Anonymous said...

ما شاء الله ، كلامك رااااااااائع يا سمسمه ، وبجد مشاعرك جميله جدا جدا جدا ،
وانتي ما شاء الله انسانه رائعه ومفكرة ، وجميلةاوي فكره الورق اللي فيه الذكريات ، وان كان ينم عن شئ ، فينم عن احاسيسك الجميله ،

والحمد لله انك عرفتي تظبطي وقتك علي النت، فاكره لما سألتيني وقلتلك اني مش بعرف ،
ابقي عرفيني بقي ازاي عرفتي ،

يا تري عرفتين ؟؟؟!!

سلام عليكم

Anonymous said...

ههههههههه
حلوة الراعى الرسمى للرومانسية دى
وبعدين ازاى ابعكم يعنى ده انتوا خلاص الظاهر بقيتوا مكتوبين عليا

وافرحى يا اسماء حطوا قصاقيصك على انسى شوفتى بقى الذكريات ليها عوزة ازاى

نيرة عصام

مشروع انسان said...

فكرة حلوة حكاية القصاقيص دى وان الواحد يتذكر ايامه بقصاقيص بس ايه حكاية الطفطف ده للدرجة دى
رد الله لك اباك سريعا

محمود سعيد said...

أكثر حاجة ضحكتنى قصقوصة أنس

مرتب دماغة صح
ومرتب أولويات فرحة طفولية :-)

أما بقى الورق والكروت القديمة ديه أنا عندى منها شوية كتير

بس فكرتينى بشوية ورق وممكن اعمل زيك :-)

أما التذكرة ديه بقى الحمد لله مروحتش طرة وللأسف ولا زرته
وكمان مش عاوز أركب طفطف

ولا عربية ترحيلات :-D

Anonymous said...

أختى الحبيبة

أولا جزاكى الله خيرا على كلامك..وانتى اللى واضح انك رقيقة جدا

ثانيا..من ساعة مقريت الرد يمكن من حوالى ساعتين..عمالة افتكر..فاكرة الحوار كويس جدا ..وانى قلت لحد انا مش بعرف اظبط وقت النت فقالتلى ولا انا
فاكرة الموقف
لكن مين..عمالة افكر وافكر
أكيد حد عارفاها كويس وغالية عندى
قوليلى؟؟

نيرة

تقدرى تقولى قدر..بس أكيد انت سعيدة به طبعا :)

اه نزلت على انسى..داخلة عادى بشوف ايه الجديد لقيت من قصاقيص اسماء ياسر قلت سبحان الله الدنيا الصغيرة..الواحد يسيب القصاقيص هنا يلاقيها راحت هناك

Anonymous said...

امام الجيل

جزاكم الله خيرا

ده طفطف متميز ومختلف

أخ محمود سعيد


طيب كويس..منتظرين التدوينة ان شاء الله
اما بالنسبة لانس فهوه فعلا دماغ جميلة بس لا يقبل نهائيا اى مساس بحقوقه ووممتلكاته

Anonymous said...

السلام عليكم
1- عندي عددة اماكن لحفظ القصاقيص احدها تم تفتيشه و اخذ محتوياته كلها و الحمد لله كانت السبب في اطالة مدة التحقيق مع والدي في تحقيق النيابة
2- حضرتك لما بتكلمي عن الكلية بحس اني عند البرجولة او عند العميد
3 - جزاكي الله خيرا علي تذكر والدي بس هو اعتقل علشان مؤتمرات ام نضال ومحمود الزهار و حسبنا الله ونعم الوكيل

About Me said...

جميل جدا ان الواحد يحتفظ بحاجات تفكره باحداث فاتت عليه....انا فيا العاده دي برده...وان شاء الله هتحتفظي باخر تصريح قريب انشاء الله
ربنا معاكي وربنا يقويكي

Anonymous said...

اخ محمد جمال

حتى وان كانوا وصلوا للقصاقيص كورق او شيئ مادى فهم لن يستطيعوا الغاء الذكريات والمواقف التى غيرت فينا او تركت بصمة فى حياتنا ودى أحسن حاجة

أما بالنسبة للكلية فتذكر البرجولة شيئ كويس

لكن العميد؟؟؟؟؟؟؟؟
مظنش

أ.ميدو مجدى

ان شاء الله قريبا ووقتها هنفتقد اكيد تلك الأيام

AbdElRaHmaN Ayyash said...

يا سلاام
ونعم الذكريات و الله
ايمن وسارة أخته :)
و الله فرحت اوي لما شفتهم في المؤتمر
سلمي عليهم كتير يا باشمهندسة
اما الحب في الله
و الله انا عندي كارت من حوالي تلات سنين برضه من اخ بحبه اوي
ومحتفظ بيه
وزعلت جدا لما افتكرت انه ضاع مني
بس الحمد لله لقيته
وطفطف طرة
ان شاء الله قريب هيكون طفطف سياحي :D
لأن طره هيبقى مزار بقى
ما هو خلاص
هانت

Anonymous said...

ياااااه يا أسماء برافو عليكي و الله خرجتينا من جو الكبت اللي احنا فيه بهذه التدوينة المملوءة بالمشاعر و عموما أنا عندي مكانين شايلة فيهم ذكرياتي مكان للحاجات اللي تودي ورا الشمس وده درج كبير و مكان للحاجات الأخوية في دولابي وانا فصلاهم عشان لا قدر الله لو حصل أي حاجة ما يخدوش عاطل مع باطل و أنا اتخيل إن ذكريات الكلية دي بتكون من أجمل و أحلىىىىىىى الذكريات و فعلا زي ما قلت يا أسماء في حاجات لو مكنتش دخلت الكلية مكنتش عمري هاأتعلمها
أكيد هتعرفيني
سلمى حلي

Anonymous said...

اخ عبد الرحمن

جميل موضوع طفطف سياحى ده جداا..وقتها ان شاء الله هشترى بكل ما املك من نقود تذاكر وأوزعها على الناس وومكن اشتغل مرشدة هناك واحلم بيوم اقول فيه"احنا هنا فى مزرعة طره اللى كان مكان لكل شريف مطالب بالحرية ايام مكان فيه حاكم ظالم ذهب وذهبت أيامه"


سلمتى

مكان للحاجات اللى تودى ورا الشمس..

هوه الاستاذة لسه مراحتش؟؟؟؟

يا شيخة خلينى ساكتة

مش هفضل ساكتة هتكلم على فكرة بس دى مفاجأة ان شاء الله..اصبرى على رزقك

وعلى فكرة بجد يا سلمى وتأكدى ان كل لحظة بأجر..

اما عن الكلية فبتخيل اليوم اللى بعد منكون اتخرجنا ان شاء الله واقول كان فى فى يوم سلمى فى الدفعة الاصغر منى علطول وكنت كل يوم بتعلم منها حاجة جديدة

على فكرة بابا بعتلك معايا بنبونى بالشوكولاتة(لو كانوا شهر كانوا باه بونبونتين)..انتى فاهمانى

معلش اخر حاجة..موبايلك..رأفة بى تخلصى منها..يعنى روحى اديه لحد وفوقيه فلوس عشان يوافق ياخده..نفسى مره يكون متاح..مرة واحدة تردى وتقولى سلام عليكم وارتاح بعدها

mazagat said...

اسمحي لي بكليمات مقتضبة

..]
هذه الأقصوصات

تضعفني بقدر ما تقويني

[..

لعل مقصدي قد وضح ..!!!



التحيات المباركات




... مزاجات

همسة قلم said...

انتي مش ممكن يااسماء :)
بس اكتشفت من التدوينة والردود عليها انه مسألة القصاقيص دي منتشرة في الوسط الشبابي كله :)
تعالى اتفرجي على مكتبي ومكتبتي هتلاقيها قصاقيص قصاقيص قصاقيص :D

وبعدين احنا على ايمنا ماكنش فيه لا طفطف ولا يحزنون وكنا بناخد المشوار ده من اول البوابة لغاية ملحق مزرعة طرقة مشي وعدي على المناطق السياحية الموجودة من اولها لاخرها ولا اجدع سياح في مصر:D

بالمناسبة المنطقة السياحية التي يطلق عليها الخيالة لسه بخيرها ولا عملوا فيها ايه ؟؟
والغربان الكتير اللى كانت بتزعق ليل ونهار طيروهم ولا لسه سايبينهم ؟؟

يابنتي ربنا يفك اسر عمو وكل اللى معاه ولو على الطفطف اخدك كل يوم اركبهولك في الحديقة الدولية ولا في الازهر بارك ولا تزعلي نفسك :)

سلمي على عمو وخالتو بقى ياسمسمة وروحي ذاكري ياللا :)

عاشقة الرحمن...سميه العريان said...

يااااااه يا اسماء فكرتنى بذكريات لا حصر لها

اولها الى اسماء شحاته قالتو انا كنت عيله ساعتها فكنا بناخدها جرى لغايه المزرعه من جوه

وفاكره بتوع العجلات الى على بابا السجن من بره كانو بياجرو العجلات بتاعه الخضار دى عشان نحط عليها الشنط


اما القصاقيص

فانا درجى مليان

بس من القصاقيص التى لا تنسى جوابات بابا من مزرعه طره

هابقى اعملهم تدوينه مخصوص

وربنا يخرج عمو بالسلامه

ونشتغل مرشدين فى المزرعه بعد كده

وسلميلى على خالتو كتيير اوى

ومتنسيش الى اتفقنا عليه وفكرى خالتو

Anonymous said...

حبيبتى أسموءة

يا بنتى القصاقيص دى ثقافة مجتمع..انتى فاكرة ايه

منطقة الخيالة زى ما هيه وبتسلم عليكى..لكن الغريب انهم الايامدى بيعملوا أوصادها حمام سباحة..معرفش ليه؟؟ بس سألت بابا فقال انه معلوماتهم انه مش للمساجين لكن للتدريب.. اصله لو كان للمساجين هوه والطفطف يبقى الموضوع كده محتاج تفكير أكتر..
:)
اما بالنسبة لموضوع حديقة الازهر ..موافقة

Anonymous said...

سمية

حلو موضوع تاخدوها جرى دى ..انتى عارفة مر حد حكالى انهم كانوا وهما اطفال بيعملوا برنامج للزيارة ومسابقات طول المدخل ده واللى يفوز فيها بيبقى عمو جوه مجهزله هدايا

..

مستنية التدوينة دى جدااااا

وسلمى على عمو وخخالتو واسموءة

Anonymous said...

مزاجات

والله فى كذا معنى وصلنى

ولكن اتمنى لو تفسر قليلا تلك الكلمات فشعورى ان خلفها معنى أكبر

همسة قلم said...

طفطف وحمام سباحة وجناين وزرع ..وآل ايه على ايام ابي الله يرحمه كانوا الاخوة بيقولوا انه سجن خمس نجوم ..

امال ده بقى ايه عشر نجوم :D
لأ كده الحكاية محتاجة تفكير فعلا ياسمسمة ..بس تفتكري ممكن يسمحوا انه الواحد يحز له زنزونة صغنونة تطل على حمام السباحة بماطارحها :D

يارب يفك اسر عمو ياسر وكل الاخوة المعتقلين قريبا يارب

آل حمام سباحة آل

:D

Aml Ghonaim said...

قصاقيـــــــص
حتى أنا عندى مجموعة هااائلة منها ؛ بس مش فى شنطة ؛
محفوظين جيدا والله ؛ بس مش فى شنطة ؛
عندى حاجات من الابتدائى والله ...
الظاهر تعودنا على تأريخ حياتنا بهذه القصاقيص ؛
أعجبتنى للغاية قصقوصة المجاهد الصغير ؛
ربنا يبارك فيهم ؛ وينبتهم نباتا حسنا ؛؛؛
سمسمة :
انى أحبك فى الله ياغاالية ؛؛؛
دعوااااااااااااتى لك ؛

شروق الشواف said...

دائما ما تترك الذكريات مهما كانت صغيره اجمل انطباع في قلوبنا وعقولنا

..........

ادامها الله عليكي نعمه

حلم الحرية said...

عجبتني اوي قصقوصة انس

بوست رااائع يا اسماء

بافكر اقتبس الفكرة منك في مرة

ياااااااااااه

ده درج الواحد مليااااااااان قصاصيص
ومع كل قصقوصة وقصقوصة قصة وحكاية وذكريات

خليتيني عايزة اجري علي درجي

صحيح بمناسبة الكروت والتذكارات
احنا في الكلية عندنا وبما اننا بنودع بعض - سنة رابعة بقي - كان في اختراع قديم بنكتب فيه لبعض اسمه الاتوجراف دلوقتي لغوه...وبقي موضة قديمة
والموضة اليومين ول نكتب لبعض عالبالطو

مش عارفة اول ما قريت موضوعك افتكرت اكبر قصقوصة ذكريات عندي اللي هيه البالطو طب لو حبيت اصورها وانزلها عالبلوج حيكفي

سؤال منطقي برضة وللا ايه رايك؟؟

من غير ما تقولي عارفة
انا كل اسئلتي منطقية

متحرجنيش بقي

mazagat said...

أقصد أن هذه القصاقيص من حزنها تضعفني وتشعرني بضعفي الشديد من كثرة ألم بعضها

ثم تأتي قوة معانيها وكلماتها فتلهب القوة في وفي قلبي

فمن حب في الله
ومن اقتسام فرحة مع طفل صغير
ومن تعلق بصاحبة

كل ذلك ومثله معه يقوي العزيمة ويلهب الإيمان


هذه بعض معاني التي وصلتني


أتمنى أن أكون قد وضحت



تحايا



... مزاجات

الـفجـريـــة said...

امل
شروق
مروة
مزاجات

جزاكم الله خيرا كثيرا
كلماتكم رائعة
ودعواتكم بأه فى المذاكرة

Alaa said...

الللله
الكارت الاولاني ده قديم
و حافظ شكله عن ظهر قلب
كان في فترة جميلة جدا و فكر الواحد بحاجات اجمل
جميل ان الانسان يفتكر الذكريات ده
الله يباركلك

جهاد خالد said...

سبحان الله
حقا إن الذكرى لنعمة

قصاقيص وان كانت تدل على مواقف بسيطة لكن احتفاظك بيها اداها معنى كبير

أسأل الله أن يجعل كل ذكرياتك سعادة وهناء